❞ أفطر الصبح زيتونه وأروح المدرسة مزيونه ❝

بعد تدوينة طالبات الجامعة جتني انواع الاحتجاجات من خواتي.. لانهم بالمتوسط ويبون شي يناسبهم .. وطبعا كل محاولاتي لاقناعهم باءت بالفشل، فكان لابد اني اسوي تدوينة عن لبس المدرسة .. هالتدوينة بتكون للمتوسط والثانوي .. واكيد اهداء لموشا وبوشا .. اتمنى الكل يستفيد منها …

بالمتوسط والثانوي تغلط الطالبة لما تلبس وتتصرف مثل البنت البالغة، وبكذا تحرم نفسها من متع كثيرة، ميزة المراهقة انو احيان تكوني طفلة واحيان تكوني شخص بالغ، فالافضل ماتنحازي لاي جنب وتكوني بالنص، تصرفي بطيش، بحماس، بمتعه، وعيشي الحياة بكل ألوانها بدون تردد

بس فيه اشياء المفروض الواحد يتقيد فيها في المدرسة وما يتجاوزها، لان مدارسنا مو مثل مدارس برا فري، عندنا قوانين مدري وش تبي، وبعض المدارس باليهم ربي بمديره ومساعدة مخلين القوانين اصعب من الواقع

• انتي رايحه مدرسة  في الصباح لذلك نحاول نكون سمبل بكل شي اول شي عشان المدرسة، وثانيا عشان انو دوامنا صباحي.

• جونا جدا حار لذلك من الافضل انك تهتمي بنظافتك واستخدام مزيل رائحه العرق، المزيل حده يوم ونص – يومين لذلك من الافضل ماتسحبين عليه 3-5 ايام . ننتبه انو نشتري مزيل الرائحه مو مزيل العرق، لان الثاني ممكن يسبب سرطان لا سمح الله. اذا عندك فرط تعرق ومضايقك ممكن تروحين اي عيادة يعطونك حلول طبية وآمنه لهالمشكلة.

• من يوصل شعرك تحت اكتافك لو بـ 1سم خلاص لا عاد تفكينه كله، لان مهما سويتي فيه بيكون شعرك كأنك رايحه عرس.

• الشنطة شي اساسي بالمدرسة لان فيها كتبك ودفاترك واقلامك وعبايتك وبعض الملحقات، فلما تاخذين شنطة صغيرة ماتكفي الاكتابين وترمين عبايتك بالممرات عشان شنطتك صغيرة ابدااااا شكلك مو مقبول، كل من بيشوف شنطتك بيقول (على بالها تبي تكشخ) او ممكن يقولون (توها شاريتها وتبي تكشخ فيها) قليل اللي راح يمدحون شنطتك الصغيرة، وصراحه معاهم حق.. لانها مو شنطة مدرسة.

• المكياج المقبول بالمدرسة:

  • ماسكارا يوميه، وتأكدوا لما تشترونها انها يوميه ، فهي تعطيك شكل حلو بدون ما يلاحظ اللي قدامك انك حاطة شي برموشك، وممكن تستخدمي ماسكارا شفافه.

  • الروج استخدمي الارواج اللي على قلوس مثل نيفيا، وممكن تكتفين بالقلوس لان شكله حلو. الارواج اللي على احمر او بنك او ايا كانت الدرجة مو مناسبة لعمرك في المتوسط وبالثانوي بتكون اوفر على المدرسة .

  • البلشر كثير مايهتمون فيه لكنه مهم ، يعطيك خدود موردة وشكلك يكون رايق، استخدموا الالوان الوردية الفاتحه، بالنسبة للسمرا تقدر تستخدم العنابي الفاتح.. المهم انو اللي يشوفها مايحس انها حاطة بلشر.. شي خفيف.

  • اخر شي الكحل ممكن تستخدمينه داخل العين باي لون تبين ، اسود ، اخضر، ازرق، ابيض، رمادي.. كلها مقبوله بالصبح. لكن مانستخدم الكحل السائل.

• الاكسسوار:

  • حلو تلبسين حلق ناعم او اللي شكله زي الحلقة. مو مقبول ابدا الحلق اللي نازل من الاذن بشكل طويل .

