لقاء بنات الاقلاع (2)

هذا الجزء الثاني من الاجتماع واللي تم يوم الاربعاء.. هنا الجزء الأول… طبعا ما أنسى شكر ساكورا المملكة على فعاليتهم اللي حمستنا نتقابل بالجامعة…

بحاول اتذكر كل التفاصيل هالمرة خصوصا اني كنت نايمة كويس وصاحية بدري مروقة

اللقاء الثاني كان يوم الاربعاء وفيه مجموعة جديدة راح تجي… ذاك اليوم انا كنت مشغولة الى راسي، اشياء كثير يفترض اسويها، واتصالات لازم اتابعها، واشخاص ابي اقابلهم:(، غير اني تأخرت بالنوم بالليل لانو جلست اشتغل على حاجة ببحثي ورفعت ضغطي لدرجة بعد شغل اربع ساعات بغيت امسح كل شغلي واعيده من اول وجديد.. بس الحمد لله حصلت ددعم نفسي من وحدة من صاحباتي خلتني اروق واعدل الاخطاء وضبط الشغل..

.. جيت الجامعة بدري عشان اخلص الاشياء اللي بالجامعة من بدري .. وبعض الاشياء اللي فيه مجال أاجلها للاسبوع اللي بعده اجلتها … كان ذاك اليوم ثورة على جدول مواعيدي .. بس بصراحه كنت متحمسه اقابل باقي البنات

هالمرة كان موجود byakuya ، La Rosa ، LeLey ، ~sora ، T O O F Y ، Blue-Sky ، NaNaly

NaNaly و byakuya كانوا جايبين معاهم قهوة وحلى .. وجلسنا قريب من مبنى الدراسات العليا وقلبناها سوالف انمي ودراما وفرق

الجو كان ممتع مريح… La Rosa يا حياتي كانت مريضة ومبين على شكلها باهت شوي… وتأخرت على محاضرتها وحشمت نفسها ولا راحت .. والقهر لما كلمت البنات اكتشفت انو على حظها اليوم الدكتورة ماقفلت الباب وكان يمديها تروح لو متأخر .. بس كله من د.كيف وتأخيرهم اللي مدري وش يبي

طبعا خذت البنت بجولة داخل مبنى 26 عشان اثبت لها انو بنات الماستر ياخذون محاضرات .. ماله داعي تاخذ فكرة سيئة عنهم انهم يلعبون لاني وحدة خلصت محاضراتها …

الميزة بنظام الماجستير انو يكون عندك سنتين مافيها محاضرات… شكليا حلوة .. بس بالواقع تحسين انك ضااااااااااااااايعه بقوة … وهذا الشي اللي امر فيه بالفترة الحالية

~sora ما درت الا متأخر بس كان شكلها افضل من يوم السبت;).. واضح انها مروقة مو توها طالعه من الاختبار… واللون البنفسجي مشرق عليها :D…على انها جت بس شوي ومستعجلة بس مسكت البنات اللي معاهم رتب من الانمي وطاحت فيهم تهزء وانها بتسحب رتبهم اذا مانزلوا موضوعات… وانا بكل خبث ونذاله كنت من بعيد اضحك عليهم .. وبيني وبين نفسي اقول اشوا ان رتبتي مو من عندهم .. وادعي لمشرف البوكيت… لما خلصت ~sora منهم التفت عليّ وسألتني ماتبين رتبه انمي؟؟؟… طبيعي عقب الزفة اللي سوتها للبنات بقول لا

NaNaly بنوته كيووووووووت وهااااادية… اول ماقابلناها نحرجت حيل وحسيتها ودها ترجع بيتهم من الاحراج:p… وخذت لها تقريبا ساعة على بال مااستوعبت الوضع واندمجت مع البنات… مرة ياحياتي خجولة …

Blue-Sky من البنات اللي كنت متحمسة مرة اقابلهم .. بس صراحه انصدمت… ما توقعت انو تكون البنت خجولة مرة .. بالكاد تتكلم .. وحتى جملها محسوبة وتفكر فيها قبل تقولها .. عكس بالمنتدى لما تكون منطلقة وتعبر عن رايها وحماسها :D…

عرفت ليه الحين تحطمت مرة لما جاها تقييم سلبي انو كلامها كثير

T O O F Y … هذي البنت انا خلاص حبيتها … شخصيتها بالطبيعة حلوة مثل ما هي بالمنتدى .. ويمكن اروع بعد... تلقائية طبيعية .. حولها طاقة ايجابية مريحه

LeLey و byakuya ماعندي تعليقات جديدة عليكم… الا ان byakuya كانت اقل توتر هالمرة .. المرة اللي قبل كنت احس من حولها شوي من التوتر.. هالمرة كانت اروق وطبيعيه اكثر

اظن تكلمت عن الكل ..

الحين بكتب عن البنات الللي تمنيت انو اشوفهم 😀

على راسهم خراب … انسانة ودي اشوفها واجلس معاها ..

MadNess .. كان فيه ترتيب انو نتقابل هالاسبوع بس ماكتب ربي.. من البنات اللي احسها هادية كثير بس حولها هالة كبيرة … مااعرف نوعها عشان كذا كنت ابي اشوفها 🙂

نجمها عالي .. بجد كنت متحمسه اشوفك يابنت :(…

Ponyo نفسي اشوفها وهي تتكلم عن انمي تشوفه … احس حماسها بيكون قريب من حماس مس كاندي.. وممكن يكون اكبر

.,justme,. كنت اتمنى اجلس معاك اكثر واتعرف عليك

Mera .. مع اني احسها ما تتعدى 15 سنة … لذلك ودي اعرف هل شخصيتها بالطبيعة تعطي هالانطباع او لا

G L O R Y.. قبل كنت احس شخصيتها لطيفة .. بس بعد ماتغير اليوزر تغيرت الشخصية 180 درجة .. وهالشي عطاني دفعه انو لااااااازم اشوفك ..

Rooga.. يعجبني هدوئها والجو اللي حولها .. ردودها هادية ورايقة

صِـبـا ,.. احس شخصيتها مثل خواتي الصغار.. وكنت ابي اشوفها بمكان يكونوا معاي خواتي

Darsy.. كان نفسي برضو اشوفها ..اسمها يذكرني برواية انجليزية .. كان اسم البطل بنفس اسمها .. كان عنده كبرياء قوي .. مدري ليه لما اشوفها احس شخصيتها فيها منه.. سوري توني احط اسمك لما شفتك اون لاين تذكرت.. انا وذاكرتي العبيطة اللي مدري وين بتوديني….

يصلح احط اسماء اولاد بعد؟؟؟

اذا يصلح بحط شخص واحد.. كابتن نامق

وهل يخفى القمر؟؟ yojimbo

الباقي اللي ماذكرتهم مو لاني مابي اشوفهم… بس ماصار بيني وبينهم مواقف

او ذاكرتي العبيطة ماسجلت شي لي معاهم .. مع الوقت لما اصير افضى شوي بتتغير قائمة الاشخاص اللي ابي اشوفهم وبجمع الظاهر كل بنات الانمي