10 صعوبات سوف تواجهك في سيدني


٢٠١٤٠٤١٥_١٤٥٥٥٠

ما يخفى على الجميع كيف بالابتعاث راح تواجهه صعوبات كثيرة. لكن بالنسبة لاستراليا ولسيدني خصوصا, راح اذكر اكثر عشر اشياء واجهت صعوبات معها.

  1. العلامات التجارية للاطعمة: تعودنا بالسعودية على انواع محددة من الأطعمة والمطاعم وحتى الحلويات. المبتعثين الى امريكا راح يلاقون بعض من هذي العلامات وغالبا نفس النكهه. باستراليا لازم الشخص يستعد نفسيا ان مافي اي شي له علاقه باي علامه تجارية بالسعودية . باستثناء بعض الشوكليت المشهورة 😦
  2. وصفات الاطعمة: هذا من الاشياء اللي بتتعلمونه بأصعب صورة.. من بعد تجربتي مع اكلهم صرت ازهد حتى بصور الاكل في التمبلر .. من يصدق صار اكل التمبلر ما يشهي!!  الاكل هنا وصفاتهم مافيها توابل والملح خفيف جداااا واذا كلفوا على اعمارهم حطوا فلفل اسود او باربيكا، فاحس كأني بالعصور المظلمة لما ماكان فيه توابل. الشي الثاني ان بعض الاكلات نفس الاكل العربي لكن الطعم شي ثااااااني تمااااما. مثل الفلافل والشاورما، حصلتهم اول اسبوع وصلت سيدني وانبسطت مررررة فطلبت شاورما اكلها بالمول مع اخوي والفلافل خذتها تيك اوي للبيت. اول لقمة من الشاورمااغرورقت عيوني من تحطم امالي بالطعم وبديت اعطي الفلافل نظرة من جنب واحاول اتوقع الى اي حد راح تتحطم امالي اكثر معاها، وطبعا مثل ما توقعتكان الطعم شي غريب عجيب. حاليا بعد سنة مااعرف هل انا تعودت على الطعم او بديت احصل مطاعم افضل. لكن حصلت محل يبيع فلافل طعمها افضل من اول صدمة والشاورما عرفت ان المشكله مو بالدجاج بس بطريقة لفهم للساندويتش، فصرت اشتري الدجاج بصحن وارجع البيت الفها في خبز عربي واعيش جو مع نفسي. للمعلومية ترى الشاورما باستراليا اسمها: كباب، الا في المحلات العربية اسمها زي ماهو معروف شاورما.
  3. العلامات التجارية للأجهزة: زي ماهو معروف في اسماء تعتبر افضل شي وعلامات متوسطة وعلامات رخيصه ومستواها مو ذاك الشي. هذي المعرفة تكتسبها مع العمر والخبرة او من خبرات الناس المحيطة فيك. للاسف في استراليا ماراح تستخدم اي شي من هالمعرفه لان كل الاسماء جديدة. صار لي موقف لما كنت ادور بعض الاجهزة. بالبداية التلفزيون بس الحمد لله لقيت باناسونيك وخذته مع انه مو رخيص بس لاني اعرف العلامه واعرف نوعيتها .. لكن لما وصلت لاجهزة المنزل هنا تنحت بقوووووة . حاليا محتاجه Blender للعصير وعلى قد ما لفيت مابعد عزمت اشتري اي واحد لاني مااحس جودتها كويسه واذا اقتنعت فيه لقيته اعلى من ميزانيتي (لي تقريبا الحين ثلاث شهور ابحث ومحتارة).
  4. عدم وجود مكيفات في المنازل والمباني: هذي عاد الصدمممممممة. اول ما جيت كان صيف والشقه مافيها الا مروحه لكن الحمد لله بعدها بشهر بدا الشتاء. الصدمه كانت من كم شهر لما بدا الصيف وحاليا انا بشقه مافيها مروحه ولا بلكونه فانوااااع الكتمه والحر. لا ترتاعون لان فيه حل وهو ان الواحد يشتري مكيف بورتبال للبيت ومع انه غالي (+٤٠٠$) لكن معقول ومشكلته الوحيدة انو لازم الخرطوم يطلع من الشباك!
