ليه كل مايجي طاري | الشتاء | يجي | طاريك | معه




كل عام وانتوا بخير.. الله يعيده علينا وعليكم بالصحة والعافية برفقة احبابنا.. والله يتقبل من اللي حجوا ويرزقني ومن ما حج بحجة العام القادم بإذن الواحد الأحد

بهالتدوينة راح اتكلم عن ستايل الشتاء،اللي حمسني انزل هالتدوينة انو من يومين رحت السوق الا القاه مليااااان بضاعة العام الماضي، الا ماندر. واللي يقهر ان رغم البضاعة قديمة مانقصوا بسعرها ولا ريال >_<. قهر الواحد يشتري بضاعة قديمة وبنفس السعر، وكلها كم يوم ويدخل ديسمبر وبيخفضون على هالبضاعة وبموت قهر لاني اشتريت بضاعة قديمة وبنفس السعر، وخلال اقل من شهر خفضوها >_<

راح تخصص هالتدوينة لطالبات المدرسة وطالبات الجامعة ، للموظفات ياليت تراجعون هالتدوينة.


ملابس الشتاء راح تكون قريبة من اللي كتبته بالخريف مع فرق انو اللون الاحمر والاورانج الفاقع بدت تختفي من الملابس، وبدلوها بالاوان الشتوية التقليدية .. انا اسوميها الالوان الميته XD. طبعا القطع صارت اثقل من الخريف اللي كانت اثقل قطعه من القطن الثقيل، بالشتاء اخف قطعه بتكون صوف خفيف او مفرغ، والصوف الثقيل راجع بقوة هالفترة .. يقولون ان برد الرياض هالسنة بيكون غير شكل وابرد من العادة .. عاد مدري صدق او لا .. بس الصوف الثقيل من الحين طالع بالاسوق.. راح اتكلم عن الجاكيتات اول شي بما انو هو الشي اللي حاليا مالي الاسواق، والكل وحدة يكون عنده بلوفر طويل او جاكيت قبل يدخل الشتاء ونتورط انها خلصت من السوق >_<


Holiday2010Holiday7 H&M 2010 Holiday Campaign

هالقطعه طلعت بنهاية شتاء العام الماضي ولا خذت حقها بالكامل، لذلك رجعوا نزلوها مرة ثانية هالفصل، الحلو بهالقطعه انها تنلبس صباحيه او مسائية بحسب الملابس اللي تحتها.  لما نبحث شوي بنلقى انها طلعت بأكثر من شكل، بعضها قريب من الشال الكبير زي الصورة، وبعضها قريب من الجاكيت وبنشوفها بالصور اللي بعرضها بعدين.  الانواع القصيرة منها تكون زي الصورة تطلع اليد من تحت، فيه انواع ثانية طويلة شفتها في زارا فيها فتحات على الجوانب لليدين.

هذا يوصلنا للجاكيتات، الموديلات هالفصل تتراوح مابين الطويله والمتوسطة، القصيرة طلعت بشكل ثاني هالفترة . نلاحظ بالجاكيت انو قريب من ستايل القطعه اللي عرضتها فوق.. الجاكيت اليمين فيه فتحات تطلع منها اليدين وحلو للي لابسته تكون اكمام بلوزتها الداخليه طويلة. اللي على اليسار مثل الوشاح على الرقبة فقط ومصنوع من الصوف. برضو الموديلات اللي بنص كم او ثلاث ارباع كم دارجه هالفترة وممكن تقتنون واحد او اثنين منها .

الفرو راجع بقوة هالفترة وبأكثر من شكل، اما على الرقبة فقط من الصورة يمين، او يكون كل الجاكيت/ الصدرية فرو من جو ومن برا جلد ناعم. النوع الثاني شفته في برومود من ضمن الكلوكشن الجديد، واحتمال انو نشوفه بكثرة خلال هالفترة. وكل هالنوعين ممكن نلبسها صباح او بعد العصر.. الموديل يسار ممكن نلبسه بالمسا للمراهقات اذا كانت القطعه اللي تحته فخمه شوي.

قطعه الفرو الكلاسيكية مستمرة معانا ومناسبة اكثر للسهرات الرسمية من بعد الساعة 8 المسا. الصورة يسار حلوة للسهرة على فستان او بنطلون جنز، بتناسب اكثر البنات من عمر 13- 22 وممكن تلبسها شخص بعمر اكبر اذا قدرت تركبها مع قطعه تناسب عمرها وحالتها الاجتماعية .


