طرق للتوفير في السعودية



2016-10-15-13-31-510
هالموضوع ببالي من فترة طويلة لكن يمنعني اكتبه اننا كشعب سعودي نتحرج نتكلم عن هالشي لكذا سبب:
  • ما نبي اللي حولنا يحسونا بخيلين.
  • وضع المجتمع وحبه للمظاهر بالفترة الاخيرة بشكل مجنون.
  • بعض الاشخاص ينظرون للتوفير نظرة ان محد يوفر الا ذو الدخل المحدود.
لكن الوضع الاخير للبلد والتقليل من الرواتب الاخير يخلي الواحد محتاج يعيد النظر في بنود الصرف ونقلل من الامور اللي مالها داعي او ممكن نقول عنها كماليات. هالشي المفروض من زمان نسويه مو عشان التوفير او لان الراتب قل؛ لان فيه اشياء بالحياة جميلة ممكن نسويها او نقتنيها لو اننا نظمنا طريقة صرفنا.

مدونة ريم من المدونات الجميلة اللي تكلمت عن هالموضوع وعطت امثله للاشخاص المبتعثين كيف يوفرون من دخلهم ويعيشون بشكل جيد. لكن بهالتدوينة ابي اتكلم عن الامور اللي نقدر نمارسها داخل السعودية.

فاتورة الكهرب:

الغالبية نعرف ان فيه اوقات ذروة للكهرب وتكون ما بين ١٢ الظهر الى ٥ من بعد العصر. الشي اللي الغالبية ما يعرفونه ان الاسعار لهذي الفترة مرتفعه وممكن توصل للضعف نظرا للضغط الهائل بهذي الفترة. الشي اللي استغربته وانا ابحث عشان اكتب هالتدوينة ان مافيه اسعار واضحة او نسبة محدده لحجم الارتفاع في السعر! صراحة شي غريب. اغلب اللي حصلته بس ان ممكن استخدام الكهرب بهالفترة يسبب انقطاعات للضغط الهائل على المولدات.
الدول الثانية توضح لك بالنسبة قد ايش ترتفع فاتورة الكهرب اذا استخدمته في اوقات الذروة وبكذا تكون فاهم وعارف اضرار تصرفك.
بعد ما عرفنا هالمعلومة كيف ممكن نستفيد منها؟
  • نأجل تشغيل أي اجهزة كبيرة سواء غساله او غسالة صحون او مكنسه لبعد خروج فترة الذروة او قبلها.
  • الاجهزة اللي ما نستخدمها بشكل يومي او بشكل دائم (مثل التلفزيون، فرن الكهرب، القلاية الهوائية.. الخ) نفصلها من الفيش لان مجرد اللمبة اللي تولع او حتى احيان وجود الجهاز فقط بالفيش يخليه يسحب كهرباء ساكنه.
  • بعض الاجهزة الجديدة فيها زي توفير الطاقة يخليه يطفي اي نور في الشاشة.
  • في اوقات النهار نحاول نطفي الانوار في الغرف اللي الشمس تدخل لها ونعتمد على نور الشمس. هالحركة غير التوفير راح تحسن من الجو العام بالبيت ونفسيه الاشخاص.
2016-10-15-13-32-49

الدفع ببطاقة الفيزا او الماستر كارد:

ممكن البعض فجأة ينصدم كيف يوفر لما يستخدم الفيزا. لكن الموضوع جدّي وماامزح. كل بنك عنده مميزات مختلفة لما تستخدم البطاقة. في البنك الفرنسي والبنك الاهلي يرجعونها لك كاش باك، في الراجحي قريت وحدة تقول انهم يعطونها اياها كوبونات. بعض البنوك مثل الاهلي والانماء يعطونك خصومات عند محلات معينة لما تدفع باستخدام البطاقة.
حاليا الأغلب ما يدفعون كاش. ندخل السوق او السوبرماركت ونحاسب على مشتروات مابين ١٠٠- ١٠٠٠ من خلال بطاقة الحساب الجاري. ايش راح يصير لما هذا المبلغ اودعه في حساب الفيزا واستخدمه بشترواتي؟
  • راح تنضاف نقاط في حساب البطاقة. هذي النقاط اقدر استبدلها نقد لما توصل حد معين.
  • راح احصل خصومات من كذا محل لمجرد اني استخدمت الفيزا.
كمان بالسفر اذا الفيزا مفعل فيها الدفع باكثر من عملة راح توفر عليك الضريبة من السحوبات. مااعرف عن بعض الناس لكن انا اكره اشيل الفلوس معي كاش واذا سحبتها من الصرافه بكل مرة راح ياخذ عليّ عمولة مو هينه. فصرت اودع المبلغ في حساب الفيزا واتعامل معاها هناك كأنها بطاقة عادية. وما ننسى انها وقت الدفع في الفنادق والطيران تعطيك كمان خصومات.
2016-10-15-13-31-59

