ثقافة التقليد


افكار مقلدة

فكرة مبتكرة

نعاني في مجتماعتنا العربية من ثقافة التقليد، نادر جدا نشوف مبدعين من حولنا وافكار خلابة .. لدرجة الواحد ينسى الشعور بالابداع من كثر الاشياء المقلدة من حوله.

هالتدوينة كانت ببالي من فترة بس مالقيت وقت اكتبها .. بس امس بالملاهي صار قدامي موقف ذكرني بهالموضوع .. لدرجة بغيت اكتب التدوينة بوقتها ..

كان فيه ركن قريب من محل تسجيلات، وهذا المحل مشغل اغاني زواجات.. جوا مجموعة بنات ووقفوا قريب من السماعة وجلسوا يرقصون كل شوي وكل ماجت اغنية حلوة .. جلسوا على هالوضع تقريبا ساعة .. وبعدين جوا مجموعة بنات وشافوهم وعجبهم الوضع وبما ان المساحه اللي برا صغيرة راحوا داخل المحل يرقصون !! طبعا صاحبة المحل قفلت التسجيل.. ماعجبهم الوضع وراحوا .. ورجع اشتغل التسجيل .. ورجعوا البنات اللي اول يرقصون على خفيف.. بعد شوي جت مجموعه بنات ثانين وقطوا مع هالبنات يرقصون معاهم غصب.. المجموعة الاولى ماعجبها الوضع وسحبوا نفسهم وراحوا.. المجموعة الجديدة طلعوا ماعندهم سالفة ولا يعرفون يرقصون .. بس عجبتهم الحركة وحبوا يسوون زيها .. مثل اللي قبلهم راحوا رقصوا داخل المحل…


الموقف هذا ذكرني بثقافة التقليد اللي عندنا .. وين مانروح اي مكان .. لو بالشارع نشوف محل فاتح وجنبه اكثر من محل بذات النشاط.. محل جوالات وجنبة صف زيه .. محل رياضة وبرضو كوم من جنبه .. محل ابو ريالين ونشوف الشارع امتلى محلات نفس النشاط.. وهكذا..

مثل هالتقليد المستهلك هو الكسبان منه عشان تصير منافسه في الاسعار .. لكن كأشخاص ليه مانبدع؟؟

ليه مانعطي من قلبنا بدال ما نشوف ايش سووا الناس ونسويه؟؟

نجي لمثال على مدي اوسع:

برنامج ستار اكاديمي : الفكرة مقتبسه من برنامج اجنبي وجابوه نفذوه عندنا مع انو يخالف الدين والعادات العربية .. برنامج سوبر ستار اللي الحين له تقليد بقناة دبي مخصص للفن الخليجي.. وبرضو ستار صغار اتوقع انو اكيد له برنامج اجنبي اساسي… واليومين الاخيرة اشوف mbc يسوون دعايات على برنامج مشابه لبرنامج المواهب البريطاني.


نرجع نضيق المجال بشكل اكبر :

طريقة التوقيع وصف التقييمات في الاقلاع .. ممكن بالاول بدا فيها كم شخص .. والحين صرنا نشوف لوحات اعلانات مو تقييمات .. وكلهم في التوقيع..

برضو الموقع تبع ask me الكل حاطة بتوقيعه .. هو حلو لما يكون عضو قديم وله مشاركات كثيرة يحطه لانو اكيد فينا فضول نعرف اكثر عنه بس لما يجي عضو جديد ماله الا عشر مشاركات ويقول اسألني! وش اسألك الله يهديك … مو الاول خلني اتعرف عليك بعدين افكر اسأل.