الستايل البريتش دارج هالفترة وبقوة، من حيث شكل تقفيلة الازرار الجانبية، صفين الازرار، القماش المنسوج بلونين، الازرار المنقوشة بعلامة ملكية، التنانير القصيرة المكسرة، القماش الكاروهات الصوفي. واي شي تشوفونه بالافلام البريطانية التاريخيه القديمة راجع بقوة في الشتاء واطن انه بيستمر للصيف مع ستايل الكاوبوي. عموما بما ان الجاكيتات قطعه اساسية في الستايل البريتش فهي طلعت باكثر من شكل واكثر من خامة بالشتاء.


هنا الجاكيت جاي بخامة ثقيلة وتصميمه بسيط، وفيه خامات صوف ثقيلة ومخمل، وبعضها عليها علامات على اعلى الصدر مثل شعارات المدارس. طبعا ننتبه لنقطه بالنسبة للجاكيت: لازم نلاحظ البطانة الداخليه للجاكيت ، اذا ناوين نلبسه بغير الشتاء نتأكد ان البطانة تكون عادية ساتان اوحرير لانها ماتدفي كثير، اذا نبيه للشتاء فقط ناخذ خامة بطانتها ادفى شوي، ويكون خامة الجاكيت ذاتها تدفي.

Black (Black) Military Jersey Jacket | 205641701 | New Look Black (Black) Military Velvet Jacket | 198867501 | New Look

هذي شكلين من ستايل البريتش في طريقة الازرار، ونلاحظ ان بعضها تميل للروك وبعضها نحسها عسكرية .. طبعا الخيارات كثيرة مرة لان كل المحلات منزله هالانواع. لكن ننتبه اذا كنا اشخاص مانحب نقفل الجاكيت فهذا النوع بتاتا مايناسبنا، لان الموديل مايبان الا لما تتقفل، اذا تركت مفتوحه فشكلها مو مقبول 😦

Black Pattern (Black) Baseball Jacket | 206523609 | New Look Black Pattern (Black) Contrast Baseball Jacket | 213529909 | New Look

بما انو نتكلم عن ملابس الجامعيات والطالبات بالمدرسة فكلهم ينحصرون بفترة المراهقة، وحلو البنت بهالعمر تعيش حياتها وتلبس اللي يناسب عمرها، وهالشي يوصلني للقطعه اللي حطيت صورتها . هالستايل امريكي معروف في الجامعات والثانويات، دايم نشوفه في الافلام في الشتاء لما يلبس الطالب جاكيت جامعته او مدرسته او النادي اللي ينتمي له، او لما تلبس البنت جاكيت صاحبها . هالفترة نزلت بعض المحلات هالستايل ضمن ملابس المراهقين والجامعيين، وبرضو ممكن ناخذه من مواقع الشوبينق اون لاين لانه متوفر بسعر معقول.

demin jacket3 The Denim Jacket

جاكيتات الجنز قطعه مهمة هالفترة، طبعا راجعه بكل الستايلات لذلك لو عندك بالدولاب جاكيت قديم ممكن تستخدمينه لان الجنز قطعه تتخزن

demin jacket6 The Denim Jacket


القطع الجديدة من جاكيتات الجنز نازلة بموديل كلاسيك، والقصير، والستايل البريتش.


الصوف المنقوش المشابة لستايلات الكريسمس نازل هالفترة بأكثر من لون وأكثر من ستايل.. حلو ناخذ قطعه نستغلها بهالفترة .. برضو جاكيتات الجلد بستايل الروك اند رول راجعه بقوة .. لكن الجلد مايناسب الكل .. لازم يكون جلدك مشدود عشان ترتاحين بالجلد، لان حتى لو كنتي نحيفة بس مترهلة شوي الجلد بيضايقك مع الحركة .