بطاقات تجميع النقاط:

هالفكرة جدا جميلة وكنت افقدها كثير بالسعودية لكن الحمد لله حاليا فيه محلات كثير بدت تتبناها ويشتغلون عليها.
سيفورا:
فكرة البطاقة تجميع النقاط من خلال المبالغ اللي تصرفينها في الفرع. لكن سيفورا السعودي شوي غريب عن الامريكي لكن راح اتكلم عن مميزات البطاقه في الفرعين.
عندهم ثلاث انواع من البطاقات:
البطاقة البيضاء: تكون مجانية بس تعبين بياناتك عندهم ويعطيك اياها وتسجلين على الموقع وبعدها يجيك بالايميك كود هديه ترحيبية تروحين تستلمينها من الفرع.
البطاقة السودا: بعد ما توصلين ٢٠٠ نقطة على البطاقة البيضاء تكوني مؤهله انك تتقدمين بالطلب للبطاقة السودا. فتروحين للفرع وتقدمين الطلب وبعدها بفترة توصل البطاقة للفرع وتستلمينها مع هدية ترحيبيه.
البطاقة الذهبية: بعد ما تجمعي ١٥٠٠ نقطه على البطاقة السودا تستحقي وقتها البطاقة الذهبية. فتقدمين عليها بنفس طريقة البطاقة السودا.
الشكل يوضح لنا النقاط وكيف ننتقل من فئة للثانية.
بعد مرور سنة من الحصول على البطاقة الذهبية يتم تجديدها تلقائيا في حال تم تجميع ١٥٠٠ نقطه. أما في حال كانت النقاط اقل يتم التجديد على البطاقة السوداء. لكن لم يتم ذكر اي معلومات عن تجديد البطاقة السوداء.
مميزات البطاقات:
  • البطاقة البيضاء مافيها الا هدية الترحيب.
  • في البطاقة السوداء راح يسون خصومات خاصه يدعونك لها.
  • في البطاقة الذهبية والسوداء تحصلين على هدية سنوية بيوم ميلادك.
  • في البطاقة الذهبية كل ما جمعتي ٢٠٠ نقطة يرسلون لك الشركة كوبون مشتروات.
  • في البطاقة الذهبية عند تجميع ١٠٠٠ نقطة يحصل المشترك على قسيمة لهدية مميزة. (مدري عاد ايش بس هم يقولون انها مميزة)
  • في البطاقة الذهبية في عروض خصومات خاصة لحاملينها.
  • في البطاقة الذهبية راح تتم دعوتك لايفنتات خاصة بسيفورا ويرسلون لك مجلات عن المنتجات.
نجي الحين للفروق:
  • البطاقة في الشرق الأوسط لما تصرفين مبلغ يساوي = 10 AED/ 10 SAR/ 10 QAR/ 1BHD/ 0.8 KWD تحصلين نقطة وحدة مقابل الموقع الامريكي تحصلين نقطة مقابل كل دولار. فتجميع النقاط اسرع من خلال الموقع الامريكي.
  • مع كل عملية شراء راح يعطيك الموقع الامريكي ٣ عينات هدايا تقدرين تختارينها من ضمن قائمة محددة لكن كبيرة.
  • من فترة لفترة يرسلون لك الموقع الامريكي عروض على الايميل وهدايا تاخذينها مع عملية الشراء ممكن تكون بالحجم العادي.
sephora
الفئات في البطاقة الامريكية تعتمد على المبلغ اللي دفعتيه، وهالشي صراحه افضل واسهل. بحيث انك بعد دفع $350 تنتقلين لفئة VIP ولما تصرفين $1000 تنتقلين لفئة VIP Rouge.
 2016-10-15-13-34-46
بطاقة اكتساب من العثيم:
هذي بطاقة عموما من العثيم لكن شفت بعض المحلات يذكرون ان ممكن تستخدمها عندهم. فكرتها تجميع مبالغ لقاء اللي تدفعه؛ لكل ١٠٠ ريال ريالين تضاف في رصيد البطاقة. واحيانا يكون فيه خصومات على مواد استهلاكية معينه مخصصه فقط لحاملين البطاقه. مثل بشعبان كان فيه تخفيض ٥٠٪ على شوربة الكويكر فقط لحاملي البطاقة. ذكروا بالموقع ان فيه قسائم واستبدال النقاط بالهدايا بس صراحة باقي ما جربتها لان بطاقتي جديده.
طريقة الحصول على البطاقة تكون عن طريق سؤال الكاشير وتعبئة النموذج المتوفر عنده.

