موقع Korea depart – عملية الشراء


koreadepart21

بالتدوينة السابقة عرفت بالموقع وكيف نسجل فيه وايش اقسامه.

الحين نجي لعملية الشراء من الموقع:

اول شي عشان نشتري لازم نفهم ايش المعلومات بصفحة المنتج.

12

بالبداية طبعا اسم المنتج

  1. هذا خاص بالريفيور اللي مسوينه الناس عن المنتج وتقييمه.. بس ترى مو شرط صحيح، تجربتي مع هالمنتج بالذات شينه .. برجع اكتب عنهم.
  2. هذي كلمات البحث اللي تنطبق على المنتج.
  3. نسبة الخصم على المنتج.. واحيانا ما يكون فيه اي خصم.
  4. سعر المنتج.
  5. وزن المنتج.. هذا مهم لما يكون لنا وزن محدد مانبي نتعداه وراح اشرح بالشحن ليه نبي يكون لنا لميت بالوزن.
  6. هذي الاختيارات خاصه بالتجار او اللي يبي يشتري كميه، لان تحدد كم بوكس تبي وكم حبه جوا البوكس. احيان يكون هنا فيه خصم اضافي بحسب عدد البوكسات.
  7. هنا نحدد عدد الحبات اللي بناخذها . واحيان يكون فوقها اللون اذا المنتج له اكثر من لون مثل المكياج.
  8. اضافة للسلة.
  9. اضافة لقائمة الامنيات.

13

اسفل المنتج فيه معلومات مهمة لكن للاسف مو كل المنتجات يحطونها. راح تلقون مكونات كل مستحضر بحيث نشوف اذا فيه منتةات حيوانيه او دهون خنزير او حتى مواد عندنا حساسية منها. ويعرض لك ايش تأثير المنتج وطريقة الاستخدام. طبعا طريقة الاستخدام مرة مهمه لان احيان يجيك المنتج كل معلوماته بالكوري فتروحين ترجعين لصفحته تقرين. مثل ما صار وياي مع هالمنتج بالذات.

كمان بنحصل تعليقات المستخدمين وتقييماتهم، واسئلة حول المنتج وممكن كمان تسألين ويجاوبون عليك. والتاب الثالث عن منتجات شبيهه لهالمنتج او متعلقه به واحيان منتجات من نفس البراند، اخر شي معلومات عن الشحن والاستعاده وحلو تقرين عنها قبل تطلبين.

15

اخترنا المستحضرات وحطيناها بالسلة، (ترى احيان يتنح الموقع وتختفي الاغراض، عشان كذاحطوها بالويش ليست احتياط عشان ما تجمعونها ثاني، لانها صارت لي مرتين)، الخطوة الأولى نختار الشيك اوت وراح يطلع لنا هالخطوات.

الخطوة الثانية يعرض السعر للمستحضرات وكميتها وسعر الحبة والوزن التوتل ولكل حبه وبالاخير يجمع السعر والوزن.

17

انواع البريد عندنا الاقتصادي والممتاز. الاقتصادي ارخص وياخذ وقت اطول ولكن اقصى وزن له هو كيلوين. اكثر من كذا راح يجبرك الموقع على الشحن الممتاز.

18

هنا لما اخترت الشحن الاقتصادي وسعر الشحن حسب الوزن.

16

هنا لما اخترت الشحن الممتاز لنفس القطعة شوفوا كيف تدبل السعر. كل نوع شحن حاطين له التسعيره لكل وزن وشارحين طريقة التقريب للوزن اذا شحنتك مو نفس الوزن تماما.

19

الخطوة الثالثة راح يطلب تعبية عنوان الشحن وبعدها نختار طريقة الشحن. بهالخطوة راح يعتمد نوع الشحن اللي اخترناه بالخطوة السابقة.

21

تحت شوي راح يطلب منك تعبئة بيانات المشتري.

احيان ما يقبل برقم الهاتف انو نحط (+966) راح نستبدلها بـ (00966).

22

تحت باخر الصفحة نعبي معلومات الشحن. نفس الطلبات السابقة ونفس الملاحظة بالنسبة لرقم الهاتف.

23

الخطوة الرابعة خاصه بالدفع. بالبداية يعرض معلومات الاغراض اللي بالسله وقيمة الشحن والتوتل. تحتها راح يطلب معلومات اضافية في حال بعض الاغراض انتهت قبل يشحنون لك طلبك فكيف تبين يرجعون لك القيمة سواء بالنقاط او الفلوس. انا افضل الفلوس.

25

بعدها يطلب منك تختار بين الدفع دايركت بالبطاقة سواء فيزا او ماستر كارد او ممكن تدفع بالباي بال. شخصيا افضل الباي بال لان في حال ماوصلت اغراضي او غشني البائع اقدر ارفع قضية عندهم، بعكس البطاقة اللي ما تضمن شي. في حال اخترنا الدفع بالبطاقة لازم ننتبه لسالفه عنوان الفواتير وهو نفس العنوان اللي عبيتيه في البنك مو عنوان الشحن، الا لو كان لهم نفس العنوان. وادري نبهت قبل بس كثير يغلطون هالشي ويتهاونون فيه مع ان فيه مواقع ترفض العملية واحيان تسوي بلوك على البطاقة وترسل تنبية للبنك انها مسروقه بسبة هالحركة. فبليييييز لا تتهاونون فيها.

لاني طلبت الدفع بالباي بال ماطلب مني اعبي عنوان الفواتير لانه خذاه من الباي بال.

24

اخر شي نعتمد عملية الدفع وراح ينقلنا لموقع الباي بال عشان الدفع.

