طالبتي الجامعية: أنت كتابٌ لا يزال تحت الطبع، ووردةٌ لم تكتشف عطرها بعد

هالتدوينة بتكون عن ملابس الجامعة، وحسب طلب وحدة من البنات .. هي حبت انو انزلها بمدونة الفاشن، لكن للأسف مدونة الفاشن متخصصه بالعمل، لذلك الافضل انو تكون التدوينة بهالمدونة. وحابة اعتذر منها كثير كثير لان تأخرت بالتدوينة.. وان شاء الله نكون على قدر الانتظار

كثير بنات اول ماتخلص الثانوي وتنقبل بالجامعة تحتار ايش المفروض تلبس وايش المقبول والمرفوض بأزياء الجامعة، والقوانين تختلف من جامعة لثانية، بالبكالوريوس درست في كلية التربية وكان لهم قوانين خاصه، الماستر خذته في جامعة الملك سعود وكانت انظمتهم قمة التنافر مع كلية التربية.. لذلك احب انبه انو بتكلم بشكل عام وكل وحدة توائم اللبس حسب اللي يناسب قوانين جامعتها او كليتها.. وان شاء الله تكون التدوينة مفيدة.

1- التنورة:

التنورة لازم تكون بلون غامق وطويلة، بجامعة سعود يسمحون بتنانير الميدي لربع الساق، بكليات التربية اظن لو يطلع طرف رجلك سجلوا لك مخالفة. بس عموما الافضل الوحدة تلبس تنورة مريحه لها، بالفترة الاخيرة شايع كثير تنانير السكني، وهي حلوة لما تكون البنت مافيها اي زوائد بجسمها، ممكن برضو السمينة تلبسها بس لا تكون البلوزة لاصقة حيل. عموما تنورة السكني شكلها يكون بشع لما تصير البلوزة ماسكه حيل او ضيقه، الافضل تكون البلوزة وسط مو واسعه تخبخب ولا ضيقة حيل.

فيه اكثر من محل يوفر تنانير للدوامات وراح اعطي نبذة مبسطة عن كل محل .. كوتون: اول كان يجيب تنانير رهيبة، اذكر ماكان له فرع الا بصحارى ومع كذا اروح خاصه لصحارى عشان اخذ.. حاليا تنانيره مو ذاك الزود، برومود حلوة تنانيرهم لكن بالفترة الاخيرة ينزلون نوع قماشها زي النايلون تخرفش وانتي تمشي :D، بالاضافة انو ماتثبت على جسمك ترتفع:(، زارا احب تنانيرهم، خصوصا التنانير اللي تجي مابين 99- 119 هذي مخصصه للدوام واحسها تكرف معاك بدون ماتنتش او تحبب، كمايو احب تنانيرهم الجنز تكرف وتعيش، لكن بالفترة الاخيرة بصعوبة القى تنانيرهم غالبا فرع المملكة فيه تنانير كثير، مكس تنانيرهم قوية وسعرها فيها حلوة للي ناوية تكرف التنورة. بس هذي المحلات اللي جربت تنانيرهم، لكن غالبا احب اشتري تنورتي تكون قماش عادي من محل مو تبع اي ماركة، او احيان افصلها بقماش رجالي عشان احدد الموديل مثل ماابي.

تنانير الجلد، الكلوش (واسعه حيل) ، التنورة اللي فيها اضافات كثير من حدايد او استراس، التنانير القصيرة حيل لتحت الركبة هذي الاشياء مو مقبوله لدوام الجامعه، ومناسبة اكثر لسهره او جمعة بنات، لازم تنتبهين انك بفترة صباحيه+ بجامعة، وعلى هالاساس نختار ملابسنا.

2- البلوزة:

بعض قوانين الجامعة تشدد ان البلوزة تكون كم حاير او طويل، وبعضهم ممكن يسمحون بنص الكم او الربع، لكن اذا جامعتك فيها مساحات كبيرة مثل جامعة سعود، وانتي ماتبين تصيرين سودا فالافضل تغطين يدك، حاليا الغالب في لبس الجامعة التي شيرتات المطبوعه والبولوشيرت والقمصان الملونة بس تضيفين عليها اكسسوار عشان مايكون شكلك لوزر .

