نصائح لعام جامعي جديد

بكرة بداية جديدة لعام جديد وطلبة يبدون مراحل جديدة. وكاكل مرحلة نتوجس خيفة من الموضوع ونتوتر ونبدا نبحث بالنت عن نصائح من أشخاص سبقونا، ونستفيد من خبرتهم.

من يومين وانا جالسة مع اختي، الا تقرا لي بوست بالانستقرام نصائح لطلبة الجامعة. وصراحه غشيت ضحك لان فيه معلومات كثيرة مو صحيحه. ولأني عضو هيئة تدريس بالجامعة اعرف ان هالاشياء مو شرط تضبط. فقررت اكتب تدوينة خفيفة نصائح للطلبة الجامعيين الجدد.

1. بطاقتك الجامعية هي هويتك بالجامعة. تأكدي أنها معك دايما، لان كثير بيطلبونها منك.
2. كل الجامعات حاليا مبانيها كثيرة وتضيع الواحد. لكن الحمد لله فيه كروكيات مبسطة لها في النت. حاولي تحفظين نسخه من الكروكي بجوالك احتياطا لو ضعتي.
3. الدوام الرسمي بالجامعات من 8-2الظهر، واقصد هنا الموظفات (بإستثناء جامعة الامام). فإذا محتاجة شي منهم راجعيهم بهالاوقات عشان ما تتورطين وما تحصلينهم.
4. الدوام الرسمي للمحاضرات من 7:30 – 4 العصر. والبوابة تفتح 12:30 فلو حبيتي تطلعين قبل الوقت لازم تسوين بطاقة خروج (تخلف!) وإجراءتها شوي حوسة لكن لو جدولك فيه ايام تخلصين أبكر وعندك من يرجعك للبيت فالافضل تسوينها بدري.
5. الحضور بالمحاضرات شي راجع لك، محد راح يجي ويدورك او يسحبك على المحاضرة. بس حطي ببالك انو اذا تعدت نسبة غيابك ٢٥٪ من الحضور الكلي راح ينزل لك حرمان. لائحة الجامعة تقول ان حتى لو جبتي عذر طبي يظل الغياب لكن يدون انه بعذر، يعني ترى العذر الطبي ما يحذف الغياب. في هالحالة لو وصلتي للحرمان راح يرجعون لاعذارك ويشوفون هل ممكن يرفعون الحرمان بناء عليها او لا. عشان كذا بطلوا حركات الاعذار المدفوعه.
   • طريقة حساب ساعات الحرمان:
   • [ عدد المحاضرات بالاسبوع ] × [ ( 0.25 ) × عدد اسابيع الدراسة ] = [ الرقم هو عدد الساعات اللي بعدها ينزل لك حرمان ]
   • مثال: محاضرة من 3 ساعات:3 × [ ( 0.25 ) × 15 ] = 11.25 = 3.75 محاضرات تقريبا.
6. قبل تدخلين المحاضرة لازم تعرفين انت اي نمط تعلم يناسب معاك. هذا الشي راح يساعدك تعرفين وين افضل مكان لك عشان تجلسين بالقاعة. الاشخاص البصريين الافضل يجلسون باماكن متقدمة عشان يساعدهم يشوفون كل شي. الاشخاص السماعيين الافضل يكونوا بمكان يقدرون يسمعون كويس بدون ما تأثر عليهم الازعاجات الخارجية سواء من الشباك او من الممرات. الشخص الحسي الافضل يعرف ان تركيزه بيكون بالعمل وبيواجه صعوبة شوي بالمحاضرات الالقائية فلازم يحاول يكتب مع الاستاذ او يرسم خريطة مفاهيم. واللي ما تعرف هي اي نمط تقدر تجرب من هنا.
7. المعدل وما أدراك ما المعدل. بعض الطالبات ماتهتم باول فصل دراسي وتقول بعدين بترفعه. لكن للاسف نزول المعدل شي زي الحلاوة ورفعه محتاج مجهود جباااااار. عشان كذا حاولي باول فصل دراسي ما ينزل معدلك عن 4.5 ولو حصل لك 5 أفضل وأفضل. لان مواد التحضيرية عامة وفيه مجال انك ما تنقصين، لكن مواد التخصص تبعثر درجاتك مثل تفرق الكرات في البلياردو.
8. كل استاذ بالجامعة له قوانينه الخاصه بالمحاضرة وللاسف كل واحد ومزاجه. فالوضع مو مثل المدرسة فيه قوانين واضحه تسوينها وما يقدر يقولك شي. عشان كذا اول محاضرة مهمه اهم شي بالحياة. لان الاستاذ راح يشرح طريقته ونظام المادة وتوزيع الدرجات.
9. بأول المحاضرات يفضل يكون معاك منظم بالايام والتاريخ عشان تحددين عليها مواعيد اختبارات الفصلية وتسليم المشاريع والكويزات. تقدرون تشترونها من المكتبات او تستخدمون نموذج جاهز. وطبعا لا تنسون تحددون اخر موعد للاعتذار عن الفصل. هنا تقويم من تجمع طلبة جامعة الملك سعود، وهنا تقويم ثاني من موقع نوته.