26 27

الخطوة الخامسة والاخيرة راح يعرض الاغراض وكميتها واسعارها للحبة والمجموع والوزن لكل حبة وللمجموع. كمان يعرض سعر الشحن مع التوتل وعنوان الشحن والتاريخ المتوقع لاستلام الشحنه. هنا لازم نوافق على كل المعلومات عشان يعتمدون الشحنه ويبدون يجهزونها.

 

التجهيز خذ منهم اسبوعين، وللاسف بعدها ارسلوا لي ان فيه كذا منتج خلص وبيرجعون لي قيمتهم. بنفس اليوم ونفس اللحظة جاني مع ايميلهم هذا ايميل من الباي بال انهم رجعوا قيمة الاغراض.

28

30

  • اغراضي تم طلبها بتاريخ 23/06/2015
  • التبليغ عن المنتجات الغير متوفرة واعادة المبلغ كان بتاريخ 30/06/2015
  • الشحن كان بتاريخ 30/06/2015
  • الاستلام كان بتايخ 06/07/2015

 

الصراحه وصلت بدري مرة وماكنت متوقعتها .. اصلا وصلت وانا بمكة واستلموها اهلي.

الاغراض كانت كثيرة لاني انا وخواتي جمعناها مرة وحدة.

31

هذي الاغراض اللي طلبتها .. راح احط روابطها وبكتب تدوينة ثانية اعطي رايي فيها بعد الاستخدام.

 

 

Advertisements

19 thoughts on “موقع Korea depart – عملية الشراء

  1. يا عسسل كيف طريقة الدفع عن طريق البنك الباي بال هل هي سهله او تحتاج وقت مافهمتها لان ماعندي فيزا ونفسي اطلب من نفس الموقع التاجرات اسعارهم مره مرتفعه فرق عن اسعار الموقع

    إعجاب

    1. الباي بال عبارة عن موقع وسيط للدفع
      تحطين بطاقتك والعنوان حق الفواتير للبطاقة وبالبداية يسحب منك ٣ ريال عشان يتأكد ان البطاقة صحيحه
      وخلال اسبوع لاسبوعين يرجع المبلغ ويصير حسابك عندهم مفعل
      ميزة الموقع ان لو البائع لعب عليك ولا ارسل الاغراض او حتى ارسل شي ثاني تقدرين من الموقع ترفعين قضيه عليه
      والشي الثاني انو يقلل من السرقات من الفيزا .. لان وقت الدفع تعطينهم رقمها و رقم السكيورتي وهالشي يخليهم يقدرون يسحبون اي مبلغ يبونه .. بس الباي بال ما يعطيهم ارقامك مجرد يرسلون له المبلغ اللي يبون وهو يخصمه من عندك
      صراحه اي موقع مو مشهور او معروف مااثق اشتري منه الا بالبي بال .. وعندك اي باي واتسي حق الاشغال اليدوية مستجيل اشتري من اي بائع ما يقبل الباي بال

      إعجاب

  2. السلام عليكم .. تتهني يارب

    بس ابغى استفسر .. هل ممكن توصلني الاشياء بدون مااحط الرمز البريدي لانه ماعندي ؟؟

    إعجاب

    1. هو يعتمد على نوع عنوانك
      بعض الدول مافيها رمز بريدي وعادي يوصل
      بس السعودية لازم رمز بريدي او بتضيع الشحنه وممكن ترجع لهم وما توصل لك

      إعجاب

  3. انا سويت بالباي بال حساب وخصمو مني وادخل بنفس صفحتهم بيوزري بس ماعرفت كيف افعله عن طريق رقمي انه تجيني رساله مافهمت ؟
    اذا عندك شي نتواصل فيه من برامج التواصل اتمنى تفيديني فيه وشكرا

    إعجاب

    1. للاسف تواجدي ضعيف ببرامج التواصل.. لكن راسليني على تويتر وراح ارد عليك ❤️
      وهو الباي بال شوي لحسه مخ
      انا سويته وماعرفت وطنشت يمكن سنه، وبعدين اضطريت له ورجعت اجرب وهفست ام الدنيا لين ضبط 😅
      بس للامانه هم طوروا طريقة التسجيل وخلوها سهله، اول كانت معقده شوي

      إعجاب

  4. ماعرف حسابك بتويتر عطيني وابشرك شريت من الكوري عن طريق الباي بال 🌞تو الحين 😴💙 عرفت احس اضمن حتى يخصم المبلغ بالضبط كامل وبالسعودي مب بالدولار

    إعجاب

    1. @Lafa0
      سوري من دخل رمضان ونظامي حوسه واحسبني رديت عليك .. لكن يبدو اني رديت بعقلي
      كويس ماشاء الله ضبط معاك.. اذا وصلت خبريني كيف التجربه معاهم اذا عجبتك او لا

      إعجاب

  5. اختي يسعد مساك و مشكورة على المعلومات القيمة الصراحة انا اشتريت من الموقع و مشي الحال بكل شي بس ما حطيت بريد اعطيت اشارة انو ما في لانو فكرت بدهم بريد الي شخصي عند موعد التسليم حطو انو العنوان غلط هل ممكن لانو ما في بريد راح انجن لانو كتير حابة الطلبية يا ريت تفيديني لو عندك فكر
    و الله يجزيك الخير هي ايميلي ابعتيلي عليه الرد لو امكن لانو ما بعرف هون كيف اعرف الرد ازا رديتي Info.alfadel@gmail.com
    و شكررررررا كتير الك

    إعجاب

    1. معليش التعليق تبعك كان بمكان لفه وتوني انتبهت له .. ما نزل ضمن التعليقات
      في حالة انك اشتريتي بدون ما تسوين اكاونت فتتبعين شحنتك عن طريق رقم الطلب

      إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s