  • السلاسل هالموسم تكون سلسلة ومعلق عليها شكل صغير نااااعم، وممكن شريطة. تلقون هالستايلات في اكسسوريز بكثرة.

  • الاساور لكم الحرية تبدعون فيها وتلبسون اي عدد، لان حلاة المراهقة بأساورها الكثيرة.

• الشوزات نحاول انها تكون مريحه، بغض النظر عن الموديل تأكدي ان شوزك مريح بالمشي. لما تجون تشترون البسوا الفردتين بالمحل وامشي فيها شوي عشان تتأكدين انها مريحه. ابعدوا عن الاشكال اللي تناسب السهرات اكثر.

• موديلات المراييل من الافضل انكم تاخذون تفاصيل صغيرة من الموديلات العامة، لكن اهم شي ان المريول مايصير مزحوم بالتفاصيل، او يكون ضيق مرة لدرجة ماتقدرين تتحركين .

هذي بشكل عام، الحين بتكلم بشكل خاص عن فصل الخريف والشتاء.

بخصوص الصبغات والقصات والالوان الدارجه هالموسم ممكن تشيكون هالتدوينة .. ماله داعي اعيد الكلام

الشعر:

ماراح اتكلم عن الالوان .. راح اتكلم عن اكثر ستايلات الشعر خلال فترة الخريف

الكعكه المرتفعه .. اول مرة شفتها كان بالدرامات اليابانية .. بس بدوا المشاهير يعتمدونها بأكثر من شكل وستايل.. ممكن تكون منفوخه مثل اول وحدة يمين، ويمكن مع قصة وممكن تكون ناعمه ومرتبه مثل الصورة الثالثة من اليمين

كعكه بستايل ياباني… هنا حبيتها لانها منفوخه حيل وفيها وردة .. عاد انتوا لا تحطون ورد لان الربيع خلص.. ممكن اي اكسسوار ثاني. الموديل الثاني يسار الكعكه جانبية والشعر نص مضفوف.. بس حلوة ورايقة بالايام الباردة .. لان وقت الحر مااتوقع فيه بنت بتتحمل شعرها على رقبتها

كعكه يابانية ثانية بس بستايل مختلف.. الشعر مبعثر من حولها .. انا حبيت هذي اكثر من الاولى.. لان فيها شوي حياة .. اللي قبل حسيت كل شعره لاصقة باللي جنبها كأنهم بالعسكرية

ذيل الحصان مازال متربع على القمة للي شعرهم طويل، شوفوا اخر صورة يسار، حبيت الشكل المبعثر.. بس شكل تمشيطة بعدين عذااااااااااب

الصورة الثانية على اليسار برضو غريبة وحلوة… ماعرفت تحت اي تصنيف تندرج

الجدايل هالموسم ظهرت بشكلين .. الاول تكون من قدام ومايلة.. شكلها مرة رايق وتبان اكثر بالشعر المخصل.. لكن حتى لو لون شعرك واحد بتكون مرة حلوة

النوع الثاني من الجدايل تكون جانبية ومنفوخه شوي .. اول وحدة يمين مو مبين النفخه .. لكن الثانية واضحه زين .. اخر صورة على اليسار مثل فكرة الجدايل بالاول لكن منفوخه شوي ومستمرة للخلف، حلو تجربونها للمدرسة لكن طبعا مع ربط الشعر

هذي التسريحه اسمها تسريحه البانانا – الموزة- وراجعه بقوة هالفصل سواء سهرات او صباحي.. بالصورة مرتبينها على اساس تناسب صباحي..