هالنقوش نازله هالفترة بس بشكل خجول جدا، اتوقع لانها خذت حقها العام الماضي، لكن فيه بعض المصممين نزلوه ضمن عروضهم للشتاء هالسنة.

zara november preview Zara November 2010 Collection

الصدريات الصوف موجودة هالفترة وممكن نلبسها سواء بطول قصير او طويل. فيه ستايل شفتها مع الصدريات مرة عجبني وحسيته يشبة ستايل وحدة من البنات (MsCandy ) وطبعا يناسب لي بما اني شخص براد لأقصى درجة >_<. لاحضو الصورة يسار كيف تركيب القطع. تي شيرت عادي تحت ممكن يكون كم طويل او قصير، وعليه صديري صوف، وجاكيت كبير، بكذا الشخص البراد ممكن يقلل من القطع شوي شوي مو فجأة ينصدم يا جاكيت ثقيل او بلوزة خفيفة :$


الاكسسوارات الشتوية راح تكون هاي نيك منفصل سواء بقبعه او بدون، هالقطعه اشتهرت العام الماضي مع الدرامات الكورية اللي كان تصويرها بفترة الشتاء لكن ماعرضت الا باخر الشتاء عشان كذا البعض تعب وهو يدور زيها بالاسواق والمواقع بس ماكانت متوفرة بكثرة، هالشتاء انبسطوا لانها متوفرة بكثرة بكل المحلات، شفتها بمحلات متفاوته في المستوى لكن السعر ثابت وهو مابين 80 – 120 ريالز.

الاكسسوار الثاني القبعات، هالستايل مرة حلو للقبعات احلى من الكوفية اللي تفغص الراس ماتدرين اللي قدامك ولد او بنت >_<. هالستايل انثوي اكثر وممكن تلمين شعرك جواه او تخلينه كله برا، المهم تنزلين بعض الخصل على وجهك عشان تكملين الستايل الانثوي.

فيه نوع ثاني من القبعات احسه يناسب طالبات المتوسط والثانوي، لانه ستايل انثوي على طفولي.. مرح وحلو .. وراجع بقوة هالفترة لدرجة ان المحلات الكبيرة منزله منه.

موشا افرحي .. هالقبعات ماتزال دارجه .. فيه نوعين منها .. النوع الجلد المبطن بالفرو .. والنوع الثاني صوف ملون او سادة .. لكن الملون حلو اذا البنت تبي شكلها يكون كيوت

طبعا كل ماركة او محل منزل موديلات مختلفة .. المهم انكم تجربون اذا تناسب شكل وجهكم او لا.. ونتذكر انو مانجمع كل الشعر جواها لازم نطلع شعرات من هنا وهناك عشان اللي يشوفنا يدري ان هذا الشخص بنت مو ولد 😉

الايشاربات والشالات من الاكسسوارات المهمة بالشتاء. الصورتين لشالات درجة ثقالتها وسط وممكن تنلبس حتى لو الجو دافي شوي، وتجي حلوة مع البلايز العادية والجاكيتات .

النوع التقليدي الصوف الثقيل، حلو تاخذينه بالوان قوية طالما ان الملابس بتكون باهته بالشتاء.


sock1 New Ways To Wear Socks

الشربات هالسنة راح تكون طويلة لفوق الركبة واحيان لنص الفخذ وبتكون من النوع الثقيل الشتوي.. راح تنلبس مع جميل انواع الشوزات حتى اللي شكلها صيفي. طبعا هالشي كثير عندنا ممكن مايتقبلونه بس حلو للي تبي تسوي لها ستايل خاص 😀

الكيلونات من فترة الهالوين والشتاء تغير شكلها .. بدال ماتكون النقشة على كامل الرجل صارت بجزء معين ، واذا كانت كاملة بتكون بشكل قريب من التاتو. هالستايل معتمدين فيه على الستايل السكسي او المغري، لان بفترة كانت هالنوع من الكيلونات تنباع مع اللانجري، وحاليا صارت مع الفساتين القصيرة >_<

ballet flats 3 Comfy Ballet Flats Shoes

الشوزات تقليدية وعبارة عن ابوات عادية او بستايل جيشي، اللي يهمني الفلات والبالرينا.. راح تكون من جلود ثقيله او من الصوف والاقمشة الشتوية، فيه نوع طلع يكون مقدمته من المعدن وشفته بكذا محل . بهالانواع تتراجع البالرينا اللي انتشرت بالفترة الماضية واللي يكون على مقدمتها شكل بارز مثل الدائري سواء وردة او صوف او جلد او حتى ريش، وبتكون الفلاتات اكثر نعومة . برضو الفلات بالستايل الرسمي مثل انواع LV وفندي وغيرها مستمرة بالشتاء خصوصا انو ممكن نلبس عليها الشرابات.

