Korea depart – تجارب المنتجات (١)


SAM_2746

بتدوينتين سابقة تكلمت عن موقع Korea depart. الأولى كانت تعريف عن الموقع والثانية كانت عن طريقة الشراء. بهالتدوينة حابة أعطي رايي بالمنتجات اللي شريتها. اعتذر ان التدوينة خذت وقت اكثر من اللازم، بس هالشي ساعدني استخدم المستحضرات بشكل اكبر واشوف نتائجها على مدى طول.

مشترواتي كانت خليط بين علاجات للبشرة، وبعض انواع المكياج. طوال الفترة الماضية كنت استخدمها بشكل متواصل وحاولت قدر المستطاع اعطيهم فترة كافية عشان تطلع النتيجة. بعضها كان جميل والبعض الثاني للأسف كان فاشل. هذي كانت مشترواتي:

SAM_2770

للأسف الشديد كانت من المشتروات اللي اصابتني بخيبة أمل. أبدا مو قد الشهرة والاقبال عليها والسبب مو لاني مالقيت نتائج منها، ولكن لانها ابدا ماناسبت بشرتي.

SAM_2771

في العلبة موجوة أربع بيضات: الأبيض للصباح والبني للمسا والاسود للرؤوس السودا والاخضر للبشرة الدهنية. ومذكور ببعض المدونات انه ممكن تستخدمينها مثل الماسك لما تكونين رغوة كثيرة ثقيلة وتتركينها على وجهك خمس دقايق.

اول استخدام كان للسودا وبعدها حسيت بشرتي جافة مرة، وهالشي حفز افراز الدهون بشكل اكبر، بالاضافة ان الجفاف سبب عدم راحه لبشرتي وحرارة لدرجة حطيت عليها فيسودين. جربت بعد كم يوم البيضا بس للاسف نفس الشعور وإن كان الجفاف اقل شوي. فصرفت نظر عن الباقي وعرضتها على خواتي.

ثنتين من خواتي بشرتهم جافه واستخدموا البيضا والبنية فقط ويمدحونها وانها تعطي ريفريش للبشرة. فممكن حسب نوع البشرة تتفاعل معك.

 

SAM_2756

من الأشياء اللي أتعب وانا اقولكم انها جميلة وثابته. جربت الذهبي والأسود بعيد الفطر وكان ثابت طول اليوم. الاسود عيبه انه خفيف شوي لكن الذهبي درجته جميلة على البشرة السمرا واتوقع بيكون أجمل على البيضاء. البنفسجي ماجربت الا الموف وصراحه صرت غالبا احطه لان يعطي الجفن اضاءة ورديه ناعمة وأنثويه.

SAM_2758

هذي أرقام الدرجات اللي اشتريتها. ويميز هالبراند انها صديقة للبيئة.

 

SAM_2753

هذا من الأرواج اللي اشتريتها لسبب طفولي بحت. صراحة العلبة عجبتني وحسيتها شي كيوت ورخيص فمو مشكلة اشتري واحد. خذت اللون الاحمر والنود .

SAM_2750

ما كنت مأملة كثير عليهم ولا حتى على الألوان بس صدموني. اول شي فيه نسبة ترطيب للشفايف، واللون ثابت جدا. حتى لما يروح بنهاىة المناسبة يبقى اثر على شفايفك فما يختفي تماما. والصادم إني استخدمتهم فترة وبعدين رجعت لارواجي اليومية من ماك وانصدمت انها صارت بالنسبة لي جافة مقارنة بهذي.

SAM_2752

ألوان المجموعة بالموقع سبع ألوان، وهذي أرقام اللي خذتهم.

 

SAM_2763

من الأشياء اللي ابدا مو عملية. فكرته انك تحطين طبقة ثقيلة على شفايفك وتنتظرين لين تجف تماما. بعد كذا تشيلين الطبقة اللي جفت ويكون ترك لون احمر على شفايفك. قررت اجربه واشوف كيف لونه ومتوقعه انه بيكون افتح من اللي شفته بالموقع. حطيت طبقة سميكه وجلست انتظر تجف، الى الان وضعي سليم. المشكلة لما بدت تجف شوي اكتشفت اني مااقدر اقفل فمي عشان ماتصق شفايفي ببعض. ومسأله اني اقعد فاتحه فمي خمس دقاق مزعجة، لكن قلت احاول اصبر ونشوف النتيجه. للأسف بعد ما جف وشلت الجزء الجاف كان اللون خفيف مرة ومو مبين.