الشعر القصير للأسف مالقيت لكم تسريحات كثير الا هذي.. وطبعا فيها الشكل العام لتسريحات الخريف والشتاء وهي ان الشعر يكون على جنب.. حلو شكلها وستايل

اكسسوارات الشعر:

بالموسم الماضي الناس هبوا هبة مو طبيعيه بالاطواق بسبب مسلسل قوسب قيرل.. هالموسم كل الاطواق اختفت عدا نوع واحد بس:

اللي ماعندها مثل هالنوع خلاص ترفع كل اطواقها وتطلع الربطات.. لان بالخريف والشتاء راح نلبس الربطات بأكثر من شكل

شوفوا الصور حاطين الربطه باي شكل، سواء الشعر ملفوف مثل الكعكه او مربوط او متروك على حريته .. وكلها حلوة وتناسب الصبح، بس حاولوا تتجنبون الربطات اللي فيها كرستال .. لانها ابدا مو مناسبة للصبح

هنا الربطة حسيتها احلى .. لان الشعر مبعثر باليسار.. اليمين استمرار للستايل اللي طلع بنهاية الصيف وكثير شفنا فنانين مسوينه .. بالصيف سووه بربطات الجلد المجدوله ، بالخريف تقدرين تسوينه بالربطات العادية او الشرائط الناعمه

الاحذية:

مدرسة وراح تمشون كثير وطول اليوم لابسين الشوز فلازم تكون مريحه، وطبعا مدارسنا ماتعطي الطالبات اي حرية بالكعب لذلك كل شوزاتهم واطيه .. بيني وبينكم اريح لكم وبتقدرون هالشي لما تكبرون وتصيرون مضطرين للكعب

اول ستايل لهالفصل الكونفرس او الـ اول ستار -اسم الماركة- .. راح يكون ستايل هالفصل فيه بعض الستراس او الاضافات الحديديه، او تكون من قماش ثقيل يذكرنا بالقماشات الكاروهات الصغيرة البريطانية، وبتكون غالبا برقبه مثل البوت، لكن للي مايفضل النوع اللي برقبه ممكن ياخذ النوع الكلاسيك العادية بألوان مو فاقعه، تكون الوان قوية بدون توهج الفسفوري. لاحظوا اخر ثنتين يسار، احمر واصفر لكن اللون مرة هادي.. هذا هو ستايل خريف وشتاء بهالنوع من الشوز.

النوع الثاني بين الفلات والستايل الرياضي، الشوز اللي بالاسفل هذي كثير وماليه السوق تقليد وأصلي، لكن الفكرة الاساسية فيها أن هذا النوع طبي ومريح للرجل، لكن طلع عليه تقليد كثير، فانتبهوا ان الشوز تكون مريحه مو شكل على الفاضي. الموديلين بأعلى الصورة ظهروا من سنة تقريبا واختفوا، هالفصل رجعوا بسبب أن بعض المشاهير لبسوه ، فأنضم لقائمة شوزات خريف وشتاء2010

الفلات… هالفصل بيكون مزين بالشرائط الكبيرة والصغيرة والمتوسطة، بالاضافة لبعض الاشكال من السحاب.. من لفتي هاليومين بالسوق شفت بعض المحلات موفرته .. لكن لسى مابعد انتشر بقوة بالسوق

شايفين هالشوز اللي طاحوا فيه الخلق وصرنا نلقاه بكل الاسعار حتى الهرم صار يبيعه؟؟

خلاص نظفوه وحطوه بعلبه وارفعوه، لانه ابدا مو ستايل هالموسم، شوزات القماش تغيرت وراح تكون قريبة من هالاشكال

راح تكون مثل اول وحدة يمين فوق.. واذا مرتاحين تلبسون نفس الستايل القديم اختاروا اللون ابيض ومرسوم عليه، لكن الرسمة هالمرة مو مثل الموسم السابق، راح تكون الرسوم لكل شوز مختلفة عن بعض، واحيان لما تحطونهم جنب بعض تكون الرسمة متصله بين الشوزين

الرسمات اللي زي كذا خلاص مو مقبوله هالموسم .. مثل ماقلت فوق لازم يكون فيه اختلاف بين الرسمتين .. عادي بتحسون بالغرابة اول مرة تلبسونها كأنكم لابسين فردتين مختلفتين .. لكن ممكن تخلون الرسمة سمبل وبتتعودون

الشرابات راجعه بقوة هالموسم، لكن مو بالطول القصير، لازم تكون طويلة للركبة او تحتها او فوقها بشوي، حتى فيه بعض المصممين نزلوها مع الصنادل، شكلها مو مرة بس حلوة على الابوات .. طبعا انتوا محد بيشوف رجولكم من هالمراييل فحلو تاخذون شرابات لنص الساق، نفس ستايل الموسم وبتكون مريحه لكم. شرابات الصباح المفروض تكون ثقيلة نفس الصورة .. نبعد عن الشفافه، ادري اننا صيف لكن الشرابات الشفافه هالموسم بتكون مسائية فقط .

