يوميات باحثة (اليوم الأول)


هذي التدوينة على شرف نورة .. اللي من الظهر اسحب فيها

ولا قلت السالفة .. كل هذا عشان مااتعب نفسي اعيد هالهذرة اكثر من مرة 😀

من متطلبات رسالة الماجستير انو اطبق استبيان على معلمات التربية الفنية في مدينة الرياض، كان ممكن اختار انو ادارة التعليم توزع لي الاستبيانات او انا اوزعها بشكل يدوي… بما ان اغلب اللي قبلي نصحوني برفض الخيار الاول كان لابد انو انا اوزعها..

خذت كروكيات جميع المدارس المتوسطة في الرياض ورتبتها حسب الاحياء.. واليوم بدت رحلتي مع المدارس… توقعت ان المهمة بتكون سلسلة وهادية .. لكن اللي واجهني اليوم اقل ما يقال عنه انو العجب العجاب.. وهالشي خلاني اقرر ابدا هاليوميات واشارك الاشخاص من حولي الاشياء الغبية اللي تواجهني بكل يوم ..

اليوم الاول:

كان تخطيطي انو ابدا بحي الشفا لقربة من منطقتنا .. ولاني مرتبطه ارجع الساعة 11 اجيب خواتي من المدرسة ..

المدرسة الاولى دخلتها قبل دخول الطالبات للقاعات .. كعادة المدارس المتوسطة او كل المدارس، زحمه، مزعجة، فوضوية البنات في الساحة. قابلت المساعدة وكان اسلوبها حلو، وسلمت المعلمة الاستبيان ووضحت انو ماتقدر تعبيه الا بعد 9 لما يطلعون الطالبات من القاعة .. فكرت انو انتظر عندهم شوي لين تخلص واوفر على نفسي المشوار… لكن كان فيه ادارية نشبت لي بصراحه .. سؤال ورا سؤال … كانت اسئلة عامة بس حسيت انو لو استمر جالسه عندها بتبدا تدخل في الخصوصيات.. وبما انو انا شخص قليل الكلام  ابداااااااا ما رحبت باسألتها .. وقررت انو اطلع واروح مدرسة ثانية فيما تخلص مراقبة الفترة الاولى .. وهذا اللي صار

قبل انسى انا قلت انو المدرسة الاولى ماكان فيها استقبال؟ والغرفة اللي جلست فيها مالقوا لي كرسي زايد اجلس فيه … وكان فيه كنبة وحدة وانا واقفه جنبها جت مدرسة حامل تزاحمني عشان تجلس قبلي صراحه حسيت اني مع طالبات ابتدائي مو مدرسات …

ماعلينا خلونا نروح للمدرسة الثانية

لو كنت ادري وش راح يجيني بالمدرسة الثانية كان تحملت لقافة الادارية بالمدرسة الاولى ، المدرسة الثانية شكلا كانت افضل من الاولى .. وهذا واضح من الاثاث في غرفة الاستقبال..  قابلتني وحدة وسألتني ليه جاية وبعدين ارسلتني لوحدة ثانية .. اقل ما يمكن اقول عن هذي الثانية انو قمة البرود والتبلد .. صراحه شكيت انها كانت نايمة بمكتبها … طبعا هذي الشخصة هي المديرة .. عادت عليّ كل الاسئلة اللي سألتها المساعدة .. مسكت الخطاب بطرف اصابعها وقرته وبعدين رمته على الكنبة … !!

اقلها ياختي رجعيه لي مو ترمينه … قلت بنفسي حرمه كبيرة وشكلها مريضة مشيها لها .. سألتها عن مدرسة الفنية قالت عندها ملاحظة هاتي الاستبيان ونعطيه لها .. اسلوبها ماطمني .. قلت نادوها اعطيه اياها واطلع وارجع لكم بعد ساعة … واشوا نادوها .. مرت المعلمة على المديرة مدري وش قالت لها وجتني… عطيتها الاستبيان وانا ماسكه شنطتي بتغطى وبطلع ، الا تقول لا تروحين اجلسي بعبيه واعطيك اياه… انا استغربت بس قلت يابنت وش دخلك فيهم .. يتفقون بينهم .

