يوميات باحثة ][اليوم الخامس والسادس][


للاسف ماكتبت وش صار باليوم الخامس لانو راحت علي نومه ..وماصحيت الا متأخر.. حدي وقتها ارتب جدول المدارس لبكرة واشوف وش سويت باليوم اللي قبل.. فقررت انو ادمجهم مع بعض… خصوصا انو ماصار شي كثير بس عبارة عن فقرات لفتت نظري وراح ادرجها بشكل نقاط وأعلق عليها …

امس كنت اتخيل انو بارد ومالي نفس اطلع من البيت .. بس اليوم كان فوق التخيل… طبعا شايفين درجة الحرارة من الايبود الساعة 6 ولكن رجعت درجة الحرارة انخفضت اكثر ووصلت 2-

صراحه مع هاليوم البارد صارت الست درجات لامس ارحم من اليوم

قبل مااتكلم عن اليوم خلني اتكلم عن بعض الاشياء اللي صارت امس…

طبعا ومازال مسلسل الروتين مستمر من المديرات .. ماني فاهمه هل هم مقيدين لهالدرجة بالتعاميم ومافيه اي مكان انهم يفكرون او يتخذون اي قرار من انفسهم؟؟ او هم شخصيتهم سلبية وغير متقبله تسوي اي شي من نفسها ؟؟

لكن فيه وحدة من المديرات ماشاء الله عليها تفكيرها جدا متطور..  جلست تناقش معاي بعض الاشياء خاصة بالتربية الفنية، ويبدو انها حابة المادة ومقتنعه ومؤمنه انو هالمادة لها اهميتها الكبيرة للطالبة بس للأسف تشوف تقصير كبير من المعلمات في هالشي ..

برضو قالت جمله عن المعلمات صراحه ضحكتني شوي.. تقول المعلمة كل مازادت خبرتها كل ما صارت ربة بيت اكثر من كونها معلمة .. ويصير مو اهتمامها عملها والتدريس.. تجي بس تغير جو ولانو صار عادة .. بس خلاص الابداع عندها خمد.

كلامها هذا ذكرني ببحث سوته وحدة من الطالبات في اول سنة بالماستر.. كان عن استخدام الخامات والادوات في تدريس التربية الفنية.. وكانت النتيجه جدا صاعقة .. لانو طلع ان المعلمة كل مازادت خبرتها كل مااتجهت موضوعات تدريسها للرسم اكثر من الاشغال اليدوية .. ايضا انو تميل انها ماتشتخدم اي اداة او خامة .. تشرح بشكل نظري والبنات يطبقون حسب اللي فهموه…

صراحه شي يقهر .. ويرفع الضغط:(

برضو تكلمت هالمديرة عن استمارة التقييم .. وكيف انها قديمة .. وماتنطبق على معلمة التربية الفنية .. وذكرت انها تعاني عشان تعرف على ايش تقيم معلمة التربية الفنية بناء على هالاستمارة .. وكان ودها لو يصممون استمارة خاصة بالتربية الفنية بحيث انهم مايظلمون جهود المعلمة وكذلك تكون محتوى الاستمارة مناسب للاشياء اللي تطبق خلال الحصة .. خاصة ان المادة لها خصوصيتها وقواعدها المختلفة عن باقي المواد.. والمبكي انو برضو هالاستمارة من قدمها ماتواطب التحديثات .. حيث انو بمشروع تطوير كتاب الرياضيات تم إلغاء دفتر التحضير للمعلمة .. وصار فقط المطلوب منها تمشي على الكتاب… فيما بالاستمارة مازال تطالب المعلمة بدفتر التحضير، ويوجد تقريبا فوق العشر بنود خاصة بدفتر التحضير.. والمديرة محتارة وش المفروض تسوي بهالبنود مع الغاء دفتر التحضير.

لو فيه مثل هالمديرة والمديرة الثانية اللي شفتها من كم يوم بكل مدارسنا .. اتوقع بيكون الوضع افضل..

بس المؤسف انو هالنوعية اقليه ونادرين جدا .. الباقي الله يستر علينا وعليهم .. مااعرف ليه بس صاروا مديرات طالما مالهم رغبة بالتطوير للمعلمة ..