موضوع المشتروات (طبعا انا مدمنه عليه) جت فترة من الفترات اذا اشترت وحدة اسوارة او شنطة او اي اكسسوار نشوف صفحتين او ثلاث بعدها كلهم طقموا وياها .. وماادري هالحركة اندثرت او بس صاروا يشترون بدون مايقولون .. بس انا اتوقع انو شي ماراح .. لانه لو ينزل شي بالمشتروات واروح بنفس اليوم او من بكرة للسوق القاه خلص!! هذا معناه ان الكل جالس يقلد


المدارس لما كنت الف عليها بالفترة الماضية .. تلقى كثير من البنات نفس الشكل ونفس اللوك، تمنيت انو يكون تلقيد مع مناسبة اسلوبك مو كوبي بيست..

بالجامعة ماانسى موقف صار لي .. لما تعبت نفسي واخترعت مواضيع وافكار جديدة وطرحتها على دكتور المادة .. وانصدم بوحدة من الطالبات تقول انها لو عجبتها وحدة من الافكار راح تشتغل عليها !!

برضو لما جوا الطالبات بالمستوى اللي اصغر مني وطلبوا مني بحوثي وتقاريري! مستحيل يكون قصدهم الاستفادة .. لان لو طلبوا ملازم وكتب كان ممكن افكر باكثر من عذر بس لما طلبوا البحوث والتقارير شكيت انهم راح ينسخونها ..

وفيه بنت بالجامعة دكتورة سرقت فكرتها بالكامل وقدمتها مشروع بحثي بدون ماتنسب اي فضل للطالبة اللي اكتشفت النظرية

وطبعا الحديث يطول عن الاشياء الاكاديمية..

افكار مقلدة

افكار مبتكرة

راح اطلع شوي من الانتقاد ونشوف الحلول لهالشي:


ايش عكس التقليد؟

الابتكار والابداع والخلق وممكن التجديد برضو

يعني مو شرط انو انا ابدع او ابتكر شي.. ممكن اخذ فكرة واجددها وارجع اطرحها باسلوبي وطريقتي . نقول مثال عشان نربط الكلام بالتطبيق:

وحدة تشتغل مندوبة لماركة ايفون وتلف على مجموعة من البنات والموظفات وتبيع عليهم .. انا ممكن تعجبني الفكرة ويكون عندي عدد لابأس فيه من المعارف اللي اقدر اسوق عليهم المنتجات، وعندي مهارات في البيع واقدر اغامر في هالشي، ايش المفروض اسوي؟

لو خذت نفس الماركة ونفس الطريقة بكون اقلدها، برضو لو رحت وجبت ماركة ثانية او اي نوع من المكياج بكون اقلدها بالاضافة انو ممكن راح اخذ منها زباينها وتخرب العلاقة بينا. ايش المفروض اسوي.. لو فكرت شوي وقررت انو اكسب هذي المندوبة لصالحي واكسب زباينها بالاضافة لزبايني راح اضطر افكر بشي قريب من شغلها وبذات الوقت مختلف عنه.. ممكن تكون فكرتي كتاب لتعليم المكياج، او امسك الكتالوج تبعها واشوف طرق لاستخدام الادوات الموجودة .. راح اسوي الكتالوج بطريقة مبسطة .. رسمات الكحل والطريقة المناسبة لنوع كل وجه ، طريقة توزيع البلشر وكريم الاساس، امسك انواع جديدة من المكياج واشرح استخدامها… الخ

واحاول اسوق الكتالوج تبعي وممكن اعرض عليها انو تسوق له مع المنتجات اللي هي تبيعها .. وكذا مااكون قلدتها ولا اثرت على بيعها بالاضافة انو استفدت من مهاراتها وعلاقاتها وابتكرت شي خاص فيني.


كذا فكرة عشان تكون اوضح:

شفت بيت وحدة من صاحباتي وطريقة تأثيثه، مااروح اقلده.. اشوف الزوايا اللي عجبتني واطبقها وابتكر اشياء تناسب حياتي وروتيني مع اهلي.

