{ادع الى سبيل ربك بالحكمة والموعظة الحسنة}


(ادْعُ إِلَى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ وَجَادِلْهُمْ بِالَّتِي هِيَ أَحْسَنُ) سورة النحل 125

من كم يوم نزلت للسوق، وطبعا مايخفيكم الزحمه الموجودة بالسوق والخبصة، لدرجة الموظفين بالمحلات مو ملحقين يرجعون يرتبون المحل بعد كم متسوقة. طبعا اي زحمه بالرياض = هيئة. لكن هالمرة الهيئة كانت غير شكل ومزعجة بشكل كبير. استوقفتني عدة مشاهد بالسوق وخلتني صراحه افكر هل الرجال هذولي اللي يدعون انهم أهل دين وصلاح فاهمين الدين صح؟ او فقط يقرأون ظاهره ولا يعلمون الباطن.؟

تنبيه: هالمواقف والرفض مو تعميم على كل رجال الهيئة، ولكن للفئة اللي قابلتها فقط

قبل ما المتدينين يثورون علي ويكفروني – بمناسبة ان التكفير صار بسهولة يطلق على اي شخص-  راح اذكر السبب اللي خلاني اقول هالشي:


الموقف الأول: كنت واقفة في ساحة المطاعم في حياة مول اطلب شي لاختي الصغيرة، واشوف رجالين من الهيئة يلحقون بنتين عربيات كاشفات.. البنتين كل وحدة معاها عربية طفلها ومتحجبة بالكامل لكنها ماغطت وجهها، واستمر رجل الهيئة يلاحقها لين البنت خذت طرف الطرحة وغطت وجهها.. وقتها قعد يعطيها محاضرة عن الحجاب والفتنة ورمضان…. الخ.

رجل الهيئة قرر من دون تفكير ان هذي المرأة قررت فتنة الرجال في السوق لانها كاشفة وجهها بدون مايوقف لحظة مع نفسه ويفكر أنها ممكن تتبع مذهب اخر غير المذهب اللي احنا معتمدينه في السعودية، وطبعا مايخفى على الكل ان السعودية هي الدولة الوحيدة من الدول الاسلامية اللي كل نسائها يغطون وجههم، واي امرأة كاشفة لابد تكون من خارج المملكة او ذات جنس مختلط. طيب بغض النظر عن هذي الخرابيط، هذا الرجال اذا كان يدعي الدين ايش اللي استفاد من هالشي؟؟

لفت نظر الناس للبنات، وخلى الرجال اللي ماكانوا ملتفتين او منتبهين انهم كاشفين وجوهم ينتبهون، بالاضافة انه كره المرأة بمسأله غطاء الوجه، وخلاها تغطي وجهها عشان تتقي شره مو عشان تجنب الفتنه.. وبذلك عطى صورة سيئة عن الدين في بلدنا.

الموقف الثاني: بنفس المجمع واظن نفس الجماعة -ماابي احظ بذمتي- واقفين بنص السوق يصرخون على بنت ثانية عشان تغطي وجهها. البنت هالمرة ماسكتت وجلست تاخذ وتعطي بالكلام لانها مو مقتنعه باللي يقوله وهذا اولا، والثاني كانت رافضة انها يلاحقها مثل اي بنت رخيصه تحاول تجذب الرجال. صراحه محد يلومها لما يقترب منها رجال غريب ويتجرأ بالكلام معها والنظر مباشرة في وجهها ويقول لها انو رجل دين.. طبعا مافي اي شي يثبت لها اي شي، غير انها بموقف حرج ومخيف فالمفروض تدافع عن نفسها.

الموقف الثالث: بمجمع ثاني، بوسط المحل المزحوم بالحريم لدرجة الرجال ينتظرون برا قرر رجل الهيئة انه يدخل هو 3 من اللي معه بوسط الحريم، كله عشان يراقب. طيب ايش يضمن انك لما تدخل ماراح تلامس الحريم؟ طيب انت تقول انك رجل دين، لكن تظل رجل تملك شهوة الرجل ورغباته بالنساء، وطالما لا تغض نظرك عن النساء يصعب التصديق انك لن تشعر بأي تأثير من الازدحام مع النساء.