الشنط بهالفترة بتبعد عن الشكل اللي ينشال على الظهر وبتكون بنوعين، النوع اللي ينشال بالجنب، بالاضافة للانواع اللي تتقفل بلسان. حاليا ظهور هالشنط بالسوق شوي خجول لكن على الربيع راح تنتشر بقوة

الاكسسوارات الطويلة بالالوان النحاسية المذهبة او المحمرة هي اللي دارجه هالفترة، الاكسسوارات الذهبية الصريحه او الفضية غير دارجه هالفترة.


تسريحات الشعر عادية مافيه شي مميز..

عموما فيه بنوته حلوة سألتني عن مواقع تعطي ستايلات للشعر وقلت لها انو راح احط بتدوينة الشتاء كذا رابط لمواقع احبها عشان اخذ فكرة ايش ممكن اسوي لشعري


http://www.lucido-l.jp/library/index.html

هالموقع فيه كذا ستايل بس عموما كلها تناسب الشعر الناعم على الشكل الاسيوي.. بس طريقة الشرح مرة رائعه حتى المستحضرات اللي يستخدمونها يكتبون ايش هي، وممكن تشوفون نوع المستحضر وتدورون بدين عنه


http://www.ebeautyblog.com

هالمدونة من فترة لفترة تحط ستايلات للشعر وتشرحها بالصور واحيان بالفيديو.


http://www.youtube.com/user/binosusume#g/u

قناة باليوتيوب فيها ستايلات شعر وطريقة عملها.


المكياج راح يكون ثقيل وقاتم ، لكن حلو اننا نخففه بالصباح وبالمساء لك الحرية فيه.

طبعا فيه قاعدة عامة معروفة بالمكياج، انو بالصيف نخفف ثقل المكياج ونميل للون البرونزي والبينك الفاتح، الارواج تكون عبارة عن قلوسات .. بالشتاء يكون العكس، الناس تستخدم البودرة الثقيلة والاساس بأغلب السهرات، اللون البرونزي يختفي بتاتا في الشتاء، وممكن نستعيض عنه للي يحبونه باللون الذهبي ، المكياج عموما يكون اثقل شي بالحياة XD

بالمكياج الشتوي راجعه الالوان الغامقة .. راح يكون حلو لما تختارين روج غامق شوي.. بس لازم ننتبه انو مانغمق كثير في الفترة صباحية .. بعد مااعتمدنا على القلوسات بالصيف حلو ناخذ شي فيه شوي لون بالشتاء.

نفس الشي بالنسبة للمناكير.. الالوان الغامقة دارجه هالفترة .. ولكم الحرية بالابداع فيها


اخر شي بالتدوينة راح اتكلم عن ملابس السهرة ..


من بداية السنة شفنا الفساتين القصيرة للسهرة .. وهالشي مستمر لهالفترة .. لكن بس حبيت انبه انو ديننا واحترامنا للاشخاص من حولنا مايخلينا نلبس هالقصر… حلو البنت تلبس قصير بشكل محتشم، بأن تلبس كيلون ثقيل تحته او يكون طول الثوب مقبول من نص الساق واطول، برضو اذا كانت الوحدة سمينة او مربربة مو حلو تطلع لحومها قدام الناس.. اذا هي ماتستحي تكشف هالجزء من جسمها ولا تحترم الناس اللي بتقابلهم فالناس اللي قدامها راح ينتقدونها او بيتكلمون فيها من وراها .. وبعض الكبار في السن ممكن يرفضون انها تسلم عليهم بهاللبس.. وبالاول والاخير هي اغضبت ربها باللبس بغض النظر اذا هو ستايل او لا.. لذلك اتمنى اذا عاجبكم فستان قصير انكم تعدلون فيه على اساس يكون طولة مقبول .

Sexy Strapless Party Dress Sexy Party Dress Styles

Sexy Sequin Party Dress Sexy Sequin Party Dress

بهالشتاء راح نلبس مع هالفستاين قطع فرو او جاكيتات ثقيلة لما تكون الحفلة او العزيمة بأماكن مفتوحه مثل الشاليهات والاستراحات .. لكن لما تكون بمكان مغلق مثل الزواجات فبيكون عادي نلبس اي موديل.

اتمنى تعجبكم التدوينة .. وسوري تأخرت فيها :$

مصدر الصورة
http://browse.deviantart.com/?qh=&section=&global=1&q=winter#/d1sw6zf
Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s