الالوان مافيه تحديد لكن الاحلى انو تلائمين الالوان حسب الفصل، ففي الصيف الافضل تميلين للالوان الباردة مثل الازرق والموف المزرق والتركواز … الوان تحسسك بالبرودة ولا تعكس نور الشمس لدرجة تعمي عيون اللي قدامك.. لان بصراحه يكفينا نور الشمس اللي مو قادرين نشوف طريقنا من قوتها. بالشتاء الاحلى انو تميلين للالوان الحارة من الاحمر والاورانج والاصفر والفسفوري بدرجاته.. لان فصل الشتاء بارد، والشمس اغلب الوقت تكون غائمة فلذلك متروك لك المجال في الابداع بالالوان، بس لا تتحمسين حيل عشان ماتصيرين شمس ثانية على الارض

بلايز الشيفون والحرير والمشجرات والاستريتش والجنز والجلد بليز لا اشوف احد شاري منها، موديلها قديم (الجنز والمشجرات) والباقي مو مناسبة للصباح، بيصير شكلك كأنك سهرانه بعزيمة وجيتي للجامعة .. لذلك ابعدوا عن هالاشياء.

3- الشوز:

الجامعة = مشي كثير= لازم شوز مريح. عشان كذا نبعد عن الكعب العالي، والافضل دايم نلبس فلات او سبور، واذا ماتحبون هالانواع ممكن ناخذ شوز كلاسيك بكعب متوسط مايزيد عن 5سم.

من الافضل انو نلائم الشوز مع الوان ملابسنا او على الاقل مع الشنطة.

4- الاكسسوار:

هذي نقطة جدا مهمة ومكملة للبس، انتي طالبة جامعة مو مثل الثانوي ، فراح تلبسين اكسسوار، وتشيلين معاك غيرها بالشنطة او في يدك، من المفيد لك وولقروب اللي وياك انو معاك جوال، وتأكدي انك تاخذين رقم كذا بنت من مجموعتك عشان لو تغيرت القاعة او موعد المحاضرة يعطونك خبر، النظارة الشمسية مهمه لك ، وتأكدي انك ماتطلعين بالبيت الا وهي بشنطتك عشان تحمين عيونك من الشمس، المظلة برضو مهمة لبنات جامعة الملك سعود وجامعة الاميرة نورة لان المساحات كبيرة في الجامعة ووقت المطر او الصيف يقدرون يستغلونها عشان يقدرون يعدون الممرات، مو حلو شكلك ماشية تحت الشمس او تحت المطر، لذلك الافضل تاخذين وياك مظلة من النوع الصغير عشان ماتضايقك بالشنطة، بنات الملك سعود ممكن يلقونها عندهم بالجامعة، وممكن برضو تشترونها من زارا او برافوز او بنتون .. فيه كثير محلات توفرهم بالحجم المناسب للشنطة. اما بخصوص الاكسسوارات الثانية من حلق وسلسال تأكدي انو دايم تلتزيمين بالكلاسيك والسمبل.

5- المكياج:

الجامعة = دوام صباحي= مكياج خفيف. مو حلو تروحين بدون اي مكياج وبرضو لا تحطين حيلك بقوة. اهم شي تحطين الواقي، وتأكدوا انه يحمي من الاشعة فوق البنفسجية ويكون قوته من 30 وطالع، لان وقت بقائكم بالشمس كبير، ممكن نحط بودرة من النوع الخفيف مع انو اذا بشرة الوحدة صافية ماتحتاجها ، ماسكارا سودا خفيفه، بلشر وردي، قلوس.. نبعد عن الشدو والارواج الغامقة .. اذكر وقت ماكنت ادرس بالكلية كان رائج جدا الالوان الغامقة والثابته .. لكن الحين هالشي ستايل قديم والافضل ماتفشلون انفسكم وتحطونه.. القلوسات ممكن تستخدمون قلوس بودي شوب او ريميل او بينفيت.. كلهم حلوة وشبابيه. الماسكارا تبع ميبي لاين حلوة وخفيفة، ممكن تشوفون ماركات ثانية توفر ماسكارا يوميه.

البرونزاج لازم ننتبه لنقطة: الفكرة فيه انو الناس في فترة الصيف يطلعون البحر فتتغير الوانهم، اول مايبدا الخريف يرجعون لمناطقهم الاصلية فيختفي الاسمرار، لذلك مانبي اي بنت جايه في فصل الخريف وهي باقي بالبرونزاج او تستخدم مكياج برونزاج، برضو مو تستعجلون اول مايطلع الشتا وتسوين برونزاج، انتظري لين يشتد الحر ووقتها سويه. لما يدخل الخريف ويبرد الجو (مثل هالوقت من السنة) خلاص شيلي البرونزاج وسوي حمام مغربي عشان يشيل الاثار الباقية منه، وحلو ترجعين لونك الطبيعي في الشتاء.