  5. اتجاه الشوارع: تعودنا بالسعوديه ان السائق بالسيارة يكون يسار، ولما يجي الواحد يقطع الشارع يلتفي يسار،يمين وبعدها يسار ثاني. هنا لو سويت هالحركه ممكن تموت لازم تلتفت اول يمين وبعدها يسار ومرة ثانيه يمين، او خلك مثلي كل اتجاه مرتين قبل اقرر اقطع الشارع. فيه كمان شي للان ما تعودت عليه وهو ان فيه شوارع داخل الاحياء او بالشوارع الفرعية الاولويه للمشاة والسيارة هي اللي تمشي بسرعة منخفضة . للان اذا شفت سيارة انتظرها تقطع قبل امشي وتوقف السيارة ويأشر لي السايق امشي
  6. غلاء الاسعار: اذا الاسعار بالسعودية غالية فانتوا ما بعد شفتوا غلاء سيدني. عشان احطكم بالصورة اي شي بالسعودية له نفس السعر باستراليا مع الفرق ان العمله هي الدولار. والدولار = ٢.٩ طبعا سعر الصرف في اقل حالاته قبل كان الدولار = ٣.٧ .. فتخيلوا كل شي بهالبلد ثلاث اضعاف سعره بالسعودية.
  7. Small Talk: الشعب بهالبلد مغرمين بالمحادثات الصغيرة .. بالبداية كنت اتوقع انها مجرد تحية بسيطة من الكاشير او الويتر او بالمحلات .. بالبداية كنت اتعامل بلباقه عربية شوي جافه لكن كل ما تعمقت اكثر اكتشفت ان المفروض ادخل معهم بالحديث واخذ واعطي بالكلام .. خذ الموضوع مني كم شهر عشان اتأقلم على الوضع .. طبعا مازلت مو متعودة تماما عليه مع اني شخصية اجتماعيه .. بس احس شي غريب اني اناقش اشياء مع شخص اول مرة اشوفه.
  8. الحشرات: استراليا معروف انها منطقة خصبه جدا ومعروف ان اي نوع من الحشرات او الحيوانات يجي فيها تزيد اعدادهم بشكل كبير بسبب زيادة الخصوبة. لدرجه يبدون يعانون من اعدادهم مثل الابل والضفادع السامة. حشراتهم غير انها غريبة واول مرة الواحد يشوفها، عليها احجام عملاقة. فالواحد يعاني من الانواع الجديدة + الاحجام العملاقة. مرة واحد استرالي قال لصاحبتي الفرنسية انها اذا تبي تعيش باستراليا لازم تتعود عليها وتقوي قلبها انها تقتلها اذا حصلتها بالبيت! في السعودية شي مستحيل اذا ما تشوف ذباب حولك او ناموس بالشتاء.. هنا مستحيل ما تشوف عناكب.. لدرجة شبكات العنكبوت بكل مكانحتى على السيارات! وعلى فكرة حجم الناموس بالسعودية ثلث حجمها باستراليا.
  9. الروائح: الروائح وما ادراك ما الروائح. مااقول ان النظافه عدم، بس لما يكون الهوا يصفقك في وجهك وقدامك كم شخص صيني الافضل يبعد الواحد لان الريحه تصرع. ومو بس بالشارع احيان اركب المصعد بالعمارة والقاه خياس بسبب شخص ركب قبلي مدري من متى. وكمان بالباص والسوق واي مكان خصوصا لما يكون بمنطقه سكنيه او اسواق لوكال اما في المناطق التجارية فالوضع افضل.
  10. الشوق لاشياء ما تخطر على بالك: شي متوقع الواحد يشتاق لبلده وروتين الحياة والاشخاص اللي حوله، الشي الغريب ان بسبب الاشياء الآنفة الذكر راح يلقى الواحد نفسه يشتاق لاشياء غريبة. من اغرب الاشياء اللي اشتقت لها الرز، طبعا انا شخص مااكل الرز الا اذا امي -الله يطول بعمرها- اصرت علي. لكن هنا بديت اسويه، مرة ابيض ومرة احمر ومرة كبسة او رز بشعيريه وكبسه لحم  حتى انا ماعرفتني وانا اسويه. وتحسبون اكله بشهيه؟ للاسف مازلت مااحبه بس اشتهي ريحته خلال الطبخ. كمان العطورات للي يحبون العود والعنبر والمسك راح تفقدونها تماما اما بسبب عدم وجودها هنا او بسبب الروائح الجميله.