طالبة معاي مسويه مشروع حلو .. والفكرة جديدة .. لنفرض انو عن العادات الغذائية .. وسوت تصوير فيديو لاطفال من عائلتهم وشلون تعدل السلوك الغذائي لهم باكثر من طريقة .. وبدون ماينتبهون الاطفال للكاميرا ..

الفكرة حلوة رغم ان الموضوع تقليد، مااروح اجيب فكرة ثانية واسوي نفس الفيديو وكل شي بس مع تغيير الموضوع.. ابتكر شي خاص فيني اعتماد على فكرتها. ممكن تكون الفكرة بذات المجال ، عن الغذاء والتغذيه.. لكن في مجال الدراسة مافيه مجال تعتمدين على فكرة احد .. لانو بهالمجال اي اقتباس يعتبر سرقة حتى لو غيرتي شوي فيها .. بس ممكن نستفيد من الاشياء اللي هي توصلت لها .. مثلا لو انها وصلت ان الاطفال ممكن تتغير عاداتهم الغذائية بالتدريج وتزيين الاكل.. تقدرين يكون موضوعك عن مدى تقبل الامهات لتزيين الاكل ومعرفتهم بطريقة اضافة المواد الغذائية المفيدة للاكل وجعلها غير ظاهره… هنا انتي ماراح تسوين فيديو وحوسه .. راح تسوين استطلاع بسيط لكذا ام ممكن 10- 30 تقدرين تجيبينهم من الانترنت .. وبعدها تجيبين كذا وصفه .. تقنعين احد من اهلك تجربها مع اطفالها .. وتاخذين راي الاطفال بتقديم الخضار صريحه لهم .. ولما اخفتها الام خلال الاكل، ومكن تضيفين تسجيل بسيط لرأي الاطفال بنوع الاكل

فكرتك استفدتي من فكرتها وطورتيها وابتكرتي اسلوب خاص فيك وابتعدتي عن التقليد


ممكن عن المدونات.. كثير ناس عندهم مدونات .. واذا عجبتك الفكرة صعب انو تسوين مدونة عشان بس تكتبين وش سويتي كل يوم .. لانو صدقيني شي ممل:(.. نقول فرضا انو شفتي مدونتي ولها اكثر من موضوع (يوميات- تعليقات – خواطر-فهرسي الاقلاعي) وعجبك الوضع وحابة تسوين مدونة مثلها .. طبعا صعب تاخذين نفس افكاري فلازم تبتكرين شي خاص فيك…  ناخذ فكرة من الافكار اللي مجمعة في مدونتي .. وهي فكرة الاخبار والتقارير.. انا اهتم بالجوالات والتقنية .. صدق ماانزل كثير عنها بس من فترة لفترة فيه خبر.. ممكن انتي تاخذين هالفكرة وتسوين مدونة عنها .. لكن تكون عن الاشياء الجديدة بالسوق، او موديلات العبايات الشائعة ..


شفتي مرة مدونة عن الرسم والقصص وعجبتك .. ممكن انو تسوين قصص من نفسك .. ترسمين كوميك وتحطين القصص من امثال او من واقع ..وتنزلينها في مدونتك.


شفتي وحدة مسوية مشروع الرسم على التي شيرت ، وانتي عندك مهارة بالرسم وممكن بسهولة توفرين الخامات والادوات وتسوين مشروع مثلها .. لكن ماتبين تقلدينها .. ممكن تسوين مشروع رسم برضو بس على خامة مختلفة وبعيدة عن التي شيرت .. ممكن ترسمين على بناطيل الجنز.. ممكن على شنط… ممكن برضو على العبايات والطرح.. وتقدرين برضو ترسمين على الاقمشة بعد قصها على الباترون … المجال مفتوح لك باكثر من خامة بدون ماتقلدين صاحبة العمل .. وممكن تسوين نفس ماسوينا مع مندوبة ريفلون وتخترعين شي تستفيدين من علاقات التاجرة الاولى