الموقف الرابع: في نفس المجمع الثاني، وللأسف بغيت اروح فيها بهالموقف. وقفت عند كافيه بمنتصف السوق طاولاته منثورة في الممر ومافيها اي تقسيم بين الرجال والنساء لانه بالممرات، كل غرضي من الوقوف اني ابدل الاكياس بين يدي واغطي برقعي لاني لاحظت ان السوق مزدحم بالحيل. رجل الهيئة ماصدق شافني حاطة الاكياس على الكرسي الا جى ناصيني وعلى عيونه نظرة ملؤها الشر، لكن الظاهر لما شافني لاهية اعدل طرحتي راح وتركني واتجه لبنت جالسه في امان الله في طاولة مطرفة شوي ترتاح وتشرب قهوة، ونشب فيها ليه جالسه هنا، وبلحالك ووين محرمك ..و..و.. ولا رضى الا انه يقومها من مكانها. يعني عنده انها تفترش الارض وتشرب قهوتها افضل من انها تجلس في واجهه المحل مكرمة بدون مااحد يتعرض لها. وكل حجته ان مامعاها محرم. لو عندها محرم مانزلت السوق لوحدها عشان تتعرض لمضايقات من اشخاص يدعون الدين.

يمكن البعض بيحس انو تدوينتي هذي فيها كمية هجوم، ولكن لي موقف سابق مع احد رجال الهيئة خلاني ارفض تسميتهم برجال دين.. ايام الكلية كنت ارجع مع اخوي، كان مدخل البوابة مزدحم لدرجة الموت، يعني الوحدة تطلع منه مو مصدقة انها باقية حيه، كنت ادرس تخصص اقتصاد منزلي وتربية فنية، يعني اطلع كل يوم محمله بانواع الاغراض الثقيلة والحادة، يوم معاي كراسات بحجم متر، ويوم معاي خشب، يوم معاي مكينة خياطة، ويوم معاي علبة مليانه مواعين.. والقائمة تطول من الاغراض.. بس ابيكم تتخيلون الوضع زحمه+ اغراض كثيرة وثقيلة+ عباية راس تطلعون من الزحمه كارهين انفسكم.رجل الهيئة هذا قرر ان ماعنده شغله الا برقعي، وانو لازم اكون لابسه غطوة!! يااخي انا بالموت شايفة طريقي مع هالعفش وانت تبيني البس غطوة؟

طبعا انا انواع الطناش بعذر انو رجل دين وماراح يتعرض لي، لين جى ايام الاختبارات ، واخوي ماقدر يدخل لشارع الكلية من الزحمه، عرضت عليه انو اطلع له على الشارع عشان مانعلق بالزحمه. وانا ماشية بالشارع الا رجل الهيئة ذاته اللي ناشب لي من كم شهر يلحقني.. ناظرت قدامي كان الشارع قدامي صدق مزحوم بس فيه دواعيس وسكاكيك صغيرة ممكن اي شي يصير داخلها .. حاولت انو مااسيء الظن وقلت اختبر هل هو يلحقني صدق او اتخيل. وقفت وقف.. سرعت بالمشي سرع وياي، وهو كان متخيل انو مالمحته بين زحمه الناس لكن حفظ ربي هو اللي خلاني انتبه له. رجعت بعدها للكلية وخليت اخوي يجيني. وقلت له عن اللي صار. اليوم الثاني جى اخوي متأخر على اساس الزحمه وعشان مايصير لي موقف مع هالرجال. ورغم ان الشارع فاضي وهادي ترك كل البنات بالشارع وجى لي، بس هالمرة اخوي كان مراقب ونزل له وكلمه .. وعطاه كم كلمه انو مو حالة كل يوم يلحقني . الرجال اشوا تأدب ولا عاد شفته.

وحدة من صاحباتي صار لها تقريبا نفس موقفي بالاختبارات بس ياحياتي هي ماانتبهت ان فيه واحد يلحقها.. فجأة لقت نفسها باخر الشارع وفيه رجال من الهيئة يمشي وراها، البنت تقول مع الخوف دخلت شارع على اساس تطلع من الشارع الثاني بس للاسف اكتشفت ان الشارع مقفل وهي ماانتبهت.. موقفها كان مرة مخيف الشارع مقفل من قدامها والرجال وراها قاعد يمشي بالشارع، وبقدرة قادرة كل البنات اللي يمشون اختفوا، زوجه خالها اللي كانت تمشي معاها برضو اختفت. تقول فجأة طلع شايب ماتدري من وين وقعد يستغفر ولما شافه رجل الهيئة انحاش، وهي وقتها تقول بغيت يغمى علي من الخوف. لما ركبت السيارة مع زوجه خالها قالت لها الاخيرة انو الهيئة رجعوهم ومنعوهم من المشي والغريب اللي اللي منعهم تركها تمشي بدون مايقول شي لها .. يعني شكلهم مبيتين النية .