على طاري المديرات اللي مايدرون وين ربي حاطهم .. اليوم مريت على مدرسة .. ودخلت على المديرة الا هي مسترخيه على كرسيها وتكلم بجوالها .. سألتني من انا ولما عرفت انو من الجامعة وماافيدها بشي طنشتني وقالت روحي اسألي اللي تبين من الغرفة الثانية !! او شوفي الاداريات يفيدونك..

مو هنا المشكلة .. لانو يمكن مكالمتها مهمه جدا وفيها حياة او موت .. المشكلة انو لما رحت للاداريات صدموني انو معلمتهم في إجازة امومه .. وكان عندهم وحدة منتدبة وانتهى انتدابها قبل الاختبارات .. بغيت اسألهم ليه مديرتكم ماتعرف هالشي؟؟ خصوصا انو اليوم اخر يوم بالاختبارات .. مو معقوله اسبوعين مالاحظت انو المعلمة رجعت مدرستها !! بس بلعتها وقلت وش دخلني فيهم .. بس لما رحت مدرسة ثانية وصار نفس الموقف بس مع شكل ثاني..

كانت المديرة تقول انو المعلمة مابعد طلعت من القاعة .. استغربت لانو الساعة قريب من تسع ومستحيل اي طالبة باخر يوم من الاختبار تجلس الوقت كامل بالقاعة .. بس قلت بنتظرها .. جلست عند الكاتبه كذا خمس دقايق وبعدين سألتها عن معلمة التربية الفنية .. وانصدمت انها قالت ان المعلمة من زمااااااان طالعه من القاعة .. هنا ماقدرت امسك نفسي وسألتها ليه مديرتكم ماتعرف هالشي؟!

ابتسمت وقالت المديرة اصلا ماتعرف شي!!

اخر نقطة ابي اتكلم عنها هي المعلمات .. بعضهم تصرف بشكل عادي .. والبعض الاخر ماكانت تبي اصلا تسويه .. يعني استبيان ماياخذ الا خمس دقايق على اعلى تقدير وش يأخرك فيه؟؟ وحدة امس لما عطيتها الاستبيان واشرح لها انو اخر فقرة ممكن تتجاوزها لو كانت ماتطبق النقد في المدارس.. وعلى طول قالت اجل بقول انو مااطبقة عشان مااسوي الجدول!

ولما جيت اليوم اخذه منها طلعت ماسوته .. واقولها سويه الحين وبطلع تقول ماعندي وقت .. والمشكلة هي جالسه تسولف.. يعني ماعندها شي .. ادري انو وقتها ومايحق لي اقول لها وش المفروض تسويه بوقتها الخاص… بس لما اكون مخليته عندها تقريبا 24 ساعة ومالقت خمس دقايق تشتغل عليه فيها يحق لي اتضايق.. صراحه حسيت لو تركتها اسبوع ماراح تلقى وقت تسويه … وقعدت على راسها لين سوته:D

طبعا ومستمر وضع الكروكيات الغلط والمدارس اللي نطيح فيها صدفة واحنا ندور مدارس ثانية …. الى الان مو عارفة ليه الكروكيات بهالسوء من الرسم والاخطاء الكبيرة 😦

راح اوقف هالاسبوع بسبب الاجازة وبرجع اكمل ان شاء الله مع بداية الترم الجاي.. بس شكلوا بيكون فيه اكشن اكثر لانو بصير احضر للمعلمات حصص التربية الفنية .. عاد الله يستر من اللي بيصير.. بس ان شاء الله خير

Advertisements

6 thoughts on “يوميات باحثة ][اليوم الخامس والسادس][

  1. هااااي ياعسل
    مبروك الاجازه 🙂 مع انو شكلو ماودك عشان ماتعطلين في شغلك لول!

    و من ناحيه المديرات.. وشرايك مدرستي الأولى ماكان فيها من الموظفات في العمل الاداري الا اداريه وحده بس؟ هي اللي تدير كل شي!
    مع انو فيه مديره معينه حكومي طبعاً لكن هي مديره الابتدئي و المتوسط و الثانوي.. و طبعاً مع كل هالشغل مو ملحقه ولا عارفه عن اي شي يحصل.
    هي وافقت تكون مديره عليهم كلهم و المفروض انو لما شافت انو فوق طاقتها اعتذرت، لكنها ظلمت المعلمات و الطالبات و الاداريه بعد باهمالها لكل شي..
    مستحيل تنجح اي منشأه بدون قائد.

