يوميات باحثة ][اليوم الثاني][


بسم الله الرحمن الرحيم ..

اليوم اتجهت الصباح للجولة على المدارس وانا بصراحه متخوفة .. فبعد اللي شفته امس المفروض اتوقع اي شي يصير اليوم .. بس الحمد لله ربي رحمني اليوم وتسهلت المهمة ، وماصار اي شي غريب…

بالبداية مريت على المدرستين اللي امس مااستلمت منهم الاستبيانات … اول مدرسة انتظرت كثير عندهم .. وكانوا المدرسات يدخلون ويطلعون للادارة عشان التوقيع .. لكن للاسف كل وحدة منهم شافتني متواجده ومع كذا كان اختيارهم للمواضيع اللي يتكلمون عنها مو كويس ابدا .. اول شي قعدوا يحشون بالطالبات .. ويذكرون بعض العيوب والمشاكل… وبعدين جلسوا يتناقشون عن الملل اثناء المراقبة .. والمضحك انو معلمتين جلسوا على الكنبة اللي جنبي ويتكلمون بصوت واطي عني.. مع انهم عارفين انو ممكن اسمعهم .. صدق اني كنت اقرا كتاب في الايبود بس مو معناها انو مااسمع .. تركت الايبود والتفت اناظرهم عشان يعرفون انو هالتصرف ابدا غير مقبول .. الكبيرة منهم استحت على دمها وقالت للثانية اسأليها لا تسأليني…

انا اخبر انو اذا موجود بالغرفة شخص غريب او كبير يفترض انو ماتعطينه ظهرك .. او حتى تنحنين قدامه الا اذا مافيه اي طريقة تتلافين فيها هالشي.. وبرضو تقدمين الاعتذار قبل تسوين هالشي… هالمدرسة مدرساتهم مايعرفون هالشي.. لان المدرسة اللي جلست جنبي بالكنبة اللي على نفس جدار الكنبة اللي انا جالسه عليها على طول لفت على المدرسة اللي جنبها وعطتني ظهرها … مع العلم انو فيه كرسي فاضي جنب هالمعلمة وكان ممكن انها تجلس على الكرسي البعيد عني وتلتفت على صاحبتها بدون ماتعطيني ظهرها … بس مااقول الا الله يخلف على الطالبات اللي انتوا تعلمونهم الادب والاحترام.

الغريب ان كل المدرستين وانا طالعة منهم قابلني كم كبيررررررررررر من الاكل عند الباب المستخدمه كانت تدخله ..

صراحه اللي يشوف الاكل يتوقع ان الوليمه لتقريبا 100- 150 شخص.. بس انا متأكدة ان هالمدرسة صغيرة والموظفات عددهم قليل .. فاستغربت بقوة من كم هالاكل ..

الله يرحم ايام ماكنت موظفة .. كانت المديرة تهاوشني تقول عندك 4 حصص باليوم فاضية فيها وش تسوين؟ والحقيقة انو حصتين من هالاربع اكون ارتب الادوات والاغراض للبنات خصوصا انو ماعندي غرفة رسم فاضطر اشيل اغراضي بين الفصول، وكذلك اشيل اغراض البنات من صلصال وكرسات والوان… الحصتين الباقية وحدة تكون قريب من الظهر فاصلي فيها :(… والثانية احاول انها تكون قريب من الفسحه عشان افطر فيها او اريح شوي… وهي حاسدتني على هالحصص.. ماتدري انو اغلب الايام مايمدي اكمل فطوري لانه تطلع لي حصص احتياط او اشغال ماادري من وين جت…

الله بس يرحم معلمات الفنية في المدارس الخاصة ..

بعد ماطلعت من هالمدرستين مريت على الثالثة.. اول مادخلت استغربت انو الحوش فاااااااااااضي مافيه ولا نتفة عباية او شنطة او كتاب.. ولو بالغلط… ومع الغبار اليوم حسيت ان المدرسة مهجورة .. برضو كان الحارس عند الباب ماله دخل والباب مفتاحه من جوا .. وفيه موظفة مسؤوله عن الباب .. لما سألتها ليه المدرسة فاضية قالت انو مانخلي البنات يجلسون برا .. كلهم بالساحة الداخلية عشان يسمعون الجرس..