للي مو حابين يلبسون شرابات يقدرون يلبسون هالشي، صراحه مااذكر اسمه بس شفته كثير بالشتاء الماضي ولا كان عليه اقبال، لكن هالسنة راجع بقوة مع الشوزات الربع بوت او المغطيه بالكامل. اهم نصيحه للي راح تعتمد هالستايل انو ترفع القطعه شوي عن الارض عشان ماتتوسخ وتخرب، وحاولوا تاخذون نوع مو زحمه زي الصورة عشان يناسب مع المريول الطويل.

الشنط:

شنط هالموسم للمدارس ماتغيرت كثير، واعتمدوا تصاميم شنط الماسنجر والشنط الخلفية المايله على سبور واقمشة الجيش الثقيله.. لكن فيه بعض المصممين ركزوا على بعض الموديلات بشكل اكبر لهالموسم:

شنط فيها تدخيلات من الصوف سواء كقماش (يمين) او كتريكو (يسار). هالشنط حلوة لكن اللي ناوية تستخدمها تنتظر شوي لين يبرد الجو اكثر، لان الحين شكلها بس يجيب الحر.

هذا شكل شنط الظهر اللي سائدة بفترة الخريف والشتاء.. تكون مثل الكيس وتقفيلها عن طريق الربط… وممكن تنشال على الظهر او على جنب… اذا ماخانتني الذاكرة اذكر وقت ماكنت بالمتوسط كانت دارجه هالشنط بقوة

شكل ثاني لها يتقفل من فوق بنفس الفكرة لكن مو نفس الطريقة.

شكل اضافي لشنطة الظهر، نلاحظ انها مربعه وتشبه شنط الرحلات، والقماش المصنوعه منه شبيه بأقمشة الجيش الثقيلة. عموما هذا النوع من القماش هو الافضل لما تكون شنطة الواحد تتعرض لأقسى المعاملة، وماراح يرفعها او يحطها بمكان نظيف وواسع.

هالشنطة تشبه موديل الماسنجر لكن ممكن تنشال على الظهر.. من الجلد وتصميمها يشبه الموديل الاول على اساس انها موجهه لطلبة مدارس واكيد معاهم اغراض كثيرة.

شنط ماسنجر كلاسيك لهالفصل ونلاحظ مافيه اي شي جديد فيها ..

ملابس الشتاء:

بعد الخريف راح يدخل الشتاء، وبتكونوا محتاجين ملابس تدفي فراح استعرض بعض موديلات الجاكيتات والملابس الشتوية اللي ممكن الواحد يلبسها فوق المريول.

جاكيت الجلد بياقة من الصوف او الفرو، هذا النوع راح يكون شائع جدا هالفترة .. وممكن ينلبس فوق المريول بدون مايتقفل.

ستايلات ثانية للجاكيت ونلاحظ فيها انو مو شرط يكون الجلد لماع ممكن يكون شامواه والفرو تختلف كثرته لكن كلها يكون باين من عند الياقة. عيب هالجاكيت انه مو مناسب للحركة الكثيرة ..

حلو الواحد يلبسه للاستعراض بس

هنا اشياء كلاسيك مستمرة مثل صديري الفرو والبلوفرات الطويلة والصوفيه الناعمة، كلها راح تكون موفرة هالموسم للي مايحب الجلد. عن نفسي افضل هالستايل للمدرسة لانه انعم وأسهل للحركة في المدرسة .

إن أصبت فإنه من الله سبحانه، وإن اخطأت فإنه من نفسي

{سبْحانَك اللَّهُمّ وبحَمْدكَ أشْهدُ أنْ لا إله إلا أنْت أسْتغْفِركَ وَأتَوبُ إليْك}

مصدر صورة المقدمة:

http://blogs.ksu.edu.sa/lilak/page/2/

صور التدوينة مجمعه من كذا موقع متخصصه بالفاشن