Korea depart – تجارب المنتجات (٢)


SAM_2746

إنها الاجازة اخيراً.. صراحه هالفصل كان شوي صعب لاني درست مواد جديدة فكل اسبوع مدفونه بالمكتبة احوس لكن الحمد لله عدى على خير واقدر الحين ارجع للتدوين.

بالتدوينة السابقة تكلمت عن بعض المنتجات وكيف تأثيرها. بعض المنتجات ماكتبت عنها لان باقي مااستعملتها او مااستعملتها فترة كافية. بهالتدوينة ان شاء الله راح اكمل الباقي من المنتجات ونختمها عشان أقدر انتقل لتدوينات ثانية بدون اي احساس بالذنب.

المنتجات هالمرة صراحة ماكان لها ذاك التأثير. ممكن يكون لها تأثير بس تحتاج مداومة اكثر من شهر لكن انا صراحة مليت. خصوصا ان ماكان لها ذاك التأثير اللي يسوى يحمسني استمر.

SAM_2783

 

 

المفروض انه فيشال لليدين، ملمسه لطيف. بعد فترة بدت يدي تصير شوي اصفى بس التأثير جدا ضعيف.

 

 

SAM_2784

 

ماحبيته كثير خصوصا ان لما احطه واغسل يدي بعد ساعة احسه ينزل مع الموية. لما احطه احس ودي ابعد يدي عن جسمي لين يجف، بس ممكن لان بشرتي دهنية بس ماحبيته فوقفته بعد شهر.

مستحيل اشتريه ثاني، لان اصلا اللي عندي ماكملته.

 

 

61EJk1PzazL._SY355_

 

هذا المستحضر من كثر الريفيوز عليه حسيته صاروخي. بس ما صدقت مو معقول كل الناس عاجبهم، لكن لقيت بلوغر واحد كوري قال ان تأثيره ضعيف. عموما لقيتها بعد ما طلبته فقلت خلنا فيها ونجربه. بعد عشر أيام من الاستخدام كان التأثير جدا ضعيف، ممكن لان هالاتي قوية، او لانها بسبب صحي ما أثر فيها . لكن يظل تأثيره ضعيف. فيه شي حلو حبيته بهالمنتج؛ انو ممكن اذوب القطع في موية حارة وبعد ما تذوب تماما استخدمه كتونيك.

 

32267791_000_b

 

هذا المنتج اللي صدق عليه الكلام. حب من هنا لكوريا من جماله. وثاني مرة استخدمه وراح اشتريه مرارا وتكرارا. فكرته انه مستحضر طيني ابيض احط طبقه ثقيله على المناطق اللي فيها رؤوس سودا، سواء كبيرة او صغيرة. واتركه لين يجف تماما وبعدها اشيله والقى كل الرؤوس سواء صغيرة او كبيرة انشالت معاها.

صراحة اي وحدة بشرتها دهنية مااعرف ليه عائشة للان ما عندها مثله.

 

 

 

SAM_2769

 

البارفين الكل يعرفه ويعطي تأثير جميل لليدين. هذا المستحضر ينفع لشي سريع بالبيت. التأثير تقريبا نفسه. ميزته إن ممكن تعيدين استخدامه كذا مرة. لكن عيبه انه بس للاظافر، ودي بشي مثله لليد كامله.

هذا المستحضر دايم Sold Out في الموقع، فإذا حصلتوه اشتروه. حاليا اللي عندي لسه قابل للاستخدام فما اتوقع اشتري ثاني قريب.

 

SAM_2780

 

 

هذا الكريم مالي وجه اصلا اقول زين او شين، لأني اصلا شاريته عشان العلبة. لما جيت اشتريه الموقع كان يقول إن تأثير هالكريم راح يكون:

“Niacinamide makes skin bright and clear.”

SAM_2781

 

 

 

 

صراحة تأثيره نفس اللي كاتبين بس برضو مثل الفيشال عانيت انه لما اغسل يدي ينزل مع المويه. صرت احطه بالليل واحس يعطي بريق بسيط لليد بس لطيف.

مااظن اشتريه ثاني مااحس التأثير يستاهل. بس العلبة جميلة وراح احتفظ فيها لما يخلص.

 

 

 

SAM_2785
هذي من الماسكات الكوريه اللي تجي شي للوجه يستخدم مرة وحدة وسعرها جميل جدا. اشتريتها لان اشوف كثير كوريين يتكلمون عنها ويمدحونها.

  • Banila co Scent of Seoul Hand Wrapping Mask

هذا الشي فاشل جدا. عبارة عن كريم محطوط داخل قفاز. ممكن يناسب اللي يحتاجون ترطيب عميق. لكن بما ان بشرتي دهنية حسيته مو مفيد.

  • DEWYTREE Black Sheet Mask

هذا الشي عذااااااب. رهيب جدا وبعده جلست يومين احس بشرتي مشرقه وفيها لمعه جميلة كأني حاطه بيبي كريم.  عيبه لون الماسك الاسود يخوف. فاذا بتحطينه الافضل تحتجبين بغرفتك وماتدورين بالبيت وتروعين اهلك.

  • DEWYTREE 3 Step Aqua Refreshing Black Mask

هذا الشي كمان مرة جميل ومفيد مثل السابق. بس اللي ماحبيته انه اكثر من مرحله ويحتاج وقت.

اتوقع راح عيد شراء الثاني والثالث بس ابدا ماراح افكر ارجع اشتري الاول. للاسف الثاني والثالث اشوف الموقع يعطيني انهم انقطعوا من الموقع.

 

 

هذي كل المستحضرات اللي اشتريتها برمضان وخذت وقت عشان استخدمها. السبب انني تركت فترة بين كل مستحضر والثاني وحبيت اعطيهم فترة كافيه.

اتمنى انو اكون عطيت معلومات كويسه عنها رغم ان الريفيو كان سريع للمستحضرات.

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s