يوميات باحثة ][اليوم الثالث][


اليوم الجولة كانت في مدارس الغرب… تحديدا السويدي الغربي وظهره البديعة.

بهالجولة بدت تتأكد بعض الاشياء اللي استنتجتها من اليومين الماضية

اليوم اليوميات قصيرة لسبب انو قررت ماانتظر بالمدارس… اسلم اوراقي واطلع وارجع استلمها بعدين .. اول مدرسة كانت مبنى مستأجر ولما وصلت كانت باقي المدرسة ماجت من بيتهم .. لما وصلت وحدة من المراقبات حسيت انو قد شفتها .. بس مو متذكرة وين .. وهي كانت تناظرني.. وبعد شوي سألت من انا ووش عندي .. لانو وقت ماعرفت بنفسي ماكانت موجودة ..

كانت مصرة انها سبق وشافتني.. انا دورتها براسي شوي .. قلت لو اعترفت لها انو انا احس نفس الشي بدخل بدوامه من الاسئلة لها بداية مالها نهاية .. بتسألني عن اعمامي وخوالي ومن مناسبين ووين ساكنين..و..و..,… وانا سبق قلت انو ماني من النوع اللي احب توافه الحديث واللي فيها تنبيش عن اصول الاشخاص .. لذلك اكتفيت انو اقولها (يمكن شفتيني)… وهي فهمت انو مابي اتعمق فطنشت الموضوع… واشوا انها كان من النوع اللي يفهم بالتلميح

جت معلمتهم قبل المديرة وعطيتها الاستبيان .. لما جت المديرة ووريتها الخطاب من ادارة التعليم .. سوت حركة بجد غريبة .. سألتني ليه الخطاب مو مثبت مع الاستبيان…؟ وليه ماصورت نسخه خاصة فيهم .. لانو قلت لها صوروه ورجعوه لي…

بغيت اقولها ترى ماني مكلفة بمدارس الحكومة .. كل مدرسة حاطين فيها الة تصوير الله يعزهم وانتي مستخسرة تصورينه؟؟ وبعدين انا مصورة 300 استبيان او اكثر وتبيني اصور لكم الخطاب بعد 300 صورة ؟؟!!

بجد ناس يحبون الروتين وتعقيد الامور..

انا اختصرت الامور وقلت لها لو ان الوزارة موزعينه لكم يرسلون نسخه خاصة من الخطاب لكم .. بس طالما انا جاية مايحتاج.. تبون نسخه صوروه .. ماتبون رجعوا لي نسختي… 😀

وصوره ورجعوا النسخه وطلعت من عندهم … وانا طالعه واجهني منظر صراحه بديت اتعود عليه … صحون وكراتين وحافظات وكذا ترمس قهوة .. حسيت انهم طالعين كشته مو جايين دوام رسمي وعندهم اعمال… ليه كذا ياربي… ليه كميات الاكل الكبيرة:(

وطلعنا ورحنا ندور مدرسة تحفيظ قرآن بنفس المنطقة .. وندور وندور وندور .. ونسأل كل من قابلناه .. بس ماش محد يدري وين هالمدرسة .. واخيراااااا لقيناها بس كان فيه صدمه تنتظرنا…

المبنى شكله كان مدرسة لانو باقي آثار المدارس من اعلانات دورات ونقل .. والباقي المعروف… بس شكلهم انتقلوا من المكان… يعني ضاع علينا نص ساعة تدوير على الفاضي:(

المدرسة اللي بعدها كان حارسهم غريب… بس الظاهر هذي ميزة بحراس المدارس.. لازم يحقق من انتي ووش تعبين ومن وين جايه ووش بتسوين …. الخ… حتى يأشر لابوي بالسيارة مايروح، يعني تراها بترجع تركب معاك مهيب داخله ..!

بس اشوا دخلنا بدون ماياخذ اذن من  المديرة ..

هالمدرسة واخيرااااااااااااااااا لقينا عندهم مدرستين .. وحدة منهم مي تخصص بس المهم انهم ثنتين .. بديت اتحطم من كون بكل مدرسة مدرسة وحدة .. وحسيت انو مابيمديني اخلص ولا نص العدد على هالحالة.. بس الحمد لله ماضاع صبري

شرحت لها طريقة التعبئة وطلعت .. لان توبه اجلس باي مدرسة ..