2016-10-15-13-34-59

بطاقة توفير اسهل من السدحان:
تشبه بطاقة العثيم ولكن بدال المبالغ نقاط، والنقاط نقطه مقابل كل ريال. حبيت فكرتها لان اسهل من بطاقة العثيم في التجميع. بعد فترة معينه ممكن استبدال النقاط بمنتجات من المعرض بغض النظر ايش هي؛ فما يجبرونك على اغذية فقط، ممكن تاخذ اجهزة او اواني او مستحضرات تجميل. ،فيه عروض من فترة لفترة يرسلونها على الايميل او الجوال اللي تم تسجيله عند تعبئة نموذج الحصول على البطاقة.
طريقة الحصول على البطاقة تكون عن طريق سؤال خدمة العملاء وتعبئة النموذج المتوفر عنده. وراح يعطيك ثلاث بطاقاتك وحدة كبيرة وثنتين صغار. حلو هالثلاث يتم توزيعها على افراد البيت او حتى مع السواق والخادمة اذا هم اللي يتقضون للبيت.
بطاقة جرير:
يا هالبطاقة غيروا نظامها كذا مرة وحوسه. النظام الحالي انو تشتري بقيمة ٥٠٠ ريال او تجيب فواتير بنفس القيمة أو تكون طالب وتجيب بطاقتك الجامعية تعبي النموذج وتعطيهم اياه، بعد اسبوعين تراجعهم وتستلم البطاقة.
صراحه ينرفزني انو انتظر اسبوعين واخرتها يطلع لي بطاقة ويشيك رقم على الكمبيوتر ويكتبها بيده! ماعندي مشكله على نوع البطاقة لكن عندي مشكله الانتظار اسبوعين واخرتها انت اللي كتبتها!!
عموما هالبطاقة تعطي خصومات ١٠٪ على جميع الاصناف بالمكتبة عدا الاجهزة الالكترونية، لكن لما تشتريها يطلب منك البطاقة عشان يضيف النقاط عليها. كل عملية شراء سواء بخصم او غيره راح تعطيك نقطه. المفروض تجمع تقريبا ٢٥٠٠٠ نقطه عشان تكون مؤهل لرفع الخصم الى ١٥٪. الحلو في مسأله النقاط انك تجمعها خلال اكثر من سنه، شيكت بطاقتي وهي عندي من اكثر من سنه وقال لي ان عندي الى ٢٠١٩ عشان اكمل عدد النقاط.
ممكن ماتكون شخص يشتري دايم من عندهم لكن فكر في الادوات المكتبية والكتب اذا بيكون عليها خصم ١٠٪ ليه لا مااخذ هالبطاقة؟
بطاقة شكرا:
هالبطاقة غالبا تحصلها في سيتي ماكس او سنتربوينت لكن هي تبع مجموعة لاندمارك. طريقة الحصول عليها سهله جدا؛ فقط اسأل الكاشير عنها وتعبي معلومات بسيطة وتقدر تستخدمها مباشرة. فكرتها تجميع نفاط نقطة لكل ريال للمنتجات العادية، ونقطه لكل عشرة ريال اوقات التخفيضات. ممكن مباشرة استبدال النقاط بمبالغ نقدية يتم بها الدفع على منتجات تم شراءها من المحل ولا تسلم نقدا. الحلو باستخدام النقاط ان ممكن تستخدمها حتى لو كانت تساوي فقط ٤٠ ريال. المحلات اللي تابعه لهالبطاقة كثير جدا وانصحكم تشيكون عليها.
نقاط موبايلي والاتصالات السعودية:
مع ان صراحة موبايلي بدوا يخسرون الشركاء الكويسين للاسف، لكن الاتصالات السعودية ماشاء الله صايرة اشوف بكل مكان لوحة انهم يقبلون استبدال النقاط.
ممكن ان الواحد يستبدلها دقائق مكالمات ويوفر في الفاتورة، او انه يشتري مستلزمات بالنقاط. تقدرون تلقون بمواقعهم تفاصيل اكبر عن عدد النقاط والشركاء.
فنادق الماريوت:
من اول ما تسوي لك عضوية بموقعهم تطلع لك خصومات وعروض للاعضاء، والعروض هذي قوية. اذكر مرة كنت ابي احجز غرفه بفندق عندهم وشيكت بوكينق وكذا موقع وكلها نفس السعر، بس لما دخلت الموقع وسويت لي عضويه عندهم طلع لي بقيمة الغرفه اقدر اخذ سويت باطلاله. صدق اني ماوفرت الفلوس باني اخذ نفس طلبي بسعر اقل بس على الاقل رقيت طلبي.
شركات الطيران:
اذا انت شخص يسافر كثير سواء داخلي او خارجي حلو تشترك ببرنامج الولاء الخاص بالشركة اللي تطلع عليها. راح تقدر تجمع اميال لرحلاتك وبعدها تستحق درجة اعلى في الرحلات القادمة او راح يكون لك عروض وخصومات او وزن اضافي وقت الرحلة.
هذي تقريبا اغلب البطاقات او العضويات اللي اعرفها واستخدمها .. لو احد يعرف شي جديد لا مانع نتبادل خبرات.
More: وأنا اكتب التدوينة ومع البحث لقيت محلات حدائق السلطان مسوين كمان كروت لهم، بالاضافة الى ساكو وتفريبا نفس الفكرة.
 2016-10-15-13-36-03