6- الشعر:

لا تتكلفون كثير بالشعر، اذكر وقت ماكنت الف على المدارس عشان اخلص بحث الماستر شفت طالبة متوسط ملفلفة كل شعرها وفاكته كله، شكيت انها رايحه عرس مو مدرسة، طول الوقت عيني عليها مستغربة من شكلها . نفهم من هالموقف الاوفر مو مقبول بتاتا بالجامعة .. كل شي بسيط وسمبل حلو، اذا تبين شعرك استريت عادي بس لا تتركينه على راحته اربطيه او اجمعيه على جنب او ارفعيه ، الشعر القصير لهم الحرية فيه ، وممكن تخلين شعرك كيرلي باي طول كان لان شكله حلو بالجامعة.

7- الشنطة:

الشنطة شي مهم، وغالبا تكون من الحجم المتوسط للكبير. ادري انو فيه بنات توهم مخلصين الثانوي وودهم بشنط صغيرة لكن هالشي غير مقبول، الشنط الصغيرة للتمشيات والسهرات، بالجامعة انتي بتشيلين وياك دفتر محاضراتك، الكتب، ملازم واحيان جهاز التسجيل للمحاضرة واقلامك، بالاضافة لعبايتك والمظلة والنظارة الشمسية ومحفظتك وجوالك واحيان الايبود او الايباد وبعضهم يشيلون النيت بوك وياهم .. يعني صار معاك عفش منقلته وياك .

هذي الاشياء المهمة بشكل مختصر، وبما اننا بفصل الخريف راح اذكر ابرز الاشياء بهالفصل وايش المفروض تلبسون وكيف تختارون ملابسكم لهالفصل:

بعض البنات يتوقعون ان الالوان المحمرة هي رفيق الخريف، وهذا مفهوم غلط، كل فصل في الوان تكون رائجه والوان تختفي، في هالفصل الالوان الشائعه هي:

-لون الهندباء البيضاء
-لون التوهج الذهبي
-لون المرجان الأحمر الفاتح
-لون أقلام الروج الحمراء
-لون الأوركيد البنفسجي
-لون الشوكلاتة السوداء
-لون البحيرة الضحلة
-لون نبات صريمة الجدي أو يسمونها شجيرة الرحيق
-لون المحار الرمادي
-اللون الوردي الهاديء

بخصوص المكياج والاكسسوريز:

المناكير هالفصل رجعوا للألوان الغامقة

وبرضو دمج لونين سوا، والاضافات مثل الدانيل وغيرها .. لكن يضل الفرنش مانيكور في قلوبنا .. وهو الكلاسيك ، لكن ممكن نستخدم الوان ثانية مثل: Milky pink, easy green, baby blue, creamy yellow, nude, soft brown

بالنسبة للشعر ، الشعر القصير نفس ستايل شوجي وفاطمة الصفي في قصاتهم المحلوقة ..

طبيعه القصة تكون قصيرة من جهه وطويلة من جهه .. وتقدرون تبدعون فيها

للشعر الطويل مرة للأسف مافيه شي مميز، ويفي ناعم، او استريت، او جديله منفوخه

الشعر المتوسط برضو مافيه ذاك الابداع مثل الطويل، مجرد قصة وشوي مايل.. وقصات مشابهه لقصة فكتوريا

هذا بخصوص القصات .. بخصوص الالوان .. دايم الخريف يجيب لنا الالوان المحمرة .. وراح اجيب صورة لكل لون .. وانتوا لكم الاختيار

استفدت في معلومات هالتدوينة من المصادر التالية:

http://uturn.ly/

http://www.becomegorgeous.com/

إن أصبت فإنه من الله سبحانه، وإن اخطأت فإنه من نفسي

{سبْحانَك اللَّهُمّ وبحَمْدكَ أشْهدُ أنْ لا إله إلا أنْت أسْتغْفِركَ وَأتَوبُ إليْك}

العنوان من مقاطع من قصيدة لنزار قباني: درس في اللغة لتلميذة مبتدءة