عموما بغض النظر عن هالموقفين انا رفضي للمواقف الاخيرة اللي صارت قدامي بالسوق. بالعودة للاية اللي حطيتها بأول التدوينة نلقى الله سبحانه وتعالي قال تكون الدعوة بالموعظة والحكمة الحسنة .. وين رجال الهيئة بالمواقف اللي ذكرتها عن هالاية؟

قال سفيان الثوري: “ينبغي للآمر الناهي أن يكون رفيقاً فيما يأمر به، رفيقاً فيما ينهى عنه، عدلاً فيما يأمر به، عدلاً فيما ينهى عنه، عالماً بما يأمر به، عالماً بما ينهى عنه “.

بصراحه انا ماشفت رجال هيئة يدعون بالرفق والطيب، حتى النفس تتقبل الشخص اللين السهل، وترفض الآمر الناهي اللي يعلي صوته بالنهي. برضو الشخص العاصي في السوق او فيه غيره الله سبحانه وتعالي عالم فيه ورأه ولكن ستر عليه، وانت كرجل من الهيئة مهمتك انو تنهى عن المنكر مو تفضح الشخص وتشهر فيه.. يعني ابي افهم ايش يستفيدون الهيئة لما يلم خلق الله اللي بالسوق على بنت كاشفه وجهها؟ اذا ربي مافضحها بين الخلق انت تجي وتفضحها؟

طيب نجي لموقع الهيئة في السعودية ونشوف اللي مكتوب، وهل فيه شي يشفع لهالرجال بالاسواق تصرفاتهم الغليظة ومزاحمتهم النساء؟

شيكوا هالرابط ، بنفس موقعهم جابوا الادلة من القران وفسروها ان رجل الهيئة المفروض مايكون غليظ، فأبي اعرف رجالهم هذولي مايقرون القرآن او يقرون بدون مايتدبرون؟؟

ماابي اطول لأن الهدف من هالتوينة فقط رفض سلوك رجال الهيئة اللي يشوهون الاسلام بتصرفاتهم هذين واتمنى انو تكون فيه اعادة نظر لطريقة التصرف، وهنا ادقق انو تصرفاتهم مع الاشياء البسيطة مثل المواقف اللي ذكرتها. طبعا مااعمم فيه رجال من الهيئة بحق ينقال عنهم رجال دين، لكن فيه رجال يدعون التدين ويسيئون للدين بتصرفاتهم

وآمل انو محد يفهمني غلط


Advertisements

8 thoughts on “{ادع الى سبيل ربك بالحكمة والموعظة الحسنة}

  1. للأسف بعضهم يدعي الدين و هو أبعد ما يكون عنة , الدين لا هو صراخ و لا غلظة , ” لو كنت فظاً غليظ القلب لأنفضوا من حولك ”
    و الشي الي يقهر ان البعض مستغل سلوكهم السيء ، فـ يساهم بإعطاء صورة سيئة عن الاسلام > زي مقاطع اليوتيوب المترجمة للانجليزي عنهم و عن اي شخص فاهم الدين غلط ..

    إعجاب

  2. انا معاك بربع كلامك ،،
    فيه رجال يدعون الدين وهم ما يعرفون شي فيه ،

    لكن كلامك الباقي مالي رد عليه
    لأني ما توقعت أنو فيه ناس تفكيرهم كذا !
    حكمتي عليهم من موقف صار لك أنتِ وسخيف شوي
    والمواقف الثانيه انتي ما تدرين وش صار بـ الظبط
    يعني أكيد فيه شي خلاهم يسوون كذا بـ الحريم وبهـ السوق بـ الذات !
    صح أنو بعضهم مره فظ وشديد بس بعض الاحيان مافيه طريقه غير كذا !
    ..
    ع العموم كلامك ماخش مزاجي ،،،
    شي صراحه يضيق الصدر ..