المعلمة رفعت ضغطي وهي تعبي.. بعد كل فقرة تجلس تسولف.. وتلمح انو تبي واسطة عشان تدرس ماستر… نعنبوا ابوك لو عندي واسطة رحت اتوظف فيها عندهم مو اخليهم يقبلونك ماستر… وكل شوي لاقيه لها سالفة .. اخر شي سكتها وقلت لها لازم تعبين بدون ماتسأليني شي .. واستعجلي الله يعافيك وراي مدارس غيرك!

اشوا وقتها سكتت وركزت تجاوب بدون تسولف… بس وش صار؟!

جت وحدة مدري مين + المساعدة ومعاهم دفتر ريكورد ويقولون لمعلمة الفنية وقعي انك تأخرتي عن تسليم دفتر الدرجات … وخذ ياهواش بينهم .. المعلمة تقول خلصته بس ماخذوه والمساعدة تقول ماشفته لما دورته .. واللي معاها الدفتر تقول وقعي خليني اروح…والمعلمة معيه توقع ..

بعد تقريبا 7 دقايق هواش قررت المعلمة انها توقع .. واخيراااااا… بس الفرحة ماكملت .. ماخذنا دقيقة الا جت المديرة تهاوشها بنفس الموضوع الاول .. بس اشوا ماطولت..

بهالوقت كنت افكر بنفسي واقول الله يهديهم مايقدرون ينتظرون 10 دقايق لين اطلع ..؟ من الادب انو ماله داعي ينشرون غسيل بعض قدام وحدة غريبة عنهم واول مرة تزورهم …

وقتها قلت يابنت مابدهاش.. والف الطرحه واخذ برقعي والمح للمعلمة انو ترى تأخرتي عليّ .. واشوا خلصت واخيرا .. كان ودها تجلس تسولف بس شافتني قمت بروح وسكتت.. على طول رحت للغرفة الثانية اخذ ورقة خروج بطلع .. والمدرسة لحقتني مدري وش تبي… هناك لقينا المديرة .. مسترخيه على الكنبة .. انا احسبها منسدحه من كثر ماهي مسترخيه ..

اول ماشافتنا وتجلس تهوش بالمعلمة انو عندك مراقبة على قاعة ليه جلستي وتركتيها ومااعرف ايش…. انا رحت على جنب للكاتبه وقلت لها ابي ورقة خروج .. لان لاعت كبدي من قله ادبهم .. بس المديرة ما كان بخاطرها تخليني .. تركت معلمتهم والتفت عليّ .. وتسأل بكل وقاحه ليه خليت المعلمة تعبي الاستبيان وانا قايلة لهم انو بعطيها واطلع؟

قلت عاد مدرستهم تبي تعبيه تبيني اقول لا…؟ صراحه انا يناسبني انو اخلص من مدرستكم .. واذا عندكم مشاكل بادارتكم او بينكم وبين مدرستكم حلوها لما اطلع ..

بس ماش المديرة عقلها الظاهر فيه قوطي دهن.. الا مصرة تعيد كلامها .. قطعت كلامها وقلت شوفي.. ترى انا محترمه عمرك .. بس لو تزيدين ماراح احشم احد هنا .. لاني موظفة عندك ولا لي دخل بمشاكلكم.. وطلعت وتركتها ..
صراحه مالت عليهم هذولي فراشات كثير عليهم .. وشلون يمسكونهم مدارس ويربون عيالنا  <== شي بخاطري..

يوم طلعت وركبت السيارة جلست افكر بالموقف واكتشفت ان الغلط من المعلمة لانها كانت تماطل طول الوقت عشان ماترجع للقاعة لين طلعوا البنات .. واول ماسمعت اصواتهم خلصت الورقتين بالقاية اسرع من الاوراق الاولى.

بعد كذا رجعت للمدرسة الاولى .. ودخلت جلست 4 دقايق وجت المعلمة مبتسمه عطتني اوراقي ولما جيت اطلع الا ذيك الادارية اللي اسئلتها كثير تسألني لوين رحت .. قلت لها رقم المدرسة .. صارت تعرفهم .. وتسألني وش رايي فيهم .. حسيتها خبيثة تعرف شي وتبيني اقوله .. انا اختصرت عليها وقلت ماعجبني اللي شفته هناك.. حاولت تسأل بس وضحت لها انو ماابي اقول شي..