المدرسة اللي بعدها رهيبة ارهب شي بالدنيا .. ادارة ومدرسات وكل شي .. بعد لو يحطونهم في مبنى حكومي بتكون قمة … جيت وجلست بلحالي يمكن 10 دقايق.. شكل مديرتهم رايحه تمر على القاعات .. ومع انو مر اكثر من موظفة من عندي محد سألني شي او تلقف باسئلة مالها داعي… بس سلموا عليّ واستأذنوا .. لما جت المديرة كان شكلها مرتب وكاشخه .. صراحه بعض المدرسات احسهم مايعرفون الفرق بين مكياج صباحي او مسائي.. بس هذي شكلها مرتب…

خذت الاستبيان وعبت بعض الاشياء اللي هي تعرفها ولما قلت لها بترك الاستبيان وارجع بعدين رفضت .. قالت يمدي المدرسة تعبي الاستبيان لان اغلب القاعات الحين طلعوا الطالبات.. وجلست عندها بالوقت اللي المدرسة تعبي الاستبيان ..

كان اسلوبها بالكلام حلو والمواضيع مناسبة وعامة .. شوي دخلت معلمتين عليها .. وكانوا يتكلمون عن زيارة سووها امس نيابة عن المدرسة .. انا توقعت انهم راحوا لوحدة من المدرسات او الموجهات .. بس لما طلعوا خبرتني المديرة انو هم رايحين يعزون وحدة من الطالبات ابوها توفى في بداية الاختبارات .. وانهم راحوا امس المدرسات لها عشان يحسسونها ان ادارة المدرسة تهتم فيها وبالامور الشخصية الخاصة فيها مو بس علاقتهم مقتصره على المدرسة .. وانو لازم البنت تحس بالراحه بالمدرسة وانهم بالهم عليها … عاد المديرة ماامداها تروح امس وبتكلم الام اليوم تتطمن عليها ..

انا بصراحه حسيت اني فهيت شوي .. اسلوبها وكلامها وتفكيرها جدا رائع… يوم شفتها تقول كذا حاولت بالمواضيع الجاية انو اجس نبض اذا ترضى تنقل خواتي عندها .. كيف ان المدرسة بعيدة اهم شي انهم يكونوا في بيئة صحية .. مو مدرستهم اللي مدري وش تبي من الحياة ..

بس والله يبي لي اشوف طريقة اقنعها .. لانها وضحت انو بعض المدارس الاعداد فيها كبيرة ، وشكلها فهمت تلميحي ولمحت لي بالرفض بطريقة مؤدبة:D

بعد ماطلعنا من هالمدرسة كانت الساعة تقريبا 9 وخواتي يطلعون 9:30… ماكان فيه مجال نجلس ندور مدرسة فاتصرناها ورحنا لمتوسطة في السويدي كنت ادرس فيها ..

ادري انو قديمة مرة بس كانت موجودة ضمن الخطة وقدمناها شوي عشان الوقت

لما دخلت كان شكل المدرسة وكل شي تقريبا ماتغير… بس لما دخلت لقيتهم مغطين سقف الساحة الداخلية :(… كانت وهي مفتوحه حلوة خصوصا لما تدخل الشمس لجوا .. الحين صاير داخل المدرسة مرة مكتوم لانو مافيه تهوية .. بس اتوقع ان التغطية عشان يعطون مساحه اكبر للطابات في الصيف خصوصا انهم قاطعين نص المساحات اللي برا وحاجرين البنات في الجزء الامامي من المدرسة ..

سلمت استبياناتي للمعلمتين اللي عندهم وطلعت .. وانا عند الباب شفت مدرسة درستني وانا في المتوسطة… ادري انها صدمة كبيرة انو الى الان باقي تدرس بعد اكثر من 10 سنوات .. صراحه عجزت اتذكر ايش تدرس بس شكلها من المدرسات اللي مااهتميت فيهم بذاك الوقت لاني عجزت اتذكر اي مادة تدرس:d

وانا خلصت شرح للمعلمة كيف تعبي الاستبيان جت وحدة دخلت عرض .. وقفت بينا وجلست تطل بوجهي .. وبعدين قالت تراهم مشغولين مرة .. خلي اللي عندك لي نهاية الاختبارات .. ترى مرة ماعندهم وقت ومااعرف ايش.. انا ناظرتها وقلت اليوم اربعاء وبكرة خميس.. تاخذه البيت تعبيه مو شرط بالمدرسة .. قالت لا كيفها بالبيت تسوي اللي تبي تسويه متى مافضت بالمدرسة … بديت احقد عليها .. الحين المدرسة ماقالت شي وانتي ناطله وجهك وتقولين انها مو فاضية .. !