شخص فتح مجمع اسواق وبفترة بسيطة صار يجيه دخل كبير كل سنة .. مااروح اسوي مثله وافتح سوق ثاني بمنطقة قريبة عشان اخذ منه زباينه او اشاركه فيهم .. ممكن انا اشوف ايش ناقص هذي المنطقة .. ممكن اسوي مركز ترفيهي للعائلات والاطفال.. مجمع مطاعم.. حديقة صغيرة مع العاب الكترونية.. مكان تجمع نسائي ترفيهي بس مو فيه نشاطات بيع.. ممكن اسوي سينما مصغرة للاطفال ومسرح ..


الافكار كثيرة والمجالات متعددة بس لازم نعرف ان صاحب الفكرة تعب لما ابتكرها .. واحنا عشان نوصل مثل اللي هو وصله لازم نتعب مثله او اكثر عشان نحصل اللي حصله .. وطبعا المنافسة تاخذ دورها بمثل هذا الابداع ، وتحمسنا على العطاء بشكل اكبر

لازم نستغل كل الاشياء المتوفرة من حولنا ونسخرها لخدمتنا .. مانستخدمها في التقليد لكن تكون عنصر في الابتكار..



بس قبل ابي اقول انو مااحس التقليد شي سيء، بس التقليد اللي احنا نسويه مو حلو ، لان صاير يزيد الكم عندنا تقل الجودة ، مافيه اي امانه بالعمل بس لمجرد التقليد:(

اتمنى انو بيوم القى الناس تغيروا وبدينا نفكر نبتكر اشياء خاصة فينا تميزنا وتخلينا متفردين عن العالم ..

Advertisements

10 thoughts on “ثقافة التقليد

  1. وأنا أقرا كلامك اتذكرت كلام أرسطو عن التقليد D=

    باعتقاده إن التقليد من طبع البشر وانه يقدّم لنا متعة وفايدة … وأثبت كلامه بأن الطفل ما يتعلم إلا بالتقليد

    مو مع سيادة التقليد الأعمى ~
    لكن التقليد أعتبره خطوة أولى أتعلم منها وبعدها يجي الابتكار ~

    مثلاً:
    ممكن أشوف شغل مس.كاندي بالجوخ ويعجبني بس ما عمري اشتغلت على هالخامة! … أطبـّق نفسس شغلها وإذا ضبطت معاي أروح أبتكر =) … ولا أمشي على طريق التقليد مرا ثانية لأن:
    صار عندي العلم بالمجال هذا –> زادت ثقتي –> قدرة عالإبداع =)

    أشكرك على طرحك الجميل لافا ^^

    إعجاب

    1. فكرتك حلوة عن التقليد… وحبيتها .. وليت كل شخص يفكر فيها بذات الشي..
      عندنا شي بالرسم نحاول فيه نقلد اللوحات المشهورة .. مو الغرض النسخ والتقليد لكن اكتساب مهارات وقدرات .. بالاضافة الى الدقة والملاحظة ..

      لكن للاسف احنا نشوف التقليد بشكله السيء:(.. واتمنى انو بفترة نتخلص منه

      العفو .. مع ان الشكر لك لانك نورتي مدونتي واسعدتيني باسطرك

      إعجاب

  2. واووووووووووو ع الكلام ..
    تدرين وش احلى شيء بموضوعك ..
    انك ما جبتيه من ناحية نقد وبس ..
    لا حطيتي حلول وكثيرة كمان ..
    ما شاء الله عليكي كلامك عين العقل و جانب الصواب من كل نواحيه..
    دخلت ع موضوعك عن طريق ري تويت لرابط لها الموضوع في التويتر =)

    إعجاب

    1. حبيت انو لو احد دخل التدوينة يشوف الفرق بين التقليد الاعمى ولما يتعب ويفكر..
      صدق الطريق شوي صعب بس نبدا حبه حبه ونوعي الناس .. وبإذن الواحد الاحد مستقبلا راح نكون مجتمع من دون تقليد .. مثل ماصارت منتدياتنا بدون منقول;)