وطلعت من عندهم.

المدرسة الثالثة صراحه ابطينا على بال مالقيناها .. دخلنا كانت المديرة محترمه (عكس اللي قبل).. واسلوبها حلو .. حتى اختيارها للمواضيع اللي تكلمت فيها ممتاز .. اتوقع انها حجازية او من اهل المدينة .. لانو فيها لكنة خفيفة شبه مختفية… بس الاعجاب بهالمدرسة تبخر لما جت معلمة التربية الفنية .. كانت كبيرة بالسن .. يمكن بالخمسين او حولها .. ومن خريجات الكلية المتوسطة .. مو هنا المشكلة .. المشكلة انها جت وسحبت كرسي ولصقت فيني مرررررررررررررررررررررررة … فوق انو مااحب الاشخاص اللي مااعرفهم يقربون مني .. كانت هذي تفوح منها ريحه حمس بصل وطماط .. مدري وش طابخه على هالصبح الله يهديها .. اول ماشافت الاستبيان كان مبين عليها انو مافهمت كثير من اللي فيه .. وغصبت نفسي وعرضت عليها انو اجلس معاها اشرح لها العبارات.. بس هي كانت تبي تاخذه للبيت .. والله العالم هي بتعبيه او احد عيالها .. صراحه ماعاد يهمني لانو ابي اطلع بسرعه من المدرسة لان الريحه كتمتني .. وشوي وبدوخ عندهم ..

استأذنت وطلعت واكدت عليها انو راح امر علهيا بكرة الصبح من بدري…

رحنا للمدرسة الرابعه والاخيرة لهاليوم .. خصوصا انو اكتفينا ضيعان بالشفا .. هالمدرسة مبنى مستأجر.. ولما جيت كان البنات طلعوا وباقي عدد قليل… استقبلتني وحدة .. تقول انها مو المديرة .. وتستهبل بطريقة غبية وغريبة .. وصفت لي مكان غرفة المعلمات .. ورحت للمعلمة .. وضحت انو راح تطلع للبيت خلال ربع ساعة فالافضل انو اجي بكرة اخذه..

وانا طالعه مريت على الادارة عشان اسألهم اذا يبون نسخه من خطاب ادارة التعليم .. قابلتني وحدة ثانية .. وبطريقة غريبة بعد .. وشافت الخطاب واستغربت انو اعرض عليهم نسخه .. ولا تدري وش فايدتها … بس لما قلت لها انو المدارس الثانية خذوا نسخه راحت تصورة …
وخلصت اليوم الاول ..

ان شاء الله بكرة راح احط اليوم الثاني .. انتظروني

ان شاء الله انو يكون افضل من اليوم الاول


مصدر الصورة
http://88grzes.deviantart.com/art/Delivery-man-101645449
Advertisements

12 thoughts on “يوميات باحثة (اليوم الأول)

  1. الله يعييييييييينك من جد
    شي يحبط 😦
    يله معليش اللي اوله شرط اخره نور <<< مدري وش دخلها بس احس ودي اقولها XD
    قصدي يعني طريق العلم لازم فيه تعب ومن سلك طريق للعلم سهل له الله طريقا للجنة
    الله يوفقك ان شاء الله وتفرحين ونفرح معك بالشهادة
    وبكرة تذكرين وتضحكين 🙂

    وبانتظار باقي الحلقات بس المرة الجاية بجيب معي فشار لان كلها اكشن ^_^

    إعجاب

  2. رغم التضاد العجيب بين البرستيج والواقع
    الي يعيشون فيه المعلمات الى اني اعتقد ان الاغلبيه منهم يعانين من امراض نفسيه قهريه
    فلا تستغربي سيدتي ان تجدي مثل تلك المعلمات المتسلطات والمتوشحات وشاح قلة الادب وعدم الاحترام والتقدير
    وهذا مالمسته من زياراتك لهذا اليوم الذي يعد يوم اكشن بجميع فصوله
    تحلي بالصبر فهناك امور كثيره راح تواجهك
    بس مثل حقت الكشنه ما اعتقد انك بتشوفين
    في انتظار المزيد من حلاقات زياراتك
    وكان الله في عونك