    الا انتي استبيانك بس للمدارس الحكوميه؟ او مكن الأهليه كمان؟

    إعجاب

    1. صراحه مو محدد حكومي او اهلي… لمعلمة التربية الفنية بالمتوسط فقط
      بس انا رحت حكومي من حيث انو اسهل بالتعامل معاهم اكثر من الاهلي.. اللي بسهولة ممكن يرفضون بالاضافة انو ياخذون نسخه من الاستبيان وتكون ضد المعلمة ..
      بعض المدارس يطلبون منك نتيجه المعلمة بالاستبيان .. وهالشي انا ماارضى اني اضر معلمة عشانها ساعدتني ببحثي

      إعجاب

  2. ياربيه درجتين تحت الصفر :S
    الله يعينكم جمدة
    اجل هذا بياع الخبل عباته :d
    <<< كنها طلعت عن الموضوع

    الحمد لله خلصت ايام الامتحانات
    ويبدا لك فصل ثاني من القصة مع اليوم الدراسي العادي
    اظنه بيكون احسن

    بس ماقلتي لنا كم وصلت عندك عدد الاستبيانات؟

    إعجاب

    1. ايه شفتي البرد هب بقوة .. اشوا انو ماجى وانتوا فيه .. كان انصدمتوا بالفرق بين الرياض وسيدني
      اليوم اشوا دفينا شوي .. درجة الحرارة 10

      ايه صح العدد اللي وصلت له 24 من الدوران
      وعندي قبلهم 20

      عاد يبي لي تقريبا 75 احضر لهم .. بيصير عندي 119.. واكمل توزيع بعدها لين الـ 300:(

      إعجاب

  3. الحمدلله انتي الحين قطعتي مرحله مهمه جدا في داخل اعماقك وبديتي تتكيفين مع الوضع الدارج خلف اسوار المدارس المشحونه بجميع التهكمات سواء الفعليه او اللفظيه او على قولتك البحلقه البصريه لانها تعتبر ايضا من سوء السلوك ولكن تقبلك للوضع يدل على انك ماشيه في الطريق السليم بدليل تقبلك لتلميحات مدرسه التحفيظ من هنا راح اقولك لاتقنعين نفسك بان الاجواء تلعب دور مهم في نفسيات المعلمات خاصه المتزوجات منهم لان فيه عوامل اخرى تلعب دور مهم مثل نفسيتك انتي وهذا مالمسته من يومياتك فعند خروجك بتفائل تقدرين تكسبين ودهم غصب عنهم اضافه الا الزحمه الي تواجهينها في طريقك وصخب الحياه ومع ذالك تماسكك مازل رائع جدا واصلي مسيرت بنفس الرتم وصدقيني راح تكوني مشروع ناجح باذن الله
    بس بجد اعجبتي جرائتك في ذكرى زيارتك لمدرسة التحفيظ فبمجرد ذكرها هنا اسمحيلي بتهنئتك على شجاعتك وجرائتك وربنا يوفقك
    في انتظار المزيد

    إعجاب

    1. منور بتواجدك دايم وتعليقاتك الحلوة 😀

      بالاسبوع الاخير بديت احس بنفس اللي تقوله .. بس تعرف.. اتوقع لو وحدة غيري تلف على المدارس وشخصيتها خجولة وغير اجتماعية بتواجه مشاكل كثير..
      انا بطبعي (سوبر اجتماعية) بالاضافة انو احاول انسى الاشياء اللي تضايقني ولا اخليها تأثر على تعاملي مع الاشخاص .. عشان كذا كنت كل يوم ابدا كأنه اول يوم لي بدون ماافكر ايش صار امس…
      بس الحمد لله ان الامور بدت تتحسن .. وان شاء الله من الاسبوع الجاي بتبدا دوره جديدة .. وان شاء الله يكون الوضع افضل من اللي قبل

      إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s