    إعجاب

    1. اعرف ان كلامي ماراح يعجب البعض.. لكن انا جزء من فئة نتمنى نفهم
      اعرف ان الامر بالمعروف والنهي عن المنكر شي من الدين .. لكن هل هذا اسلوب؟؟
      الموقف اللي صار معي وصاحبتي يخليني اشكك بمصداقيتهم ..
      لكن فيه ناس افاضل يدعون بطريقة اكثر من رائعه .. لكن غلب السيء على الجيد.. كل اللي هدفت منه من تدوينتي بالاضافة للتعبير عن مشاعري انو على الاقل اولع شمعه تساعد مستقبلا القائمين على هالشي انهم ينتبهون للاخطاء اللي قاعدة تصير ويصححونها

      منورة المدونة ياقمرم

      إعجاب

  3. شوفي طريقة كلامك مره رآئعه ومقنعه ..
    لكن ، بمدونتك هذي ظلمتي أكثرهم ..
    يعني أنتي تعرفين عن جد ليش سوو كذا ؟
    كنتي بجنبهم من اول ما حصل الموقف ؟
    ممكن وحده منهم صلحت شي يستدعي انه يصرخ عليها ..؟
    والأسباب كثيره والبنات الي من هـ النوعيه للأسف أكثر ! ..
    صح ولا لا ؟
    يعني والله بحياتي من اولها للأن ما شفت شي من رجال الهيئه علي او على غيري
    وأمي الله يحفظها تسآعد ببعض الأشياء
    كم مره يكلمونها جهه من جهات الهيئه يقولون حنا مسكنا بنت بشقه مع ولد ( والعياذ بـ الله )
    كلميها ..
    وهم ما يقولون لها ولا كلمه ؟؟
    لأنه هذا الشي كبير وذنبه أكبر بـ الدنيا وبين الناس فمآبالك عند ربي سبحآنه ؟
    يعني انا ما ابي اتطرق لهـ المواضيع لأني ما احبها
    بس اقول لك ممكن صار شي انتي ما تعرفينه …

    ،،

    والله طريقة تفكيرك مره تعجبني بس مدونتك كانت قويه وقاسيه ..،
    منوره فيك يا بعدي ،،

    طلي على مدونتي بين فتره وفتره ق1 ..

    إعجاب

  4. اوكي كلامك يمكن صح كلهم بشر والبشر يغلطون
    بس مو معناته انو نكتبب فيهم ونسب على مواقف تافهه

    طبعا انا ماراح اتكلم عنك بس صارت الناس تدور الزله على رجال الهيئه وتجي تذكر مواقفهم “السيئه” في المجالس والمنتديات طيب اذكرو الوجه الحسن فيهم !!!

    شكرا قلبي …

    إعجاب

    1. اشكر لك ردك
      انا نبهت في البداية انو اللي بتكلم عنهم فئة قليلة .. والغرض من اني اتكلم ان هالفئة تختفي.. لانه شي يحز بخاطري اننا نظر للهيئة بهالنظرة
      لكن لو انا سكت وانتي سكتي والاشخاص من حولنا سكتوا كيف راح يتحسن الوضع؟
      بالعكس هالفئة راح تتمادى بتصرفاتها باعتقاد انو تصرفها صح، وممكن يشوفوا ان محد يعرف الصح من الغلط.. لذلك انا كتبت التدوينة من باب التنبيه للخطأ
      وآمر انو خلال السنوات الجاية مااشوف اي تصرف من هالتصرفات يصدر من ناس يمثلون الدين للزوار بلدنا

      ومنورة مرة ثانية المدونة .. ان شاء الله اختلاف الرأي مايترك آثاره في القلوب 3>

      إعجاب

  5. انا ما كملت القراءة اقول ليش لأن من استهزء بالله او القران او الرسول صلى الله عليه وسلام

    او الحجاب او الاذان اوغيره اخرجه من الملة والعياذ بالله قال تعالى (وَلَئِن سَأَلْتَهُمْ لَيَقُولُنَّ إِنَّمَا كُنَّا نَخُوضُ وَنَلْعَبُ قُلْ أَبِاللَّهِ وَآيَاتِهِ وَرَسُولِهِ كُنتُمْ تَسْتَهْزِؤُونَ (65) لاَ تَعْتَذِرُواْ قَدْ كَفَرْتُم بَعْدَ إِيمَانِكُمْ إِن نَّعْفُ عَن طَآئِفَةٍ مِّنكُمْ نُعَذِّبْ طَآئِفَةً بِأَنَّهُمْ كَانُواْ مُجْرِمِينَ)

    إعجاب

    1. من حقك ماتكمل تقرا مثل ماهو من حقي اعبر عن رايي بالموضوع
      وانا نوهت ان كلامي مو تعميم، لان فيه فئة مظلومين مع الفئة اللي ترتكب اخطاء
      تمنيت انو كملت الموضوع لاني ما استهزأت بل ذكرت مواقف واقعيه

      شكرا لك على نصيحتك وكلامك

      إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s