    إعجاب

    1. منور المدونة …
      انا بالبداية صراحه انقهرت .. بس بعد خمس دقايق بديت اشوف الموضوع من ناحية المرح .. عشان اقدر اكمل الباقي… خصوصا انو باقي لي كثير

      إعجاب

  3. هلا غدو

    شخبارك

    وش ذاااااااااااااااااااااااااا

    بصراحه ماادري وش اقول

    كنت متوقعه اني باقراء سطر وبس

    لكن على كل المشاكل الي صارت

    احييك على ابداعك

    ********************************

    بخصوص الاستبيان

    الله يعينك يارب ويجعل الي تسوينه كفاره واحتسبيه اجر في سبيل طلب العلم

    ودايم ادعي الله يسهل لك ويسخر لك عباده

    يارب ما يطلوبون مني استبيان مثلكم كان انتحر

    موفقه يارب وفي انتظار المزيد

    إعجاب

    1. منورة ياقلبي…
      مابي احطمك بس اذا رسالة بيكون فيه استبيان ..
      بس اتوقع اقسام ادارة الاعمال مافيها استبيانات
      اظن انو مشاريع

      الله يوفقك ويسخرهم لك… وتسلمين على دعواتك

      إعجاب

  4. اهليييين ياحلوه مغامره رهيييبه ربي يعيييينك من جد
    مرا تحمسسسست لليوميات وراح تشوفيني اشكال وانواع خخخ
    اهم شي ام البصل وش تحس فيه من الصبح خخخ =/

    ربي يعيينك والله (L)
    متابعه لك ياحلوة =)

    إعجاب

  5. يومياتك تحفه ….

    سبحان الله مدرسات المدارس عمرهم ما يتغيروا و ما أعرف ليش الدنيا كلها تطورت الا هم …

    أنا خريجة ثانويه من عام 92 و اليوم احنا2010 …

    هذه السنه أختي دخلت بنتها للمدرسه …. و رحعت توصف وصف و الله مو قادره أستوهب …. فضلوا زي ماهم … ما تغيروا لا في اللبس و لا في السلوكيات ….

    من ضمن المواقف اللي صارت لي …. قابلت وكيلة مدرستنا أيام الثانويه … و كانت شخصيه متسلطه و مكروه من الكل …. قابتها في مؤتمر … طبعا ما عرفتني … رحت لعندها و عرفتها على نفسي … طبعا ما أهتمت … و بعد ما سيبتها … تفجأت أنها تنظر لي نظرات مخيفه … سبحان الله عكس أستاذة الانجليزي في الجامعه لما قابلتني و عرفت أن وصلت لمنصب مرموق … و الله فرحت في لدرجة أنها أخذتني و خلت كل أصحابها يشوفوني …. و تقول لهم هذه كانت تدرس عندي …

    الفرق في ردة الفعل أكيد له دور بأخلاقيات كل واحده … الوكيله اللي عمرها ما حبت أحد صعب أنها تفرح لطالبه … عكس الأستاذة الجامعيه لأنها تعتبر كل طالبه زي أختها و بنتها فرحت لما عرفت ذا …

    ما أبغى أعمم كلامي … أكيد في معلمات رائعات و لكن ضائعات وسط الكم السيئ ….

    بالتوفيق ….

    إعجاب

    1. تعرفي
      انا رحت المتوسطة اللي درست فيها .. وشفت مدرساتي باقي ماشاء الله يدرسون .. بس مافكرت ولا للحظة انو اعرفهم بنفسي.. لاني عارفة انو اقصى تفكيرهم بقولون ((يوه كبرتينا)) فحشمت نفسي وحاولت مااقول لهم شي
      حبيتهم يظلوا بذاكرتي بصورتهم الرائعة اللي تعودت عليها بدون مايشوهها او يخدشها اي شي

      صراحه موقفك مع مدرستك يقهر ويحزن… بس حلو مع دكتورتك بالجامعة .. اول شي فكرت فيه انك جيتي لها عشان تفخر انك كنتي من طالباتها .. وفكرت انو شي حلو تستعرض فيه قدام صاحباتها وزميلاتها .. انو طالبة من اللي درستهم عندها مثل هالطموح

      ان شاء الله يكونوا كل معلمينا ومعلماتنا بهالصورة المشرفة

      إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s