بطاقات الخدمات أو عروض العملاء:

هذا النوع من البطاقات تشترط عليك القيام بعدد معين من الخدمات او الطلبات عشان تحصل طلب مجاني. كثير اماكن تتوافر عندهم سواء مطاعم او صالونات او حتى فنادق. راح اذكر كذا مكان جربتهم وعندهم هالخدمة:
سبا سبكتروم: فكرتهم شوي غير، يسوون لك عرض على خدمات سواء حمام مغربي او LPG عدة جلسات بسعر معين بحيث تطلع لك الجلسة الوحدة ارخص من سعرها منفردة، واحيانا بالتوتل تطلع لك جلسة مجانية او يكون الخصم وصل ٥٠٪ على الجلسات.
صالون سنيبس: هالصالون معروف في بانوراما المرأه في بانوراما مول وطريق خريص جنب جرير. عندهم كارد عشر خدمات ويطلع لك بعدها خدمة مجانا. كمان عندهم عرض انك تحجزين لخدمة قبل موعدها وتدفعين مبلغها كامل ويعطونك خصم ٢٠٪ عليها. كمان عندهم اذا جمعتي فواتير خدماتك بمبلغ يقارب ٥٠٠٠ ريال يعطونك بطاقة الخصم المميزة. عن نفسي صراحه كل عيد او اذا بصبغ شعري لازم الف او اكثر، هذا وشعري قصير مدري مساكين اللي شعرهم طويل وش يسوون. لكن مابعد وصلت للمبلغ وان شاء الله هدفي اوصل له واخذ البطاقة قريب.
إليفيشن برجر: عندهم الكرت حق الوجبات اظن عشر وجبات، صراحه ما دققت لاني مو مرة مع الفاست فود بس اذكر انه عرضها لي.
فندق العنوان دبي: لما تسوي التشيك اوت يعطونك الفاتورة في ظرف، وغالبا اننا نرمي هالفاتورة بدون ما نناظرها زين. اخر مرة كنت متمللة بالبيت فقعدت اقلب بالاوراق وكنت بس ابي اشيك الضريبة كم حسبوها لي، وبالصدفه باااااخر الفاتورة لقيتهم حاطين لي كود خصم على زيارتي السابقة بدون تحديد تاريخ انتهاء.
عروض منسوبي جامعة الملك سعود: بحكم اني اشتغل هناك فهم يوفرون لنا عروض معينه على عده محلات او مستشفيات. صدق العروض مو كثيرة او قويه لكن فيها كذا شي يستاهل مثل فندق الريتز كارلتون في الدوحة. فاللي يشتغل هناك او يعرف احد موظف بالجامعة يشيك صفحه العروض.
 2016-10-15-13-36-33
فيه كمان كذا شي متعلق بالتوفير لكن ماادري تحت اي بند احطه.
  • موقع Ebates اللي تكلمت عنه الجميلة ريم بمدونتها. فكرته بسيطة جدا؛ اذا انت شخص تشتري اون لاين ممكن تطلب عن طريق هالموقع وتحصل كاش باك على مشترواتك بدون ما تتعب نفسك باي شي. وكمان ممكن يعطيك خصومات. الكاش باك ياخذ كم يوم عشان يدخل في حسابك وكل ثلاث شهور يرسلون لك شيك بالمبلغ اذا كان اكثر من ٥$، اما اذا اقل يرحلونه للفترة الجاية عشان تجمع اكثر. عن نفسي للان مابعد استلمت منهم اي شيك بس بديت اشتري عن طريقهم.
كتشجيع لك؛ اذا رشحت ٣ اشخاص وسجلوا بالموقع وقاموا بأول عملية شراء راح يعطونك 75$!
عموما هذا الرابط الخاص فيني للي وده يسجل عن طريقي هنا.
  • السفر عن طريق Expedia الموقع زيه زي بوكينق لكن يعطيك تذاكر سفر بالاضافة للفنادق. ما جربت الفنادق لكن جربت التذاكر وكان ارخص سعر يطلع لي باي شركه طيران حول 7 الالف للشخص ذهاب وعودة، لكن اكسبيديا عطاني الفين للشخص ذهاب وعودة. غير انو يعطيك نقاط للتجميع، لكن تنفع لهواة السفر وانا مو منهم.