      منورة المدونه ياقمرهم

      إعجاب

  3. من قبل مااقرى مدونتك وانا افكر !
    كيف ان اغلب البنات صايرين شكل واحد ..كلهم يحبون السوق
    مع اني اجزم ان بعضهم يكرهه بس تقليد منعاً انها تكون شاذه مثلاً !
    كذلك اشتراكهم في نفس الهوايه .. اللي هي التصوير :S
    شئ مكرر ومزعج تدخلين الفيلكر حقهم تلقين نفس الصور تصوير
    ماكدونالدز و تصوير كتاب وتصوير جزم !

    أختي اللي لسى في الثانوي تحب الطبخ جداً كانت تروح السوق
    عشان تشتري المواعين 3>
    طبعا جاها نقد من بعض الناس على قولتهم البنات اللي في سنها
    يحبون الملابس والاكسسوارات وهي تروح السوق عشان مواعين !
    فكان هالشئ تشجيع انها تكون من ضمن المقلدات لكن لثقتها في نفسها
    واصلت هالهوايه : )

    طولت في ردي ودي أتكلم أكثر بس المساحة لاتسع
    الف شكر لك

    إعجاب

    1. صدقت بهالشي
      التقليد مخلي الاشخاص نفس الشكل ونفس اللون ونفس الرائحه
      اشوف البنات بالجامعة واحسهم ذات الشي .. بكل شي … حتى جوالاتهم ذات الموديل .. صرت ماتفرقهم الا بنوع الجسم .. او طول الشعر.. الباقي نسخه من بعض
      هالشي ابدا مو حلو .. حلو كل بنت لها هوايتها الخاصة والجوانب الللي تتميز فيها
      بصراحه احيي اختك على اصرارها .. والطبخ هواية حلوة .. صدق اني مااحب اطبخ بس اكثر مشترواتي اما مواعين او اثاث .. قليل اكون رايحه اشتري ملابس او اكسسوار :$.. الا اذا عندي مناسبة ومضطرة اشتري:D

      اسعدني كلامك وماطولت ولا شي.. بالعكس الشكر لك
      لانك شاركتني ببعض الامثله
      خلك بالقرب دايم

      إعجاب

  4. فروش عادي آخذ نسخه من ها التدوينه لمدونتي :$ ..

    طريقة الطرح جداً جميلة، والموضوع اللي تطرقتي له كمان ..
    أحياناً يكون التقليد عشان مايحس الشخص أنه غريب عن المجتمع، لكن هذا يخليه مجرد نسخه مالها وجود بالحقيقة ..

    بعكس التقليد الإيجابي اللي يساعد على تطور المرء ونحاحه =) ..

    ماعندي إضافات اللي فوق كفو ووفو ماشاء الله :$ ..
    موفقه ياحب ..~

    إعجاب

  5. تدوينتك جميله جدا , الكلام بقلبي من زمان
    احب اقضي وقتي بالقراءة عن شيء ورأي الناس فيه , المدونات شي مفيد من هالناحيه بحيث الشخص يناقش افكاره بتدوينته
    لكن للاسف لما ابحث عن مدونات كل اللي الفاه , مدونات عن ميك اب , ملابس , منتجات الشهر , الخ
    مواضيع مكرره بكل مدونه ادخلها من هالنوع
    قليل جدا نلقى شي مميز بين هل الكم الهائل من التقليد

    إعجاب

    1. مو عارفه ايش السبب اللي يخلي الناس تقلد.. هل ماعاد عندهم افكار او رغبه بالتفرد
      او مجرد كسل واسهل انهم يسرقون ابداع الاخرين
      وهالشي صايرين نشوفه بكل مكان .. حتى وصلت انهم يسرقون صور ويدعون انها صورهم 😦

      إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s