 

 

 

هالتدوينة بلا مبالغة خذت تقريبا شهر وانا احاول اخلصها اما مو لاقية وقت او مو لاقيه كلام اكتبه

اخترت اكتبها بالعامي لان حسيت فيه اشياء وصفها بالعامي اقرب .. لكن مااعرف هل تدويناتي الجاية بتظل فصحى او لا .. لاني صراحه استمتع اكثر بالفصحى

 

 

 

* الصورة من تصويري
Advertisements

5 thoughts on “10 صعوبات سوف تواجهك في سيدني

  1. تدوينة جمميلة و ترجع لك ذكريات
    عادي أصدقك انها خذت شهر بدون مبالغة ، عندي تدوينة بكتب فيها أشياء عن أستراليا و هي من العام بالأرشيف
    عاد مدري إذا بتشوف النور و الا بتظل مكانها

    ع العموم ، مثل ما قلتي
    الأكل العربي و بالذات الفلافل ، طعمه يجيب الغبنة
    بس فيه جربت عنده الفلافل و لذيييذ ، أنا الحين بالسعوديه و أشتهيه

    و بالنسبة للخلاط ، أنا حقي من شركة Breville , وهذا شكله

    حلو مره و سعره مناسب بعد

    و ايه المكيفات صصصدمة ، بالصيف كنا ننام بالصالة عشان المكيف
    الله يعينك هالفترة و ان شاء الله يجيكم البرد قريب
    حر أستراليا خانق

    و بالنسبة لغلاء الأسعار ، صادقة فيها و الله

    الحشرات سمعت كثير يتأذون منهم و بالذات بالصيف و أشكال غريبة و أحجام كبيرة
    بس أحس رواعي البيوت يعانون منها أكثر و يعتمد على حسب المنطقة اللي انتي فيها
    بس العناكب أتوقع موجودة بكل مكان ، حتى جزمتك شيكي عليها قبل تلبسيها p;

    و عاد و احنا باستراليا من جد تشتهين أشياء غريبة
    اشتهيت هريسة و أنا ما آكلها ! عاد مدري السالفة عناد و الا ايش

    تدوينة حلو و ممتعة
    و موفقة ان شاء الله

    إعجاب

    1. ايه العناكب لقيت كذا مرة جوا الشوز او على ملابسي خصوصا اذا كنت حاطتها قريب من البلكونه
      صرت انفض كل شي قبل البسه
      شكرا على الخلاط بشوف يوم انزل اشتريه

      إعجاب

  2. من تجربتي بامريكا
    لقيت صعوبه ببعض الاشياء مثلك
    اولها ماركات الاجهزة، حتى هما مختلفه وما اعرف اختار والصراحه للان اطيح بالشين
    حتى المواعين او السكاكين طفشت وانا اشتري وتصدي ، شكل الغالي بس هو اللي بيعيش معي 😕
    الغلاء وكذا مشكله تواجهنا كلنا لما نحول اي مبلغ من الاجنبي للريال بننصدم، بس اعتبري الدولار دولار ولا تضربين بسعر الصرف وبترتاحين وبتشوفين انك بتصرفين عادي واسعارهم عاديه والا بتتعبين نفسيا xD
    تدوينه ممتعه ✨

    إعجاب

    1. بالبداية كنت احول المبالغ وانهار نفسيا
      حاليا طبقت قاعده اني اقسم مصروفاتي حسب دخلي بدون مالتفت لكم سعرها بالريال وكم سعرها بالسعودية لان بموت قهر غير الصدمه
      مثل ذاك اليوم رحت اشتري القطعه اللي تحول الشريحه من ميني لمايكرو واشتريتها بعشرة دولار .. وبالسعودية يعطونك اياها بريال او ببلاش XD

      إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s