حسيت عندهم نوع من التنظيم .. اول مدرسة تعجبني من كل النواحي.. ولا ترتاعون ماخربت مدرسة الفنية احساسي هذا 😀 لاني لما رحت للمديرة خبرتني انو ماعندهم مدرسة .. مدرستهم في اجازة امومه وكان عندهم وحدة منتدبه وراحت اول ماخلصت المنهج..

وطلعت من المدرسة متجهه للمدرسة الرابعه .. صراحه شوي اليوم ذاكرتي مشوشة بخصوص المدارس .. ماقدرت اتذكرها بالترتيب مثل اليوم اللي قبل.. احس انو بسبب قل النوم :(.. الايام الماضية ماكنت احصل الا على اقل من ساعة نوم باللليل واربع ساعات العصر… فاليوم انمسحت ذاكرتي بقوة ..

بحاول اذكر الباقي بس بدون ترتيب:D

المدرسة الرابعه لما جيت ادخل الحارس رفض وبقوة انه يدخلني .. ويستفسر وش عندي.. ولا اقتنع لما قلت له انو معي خطاب من ادارة التعليم .. حسيت اني مضطرة اطلع له الخطاب يشوفه عشان يتأكد:D… وقال اصبري بكلم المديرة .. وكلمها ولا اقتنعت بكلامه عطاني السماعة اكلمها .. صراحه مررررررة استغربت من هالنظام .. يعني مهما كان هذي مدرسة .. لو اني موجهه او ام ابي اجي اسأل عن بنتي لازم هالتحقيق اللي عند الباب… الواحد يحس انو داخل دار احداث او سجن .. مو كأنها مدرسة حكومية عامة…

وياليتني يوم دخلت استفدت .. كان مدرستهم برضو في اجازة امومه!!

في الوقت اللي دخلت فيه ابوي استفسر من الحارس عن هالتعقيد.. وقال انو يجيهم مندوبات بنوك ومسوقات و((خطابات))، ومايبون كل من هب ودب يدخل المدرسة ..

ماادري صراحه هل الوم المديرة او المجتمع اللي يشوف ان المدرسة المتوسطة ممكن اي احد يدخل لها .. ومن ناحية البنوك احسه عادي خلوها تدخل .. على الاقل المدرسات يختلطون بمجتمع غير مجتمعهم:p

المدرسة الخامسة .. كانت المديرة جدا ذوق ومحترمه .. شافت الخطاب واستأذنت انو تروح تصورة .. ياااه بغيت اقولها ياختي تعالي عطي باقي المديرات شوي:(… وبعدها خذتني لمدرسة الفنية … هالمدرسة الله يهديها كانت مرتابه اكثر من اللازم. سألتني وش بيصير للاستبيان لما تعبيه .. وهل يفيدها او يضرها في التدريس.. وهل نتائجه ترفع للادارة .. وبعد مااكدت لها ان مهمتها تنتهي لما تسلمه لي وابدا ماراح ارجع لها او حتى اعلن نتيجه الاستبيان سألتني اذا ممكن انها تخلي الاستبيان بدون اسم:D… وضحت لها ان الاسم اختياري اذا تبي تعبيه او تتركه .

فيما هي كانت تعبي جلست جنبي مدرسة دين وبدت تسألني عن الدراسة ونظام الماجستير .. مع ان اسألتها توجهت لي امس .. بس مالقيت نفسي اتحفظ وانا اجاوب عليها .. كان اسلوبها راقي وحريص وهي تسأل .. ماحاولت تتدخل باشياء خاصة.. كان اغلب اسئلتها عامة ….. حتى لما وصلنا لنقطة كيف التسجيل والالتحاق على طول هي اختصرت وقالت اكيد انو تلقى معلومات بموقع الجامعة او لو راحت لهم…

المدرسة الخامسة مافيها اي شي مميز.. وكانت مدرستهم في اجازة امومه ..