 

SAM_2779

السيريوم هذا قريت عن فيتامين C وكثير يمدحونه. قررت اخذ هالنوع للبشرة المرهقه لان مؤخرا صحتي مش ولابد وباين كثير على بشرتي. ميزته ان مع الاستخدام اليومي يفرق كثير وكل من حولك راح يلاحظ الفرق بمكياج او بدون. عيبه ان اول ما تتركينه كم يوم يرجع الوضع زي ماكان. لكن مبدئيا جميل ولطيف. اختي خذت فيتامين C وتمدحه وافكر اشتريه المرة الجاية.

 

SAM_2759

قلم الحواجب اللي اشتريته بس لان اختي شاريته. بس طلع جميل جدا وصرت استخدمه يوميا للدوام. سريع ولونه حلو وثابت. طريقة القلم تساعد في رسم الزوايا وتنحيفها او تعريضها. وكون معاه فرشه اغناني استخدم فرشة منفصلة.

 

SAM_2766

الصدمة إنه يوم اجي اكتب التدوينة اكتشف انهم غيروا شكل البوكس. شكيت بنفسي ورجعت ادخل صفحة الاوردر ونفس الرابط يطلع لي شكل ثاني، ما علينا.

هالأوراق مافيها شي مميز وسبق اشتريتها من المعرض اللي عندنا .. اللي يفرق هو السعر، بالمعرض يبيعونها شي وعشرين ريال. وبالموقع حصلتها بدولار ونص.

 

SAM_2760

الكحل هذا مو مميز ولا شين، مستواه عادي. مناسب للاشخاص اللي يفضلون القلم على الكحل السايل، وسعره معقول.

 

SAM_2768

صراحه هالشي اكبر نصبة. الحمد لله اني ماكنت متوثع كثير منه بس الفكرة ضحكتني واشتريته. اول شي مستحيل تثبت على خدك، ضاع وقتي وانا اثبتها. بالاخير قررت انسدح بس برضو مو راضيه تثبت مكانها، كله تتزحلق. قلت ممكن ان خدودي كبيرة لدرجه ماتثبت عليها ورحت ابحث عن تجارب ناس، وكلهم اتفقوا معي انها مزعجة وكل شوي تزلق. اصلا اول ماتطلعونها من العلبة ماتدرون كيف تحطونها من كثر ماهي تتزحلق بين اصابعي. وللاسف مافي اي نتيجه تذكر، المفروض تعطي تورد طبيعي للخدود لكن ماشفنا شي.

 

SAM_2773

هذا من المنتجات الجبارة ويستاهل الاعلان عن اللاين اللي مسوينه. فكرته انو زي السكراب بس سيولته اعلى. تحطين كمية على المناطق اللي فيها رؤوس سودا وتدلكينه لمدة خمس دقايق، وبعدها تغسلينه. اعترف اني لما شفت الالية ماتخيلت انه ممكن يسوي اي شي، بس بعد ما استخدمته انصدمت انه شالها بفعاليه. ممكن اللي عندهم رؤوس كبيرة ماراح تأثر كثير، لكن انا نفع معي بالرؤوس الصغيرة اللي ماتشيلها اللصقات.

SAM_2774

واضح هنا ايش قد ايش قوامه ناعم، والنقط البرتقالية تعطي تأثير السكراب الناعم. وريحته لطيفة فيها شوي من البرتقال.

 

SAM_2764

مااعرف كيف اوصف هالستيك. اكيد قابلتوا كوريات او صينيات تكون بشرتهم اول ما يقومون شي ولما تحط مكياج شي ثاني. وتكون شي قريب من صفاوة الورقة لدرجة ماتدرين هي طبيعية او مستخدمة شي. هذا المستحضر بالضبط يسوي نفس هالشي.

هذي صورة من نفس الموقع توضح تأثيره، ولما جربته على بشرتي عطاني نفس التأثير. عيبه ان شكله يخلي اسهل تحطينه على منطقه صغيرة ومايناسب التغطية الكامله. وكمان لونه شوي فاتح لكن يختفي الفرق اذا استخدمتي البودرة.

 

SAM_2754

هالمستحضر من الاشياء اللي لما استخدمته خنقتني العبرة وسألت نفسي أنا وين كنت عايشة وماعرفته ولا استخدمته ولو بالغلط. كم مرة حطيتي مكياج ثقيل وضبطتيه ولما وصلتي المناسبة لقيتي وجهك يلمع وتحاولين تخففين اللمعان بالبودرة وتلقينه يقلل من البلاشر او يخفي الكنتور او يخفي اللمعه تماما؟

أو تكوني بتطلعي طلعة خفيفة وبعد ماحطيتي الواقي اكتشفتي ان بشرتك الدهنية تمارس هوايتها انها تلمع وماتدرين هل تخففين اللمعة بمناديل ازاله الدهون او تستخدمين بودرة؟

SAM_2755

هالعلبة عبارة عن بودرة خفيفه شفافة تتحكم بالدهون وتقللها ولا تأثر على المكياج او تبين ان حاطة شي لو كنت تبين وجهك طبيعي. صارت دايم معاي في الشنطة باي خرجة سواء مناسبات او طلعة خفيفه او في الدوام.