10. المراجع المستخدمة في كل محاضرة ماراح تكون مثل كتب المدرسة يعطونك كتاب واحد وتحفظينه. بعض الاساتذه راح يشرح من كتاب واحد، وبعضهم بيستخدم مرجع اساسي وكذا واحد فرعي، وبعضهم بيستخدم مرجع اساسي وكذا واحد فرعي بالاضافه للمعلومات اللي يذكرها خلال الشرح. فركزوا اللي يرضى عليكم ايش طريقته.
11. بخصوص شراء الكتب افضل شي تشترين المرجع الاساسي وتستعيرين الفرعية من مكتبة الجامعة. احسن من تجميع الكتب عندك وانت بتدرسين منها فصل واحد او اثنين.
12. بعض الاساتذة (ما اقصد نفسي) ما يشرحون كل شي بالمحاضرة. يحددون الصفحات او الفصول اللي تغطيها المحاضرة ويركزون على الاشياء الصعبة اللي تحتاج شرح. الاشياء اللي يذكرونها سريع مو معناها انها ماتجي بالاختبار. (ارتاحوا لان هالحركة بس تصير بالمستويات المتقدمة).
13. لكل استاذ ساعات مكتبية ما تقل عن 4 ساعات  أنا أسميها الساعات الذهبية.هذي الساعات مخصصه للطلبة، لكن للاسف الطلبة ما يتذكرونها الا اذا باقي اسبوع على الاختبارات ووقتها اصلا حتى الاستاذ ماراح يعطيك معلومات تبين الاسئلة. أي سؤال عندك عن المحاضرة او شي ما فهمتيه اعرفي متى هالساعات وروحي له. لا تتوقعون انهم مالهم نفسي او بيسفهونك زي معلمين المدارس، بالعكس بيفرحون انك جيتي لهم وبيوضحون لك وممكن يعطونك مرجع او موقع بالنت يشرحه بشكل ثاني.
14. أي مشكلة تواجهك مع جدولك وحذف واضافة المواد ارجعي لمشرفك الاكاديمي. أي مشكلة تختص بالمادة او حضورك او درجاتك راجعي فيها استاذ المادة. وكمان لو عندك ظروف او اشياء تأثر على تحصيلك الافضل تقولينها بصراحه لاستاذك عشان يراعيك.
    • اذكر كان عندي طالبة فجأة صار ادائها منخفض وتحضر متأخر ووجهها مو على بعضه. مسكت صاحباتها وسألتهم وش فيها البنت واذا وضعها كويس؟ ما جاوبوني بس قالوا الافضل اسألها واصر عليها تعلمني لو عيت .. صراحه خفت شوي وش سالفتهم … كلمت البنت وصار عندها مشكلة كبيرة بالبيت وانه صعب تحلها وتفكر تحذف الترم!! القهر كان باقي بس ثلاث اسابيع ويخلص الترم، وهي تخرج فبتتأخر وتحتاس. جلست مع مشرفتها وتناقشنا اننا نقدر نخلص تدريب البنت بدري ونعطيها درجاتها بشرط انها تحضر يوم واحد باخر الترم. وافقت البنت ومشينا الامور وتخرجت ماشاء الله. الشاهد انو صارحي استاذتك لان محد يدري وش فيك اذا انت ما تكلمتي – محد يقرا افكارك.
15. اخر شي بخصوص المواد. كل مادة لها رمز ورقم واسم، صعب تحفظينها كلها لكن المهم تحفظين الرقم والرمز. لان كثير يجوني طالبات وتعطيني رمز المادة او اسمها وماقدر افيدها بشي، او الاسوء تعطيني الرقم وأتوقع انها مادة بقسمي وبعد حوسة نكتشف انها تقصد مادة ثانية. الارقام غالبا تكون متشابهه بين الاقسام والكليات لكن الرمز يوضح هي تابعه لاي قسم. الاسم هذا شي اضافي لك وقليل موظفين يحفظون الاسماء الا اللي يدرسها.
16. الصداقات بالجامعة لازم ننتبه لها اكثر ونتأنى باختيارها. الطالبات مو من منطقة او بيئة وحدة. فالاخلاق والتصرفات تختلف من وحدة للثانية. اختاري الصاحب اللي يضيف لك بدون ما ينقص منك.
17. في أول الايام لا ترتاعين اذا ما كونتي صداقات. استغلي الفرصة واستكشفي الجامعة وشوفي النشاطات اللي فيها والاندية وممكن تاخذين لفه على النادي الرياضي او المطاعم المتوفرة.

 

وعام جميل وموفق للجميع