المدرسة السادسة .. برضو مدرستهم في اجازة امومه .. قبل مااطلع حلفت المديرة الا تضيفني فنجال قهوة .. وانا جالسه بدت بحديث صراحه اقل ما يقال عنه انو مو لائق… صدق اسلوبها حلو بس الموضوع ابدا مو مناسب.. لانو كانت تقول المفروض حصة التربية الفنية مرة بالشهر .. وانها شي مو مهم، واذا احد من الطالبات مهتمه بالفنية ممكن تدخل المعهد المهني… حسيت انو هي مو مقتنعه ان الطالب لازم يكون عنده هواية بالاضافة الى المهاراة ..

هذا الموضوع خلاني اشرح لها اهمية الفنية لطالب المتوسط والثانوي والابتدائي… وجبت لها دلائل تربوية ونفسيه لاهمية المادة .. ومحد يدري كثر معلمات التربية الفنية قد ايش هالموضوع ممل ومتعب ..

ماعلينا .. خلصت جولة اليوم بدري.. ماجت الساعة 10 الا انا بالبيت

وان شاء الله بكرة بتكون الجولة حولنا وحوالينا في البديعه والسويدي.. عشان يمدي اجيب خواتي من المدرسة .. لان اليوم لما رحت لهم لقيتهم راحوا مع الباص:(..

بالاضافة انو باقي كذا منطقة من الشفا بعيدة .. ولا يمدي اغطي اكثر من مدرستين باليوم لو قررت اروح لها .. عشان كذا بتركها للترم الثاني لما يكون الدوام طويل ويستاهل الواحد يروح مشاوير بعيدة

ما يستفاد من جولتي في منطقة الشفا:

1- مديرة المدرسة عنوان للنوع المدرسة اللي الواحد داخل لها .. اذا كانت من نوعيه المديرة المسترخيه اللي امس ادروا ان المدرسة رايحه فيها .. اما اذا من نوعية المؤدبة المحترمه اليوم معناها ان المدرسات بيكونوا على نفس النمط

2- اغلب المدرسات ما يعرفون يختارون نوع الحديث اللي ممكن يتشاركونه في حضرة شخص غريب

3- كمجتمع نحتاج وعي اكبر بطريقة توجيه الاسئلة لشخص مانعرفه بدون ما نضايقه

4- تحتاج المعلمات في النظر مرة ثانية في سلوكياتهم ويعرفون انو فيه مراتب اعلى منهم سواء بالعمل او بالتعليم او بالعمر.. لان اغلب اللي شفتهم امس واليوم كانوا يحسون كونهم في سلك التعليم فهم احسن شي

5- هالنقطة امي دايم ترددها بس بجد تأكدت منها اليوم .. المدرسات مفرطات بالاكل .. سواء من ناحية طبخ يجيبونه من البيت او طلب من المطاعم..

ان شاء الله المدارس الجاية تغير نظرتي هذي:(

مصدر الصورة
http://nasimo.deviantart.com/art/perfektna-krasota-77205431
Advertisements

10 thoughts on “يوميات باحثة ][اليوم الثاني][

  1. السلام عليكم
    كيفك ياقمر؟
    بصراحه لماشفت اعلانك عن مدونتك بالماسنجر اتحمست اقراها
    تعجبني كتابتك و اساوبك شيق و ممتع ماشاء الله
    اليوم الاول كان بجد اكشن بعكس الثاني هادي تقريباً
    اتخيلي نفسك ي مسلسل انتي بطلته
    حسيت و انا اقرأ انك مدركه للي يدور حولك كأنك تقصين فلم انتي فيه و هذا الشي عجبني و شدني اكثر للقراءه وحسيت كأني معاك
    كمان اللي صار معاك قريب لحاجات شفتها و لمستها في مدارسنا للأسف و خصوصاً الحكومي من خلال حضوري للدورات
    فعلاً لحضت انو معلمات الحكومي اسوأ تعاملاً من الاهلي… مو عارفه ليه
    لكن مو الكل طبعاً.. ما انكر انو فيه مجموعه كبيره منهم ذوق و اخلاق