 

SAM_2791

اشتريت هالمستحضر على اساس انه زيت تغذية للاظافر. والغلط مني اني ماقريت وصفه، لانه طلع شي ثاني مثل الطلاء الشفاف وما ينفع احطه طول الوقت. قررت استخدمه بطريقة ثانيه فصرت احطه اساس قبل اي لون احطه. لاحظت فرق كبير من ناحية ان الالوان القويه ماعاد علقت باظافري. وكمان ان مع الاستخدام المتكرر للمزيل مالاحظت ان اظافري تبين تعبانه او متضررة. فصار شي اساسي استخدمه قبل اي مناكير واكون مرتاحه اذا احط المناكير وازيلها بنفس اليوم.

 

SAM_2788

برضو هذا اشتريته بسبب الشهرة القوية والاعلانات عنه وكان اقل من المتوقع. ماحسيت بالفرق اللي يذكر وحتى ازالته للرؤوس كانت عادية. فيه مستحضر ثاني بكتب عنه ان شاء الله المرة الجاية كان بالنسبة لي افضل من هذا ونتيجته اقوى.

 

SAM_2761

اول مااشتريته حبيت انه صديق للبيئة ومات لكن فكرة العبوة تخليني اتردد استخدمه. عبارة عن ضغط من تحت زي القلم ويطلع الروج. المشكلة انك ماتقدرين تتراجعين عن الضغطات وترجعينه لجوا! بالاضافة انه جاف شوي مقارنه بالنوع الثاني اللي اشتريته لكن مايعتبر سيء. لكن ما افكر ارجع اجرب الوان ثانيه منه.

SAM_2762

اللون اللي خذته رقم ٣ وردي.

 

SAM_2775

اخيرا هالثلاث اشياء الجميلة والكيوت. الفرشة المسطحه خذتها للماسكات وجميلة جدا لانها تحط كمية خفيفة على البشرة وتوزعه بالتساوي. Ball شريتها للماسكات الطبيعية او الخلطات اللي فيها اضافات وحوسه لاني اكره استخدم اغراض الأكل. ودي بشي مخصص بس للماسكات. ميزتها انها سيلكون وسهل تخزنينها باي مكان. اخر شي فرشه البلاشر. كنت متوقعه انها مو كويسه بالاستخدام بسبب ان شعر الفرشه اطول من انه يكون سهل الاستخدام بس اصلا انا شاريتها للتصوير ولا استخدمتها  ابدا.

 

هذا جزء من الاشياء اللي اشتريتها. الباقي راح انزلها تدوينه ثانيه ان شاء الله قريب.

Advertisements

4 thoughts on “Korea depart – تجارب المنتجات (١)

  1. الى الآن ماجربت اي منتج كوري .. لأن من كثر المدح ع منتج ابطل اشتريه 😁 والشعب ماشاءالله مادح كل شي … حمستيني ع بيضة الرؤس السودا و والسيروم … احتاج شي ينعش بشرتي 😦 ..
    بما اني كتبت كومنت .. من زمان ابي اسألك .. 😷 ايش صار ع استراليا .. خلصتي دراستك ؟
    وشكرا عالتدوينة المفيدة 💗💐

    إعجاب

    1. المضحك ان المنتجات اللي ممدوحه لي ماعجبتني .. والاشياء اللي اشتريتها بس كذا عجبني
      يمكن لاني اخترتها بعنايه وقريت محتوياتها وتأثيرها 🙂
      بخصوص الدراسة اجلت لسنه قابله للتمديد لان وانا هناك تدهورت صحتي واضطريت ارجع لما صار الوضع صعب ادرس.

      العفو 💗💗 شكرا لمرورك

      إعجاب

  2. يعطيك العافيه ..الشي الوحيد اللي جربته صابونة البيض البيضاء والبنية ما حبيتهم لكن حسيتها تجفف مرره مع ان بشرتي دهنية ..
    عندي انطباع ان المنتجات الكورية ما تستاهل الضجة كل نتائجها مؤقتة واشياء دلع مو عملية 🙂

    إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s