  • الشراء من مواقع التخفيضات عن طريق الدعوات. هذي المواقع عبارة عن موقع يعرض كل يوم عدد من المتاجر او السلع عليها تخفيض متفاوت من ١٠-٩٠٪ لمدة محدودة اما يوم او اسبوع. بعض المتاجر ترسل لك الغرض بمجرد الدفع، وبعضهم يقولك لازم ينتهي الايفنت عشان يرسلونها لك. عموما هذي المواقع اكثر شي افضله لانها تعرض لك اشياء جودتها عليه بسعر معقول وكثير اشتري منها براندات حلوة. لكن هالنوع من المواقع يحتاج تدوينة لوحدها ما ينفع احطها فقرة صغيرة.
  • ترشيح العملاء الجدد واخذ هدية مقابلهم. من هالنوع ماشفت الا موقع واحد وهو للشوكليت. فكرته انك تنصحين شخص يشتري منه ويستخدم الكود الخاص فيك وبكذا تتضاعف الكمية اللي اشتراها مجانا وانت يطلع لك هديه. صراحه هذا احسن شي لاني اشوفها صفقة مربحه للطرفين وحلو انه يشحن دايركت للسعودية عن طريق DHL.
هذا موقع الشوكليت وهذا الكود الخاص فيني للي يبي يضاعف كميته (Z-040412). بس كتنبيه تأكدوا من نوع الشوكليت اللي تختارونه لان بما انه اجنبي الا ما يكون فيه انواع بالكحول او فيها جيلاتين حيواني.
  • فيه كمان بعض المحلات بمجرد ما تشتري يعطونك كرت خصم ١٠٪ او حولها للعملية الجاية، ممكن نستفيد من هالكروت ونستخدمها.
    screenshot-at-%d9%85%d8%ad%d8%b1%d9%85-%d9%a1%d9%a4-%d9%a1%d9%a5-%d9%a5%d9%a0-%d9%a5%d9%a3
  • التقسيط لبعض الاجهزة. احيان فجأة تخرب الغسالة او الثلاجة ونكون محتاجين جديد لكن ما حطيناها في الميزانية. او احيانا شخص تبي تهديه نزالة او هدية زواج وودك بشي يواجه. ليه طيب ما ناخذ بعض الاشياء تقسيط؟ في امريكا حاليا حتى الايباي صار يقسط اسعار السلع على الفيزا بحيث يشجعونك تشتري اعلى من ميزانيتك وتقسطها. لكن هنا احنا نبي نستخدمها ضمن الميزانية لكن عشان نوفر على المدى الطويل ولا نهز الميزانية بشهر واحد.
تقريبا هذا كل اللي عندي عن الموضوع، لكن راح انبسط لو نتشارك طرقكم في التوفير .
Advertisements

3 thoughts on “طرق للتوفير في السعودية

  1. الله يعطيك العافية تدوينة جميلة وفي موضوع نحتاجه بس غايب عنا .. عن نفسي انا استفدت منها كثير وبدأت بتطبيقها
    ياريت تنتشر عندنا ثقافة التوفير و نفرق بينها وبين البخل

    إعجاب

  2. استفدت جداً جداً من موضوعك حطيته بالمقضلة وراح اوريه عائلتي
    فعلاً موضوع مفيد ، وراح أبدأ بتطبيقه
    فعلاً اذا تكلمتي عن التوفير كأنك بخيله طيب مرات ليش ارمي فلوسي كذا
    بينما ممكن استخدمها بشي افضل .. الحمد الله الذي عافانا

    جزاك الله خيراً ، فعلاً استفدت شكراً ياجميله

    إعجاب

    1. بالضبط وهذا اللي ينرفز واحيان يحرجك ويخليك ما تجيبين طاري التوفير
      بس جد احس المجتمع محتاج توعيه خصوصا مع الخصومات اللي تطول رواتبنا 😦

      إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s