    واصلي و الله معاك 🙂

    * سأكون من المتابعين لك في مسيرتك فأرجوا ان لاتكون ردودي ثقيله عليكي… و دمتي

    إعجاب

    1. والله هو للاسف هذا هو الواقع… بس يمكن لما انا اكتب واستنكر الوضع .. ويجي احد غيري يستنكر يكبر الموضوع ويوقفون المدرسات وقفه مع انفسهم ويبدون يشوفون نظرة الناس لهم ويحاولون يعدلون منوضعهم المزري……

      منورة المدونة وتعالي كل ابو دايم وعلقي مثل ماتبين

      إعجاب

  2. الحمد لله اليوم يومك اروق من امس
    بس لاحظت انه بدت تطلع لك مشكلة ان بعضهم في اجازات امومة..
    والبديلات ماجلسو فترة الامتحانات..
    فيمكن هذي من سلبيات انك بديتي في هالفترة..

    ومع هذا قطعتي شوط مهم وبدت الاستبيانات عندك تتجمع 🙂
    وحبة حبة تزيد المحبة 🙂
    وفوق غايتك من الجولة هذي اشوف انك استفدتي من نواحي ثانية وافدتينا معاك..

    متابعة وبقوة وبالتوفيق (F)

    إعجاب

    1. ايه صراحه استغربت هالعدد من اجازات الامومة .. والله يتستر من الباقي..
      ابوي امس يسألني انو اللي باجازة امومه مانرجع لهم الترم الثاني؟؟
      قلت لا .. الله يعافيهم ريحوا وارتاحوا …

      ان شاء الله بفترة قصيرة يمدي اجمع الـ 300

      وخلك قريبة دايم;)

      إعجاب

  3. واضح من جولتك لهذا اليوم انك انسجمتي بشكل ملفت وهذا يدل على انك تملكين بعد نظر وسيطره تامه على افعالك
    ومن هنا راح تكون الايامه الجايه اسهل من الي قبلها والسبب انك شفتي عينات سيئه جدا في بداية جولتك والحين بديتي تشوفين العكس حتى لو كان من منظورك الخاص
    استمري في سرد معاناتك وراح ندعمك بكل الردود
    لكن كلي ثقه انها راح تزيدك اصرار وتقدم

    إعجاب

    1. والله بديت اعد نفسي الصبح قبل اطلع انو راح اشوف اي شي… عشان اقدر تقبل اللي يصير قدامي..
      وبيني وبينك انو هذا شي انا توقعت انو اشوفه .. بس اللي ماتوقعته انو اشوفه باول يوم:(…
      او على الاقل انهم يجاملون وجود شخص غريب بينهم .. بس للاسف طلعوا ينقصهم بعض الانضباط والاداب العامة

      منور المدونة

      إعجاب

  4. ياحبي لك
    صرنا مشتركات بنفس التخصص
    ان شاء الله انقبل ماستر هالسنه واسوي لي يوميات زيك خخخخ

    الله يعينك يارب
    انا جربت نفس تجربتك بس بطريقتين مختلفيتن
    لما كنت مسؤوله عن توزيع طالبات التربيه العملي في المدارس وطريقه تعامل الادارات
    والمره الثانيه لما صرت مشرفه على طالبات التدريب كيف استقبال الاداره لي في كل مدرسه اروح لها
    لذلك ما استغربت ابدا المواقف اللي حصلت لك ههههه

    موفقه ياعسل

    إعجاب

    1. اذا انقبلتي وحبيتي تسألين اي شي لا تستحين .. لانو بجد انا ضعت باول سنة .. واستفدنا كثير من الطالبات القديمات .. سهلوا علينا كثير من المهمات.. الله يعافيهم ويسخر لهم وين ماكانوا

      بخصوص المدارس الله يتسر بس… انا متشائمة من السويدي واحس انو بشوف هناك عقليات غير شكل .. لانو اعرف هالمنطقة زين .. الليه يستر بس وتمر باقي الايام عندهم على خير

      منورة ياقلبو المدونة

      إعجاب

  5. ما راح أضيف على اللي قالوه الأخوات ….

    فعلا بدأتي تتأقلمي مع الجو ,,,,

    أما من ناحية فتح مواضيع مناسبه مع شخص غريب … أعتقد المجتمع كله بحاجة لهذه المهارة

    أسلوبك روعه واصلي …

    إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s