اشوا ان مدرسة الفنية اختصرت النقاش وقالت ان الاستبيان سهل ويمديها تعبيه بالبيت

اخر مدرسة مريت عليها كانت المتعوسة مدرسة خواتي… طبعا ماعندهم مديرة .. لما دخلت وسألت وين المديرة نطت وحدة وقالت (انا انا انا.. وش تبين) حسيت كأني سألتها من تبي تصير المديرة :D… رحت لمدرستهم وعطيتها الاستبيان وخذيت خواتي ورحنا للبيت ..

صراحه اليوم احس انو صرت متقبله اكثر للي يصير مو مثل اول يوم .. نفسيا متهيأه لكل شي.. ومتوقعه الاسوء.. ماعاد استغرب من الاكل الكثير.. او الاسلوب الجاف لتعامل المعلمات مع الطالبات .. بس يبي لي اتعود انو فيه مدرسات ومديرات اسلوبهم قمة مع الطالبات.. وان شاء الله اشوف كثير منهم قريب

مصدر الصورة
http://gilad.deviantart.com/art/A-slice-of-life-64298703
Advertisements

4 thoughts on “يوميات باحثة ][اليوم الثالث][

  1. بصراحه من زمان ودي اتكلم او اكتب بمعنى اصح عن وضع معظم المعلمات عندنا ..

    جدا يؤسفني وضعهم ..ثقافتهم محدودة وتشمل المواضيع اللي تجري عندهم بالمدرسة فقط ..او الاكلات

    لا يوجد لديهم رغبة بالتجديد ..او الابتكار أو التطوير ..هدفهم الاول هو كسب المال بأقل مجهود ممكن..

    كنت كل ما اروح مدرسة الاحظ المواضيع المطروحة كلها ..حش وخناق ومشاكل ..

    انا كان عندي فضول استفسر عن هالموضوع ..سالت وحده صاحبتي معلمة ..ليه كذا قالت لي اول ما توظفت كنت جدا متحمسه وعندي افكار وطموح ..لكن انصدمت بكم الاشياء المطلوبه من المعلمه ..والمسؤليات اللي على عاتقها ..تقول ..يكون عندي 6 حصص باليوم ما ادري الي اللي داخلة علي وحده تقول عندك احتياط WTF وتحضير ومناوبة بالفسحة ومدري وشو ..وصلحوا اذاعه ..ليه ما يحطون انسانه وظيفتها هالشياء الجانبية اللي وجودها مهم للطالبه ..لكنه ليس من اختصاص المعلمه ..

    فتقول صرت اسكت وما اسولف مع احد عشان احافظ على قواي العقليه ..ولما اجلس معهم على طول احطال i pod عشان يوصلهم اني ما ابي احكي ..

    وحاليا قررت ترك تللك المدرسه والانتقال لمدرسه اخرى علها تجد فيها من يدعم طموحها

    اعجبتني مدونتك جدا keep it up

    إعجاب

    1. اليوم اتكلم مع مديرة مدرسة ماشا ءالله تحسينها فاهمه وتفكيرها
      مرة متفتح.. وتقول انو من خبرتها المدرسات اول ماتتعين تكون
      متحمسه للشغل والابداع.. وبعد كم سنه تصير ربة بيت نموذجيه
      همها بيتها والاكل والسوالف… واخر شي تفكر فيه عملها وطالباتها

      الوضع مزري بين المدرسات سواء بالاهلي او الحكومي.. بس
      احس برضو احنا نتحمل جزء من هالمسؤولية .. لانو ماكنا صريحين
      معاهم ووضحنا الغلط لهم .. بالاضافة انو نحبط من سلوكهم وبعد
      فترة من الوقت نتراجع عنهم ونبدا نصير زيهم..
      ليه مانظل على نفس الحماس والابداع.؟
      خصوصا انو مانفكر بالمردود من هالشي.. انتي تبدعين لانك تحبين
      انتاجك يكون بأفضل صورة .. وبرضو تبدعين عشان الطالبة اللي
      تدرسينها تستمتع بالمادة اللي تدرسينها .. مو بس تحفظ
      وتنجح وتنتهي علاقتك فيها ..

      ومنورة المدونة .. واكيد تواجدكم وتعليقاتكم تعطي المدونة
      بعض من الحياة وتزينها باحلى الصور

      إعجاب

  2. والله حلو بعد يومين بس لقيتي مدرسة نموذجية :d
    معناتها ان الدنيا لسه بخير 🙂

    متابعين معك قلبا وقالبا (F)

    إعجاب

    1. ابشرك بدا العدد يزيد للمدرسات النموذجيات .. وبرضو
      بدت تطلع نماذج المدرسات اللي تداوم عشان السوالف
      وسعه الصدر:D

      لازم من كل شي حبه عشان التوازن:D

      إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s