١ + ١ مجاناً


هالتدوينة بمناسبة العروض هالشهر على اغلب المحلات اللي تخليك تحس انهم يبون يطيرون هالراتب اللي متأخر وطاير نصه بعد ما شالوا البدلات منه 😦 .
اظن أغلب البنات وكذلك الشباب لما نشوف عرض زي كذا او “تخفيضات ٧٠٪تخلينا نوقف ونقول ” خل نشيك بضاعتهم“. واحيان نكون شارين حبه ويعرض عليك الكاشير ان تشترين حبه ثانية ويجيك ثالثه مجانا، او تاخذين حبه ثانية بنص السعر ونلقى العرض يغرينا شوي.

للاسف هالشي فخ بعدة مواقف، قبل ما اذكر المواقف راح اذكر ايش صار معي اليوم بصيدلية النهدي. مريت بشتري بعض المستلزمات الشخصية ولا عندي خبر بعروضهم. وقت المحاسبة كنت شارية زيت للشعر ومناديل ازالة المكياج وكذا شي. عرض عليّ الكاشير اخذ علبة ثانية من المناديل ويطلع لي الثالثه مجانا، وواحد من اغراضي عرض كمان انو لو خذت اثنين يطلع لي الثاني مجانا، لكن الزيت ماكان عليه عرض.
بديت احسبها براسي عن استخدامي للمناديل: (الوحدة سعرها فوق العشرين ريال وباخذ ثنتين بتقريبا شي واربعين وثالثه مجانا.. حسابيا انا الكسبانه لكن نجي للواقع؛ انا شخص قليل استخدم مكياج، ومكياجي اليومي شي بسيط وازيله بمزيل مكياج سائل خفيف. والمناديل تجف بعد فترة طويله، ونظرا لاستخدامي ممكن الثلاث علب تجلس اكثر من ثلاث شهور ومااضمن انها ماتخرب.) هنا استوعبت ان الصفقة اللي حسيتها مكسب طلعت خسارة.
طبعا لاحظتوا اني ذكرت زيت للشعر. زيت الشعر صلاحيته طويله جدا، وغالبا يخلص بسرعه فتحتاجين اكثر من واحد ومع هذا ماكان عليه العرض
احيان بعروض التخفيضات فيه كلمه تنرفزني لما يكتبون (up to 70%حتى ٧٠٪) وكل الكلمات صغيرة ماعدا السبعين بالمية. لان هنا التخفيض ممكن ما يكون الا كم قطعه تخفيض قوي عليها والباقي يمكن عشرة بالمية او اقل. ويضيع وقتي احوس بالمحل وممكن اشتري كم شي ماعليهم تخفيض قوي. كمان شغله بالتخفيضات ملاحظتها بس ماادري هل صدق او اتخيل. لاحظت بالمحلات اللي دايم اروح لها وقت التخفيض تطلع بضاعة غريبه عجيبه وجودتها ضعيفه لدرجة الواحد يشكك بنفسه هل هي بضاعتهم؟! 
يعني لا الخامه ولا الستايل ولا حتى التصميم يحسسك ان ممكن هالمحل يبيع هالقطعه. ويكون تخفيضها قوي مرة وممكن يكون سعرها بس ٢٠ ريال! صراحه انا اخاف من هالقطع واتجنب اي قطعه اشك فيها .
طيب متى تكون مثل هالعروض مكسب للمستهلك اكثر من التاجر:
  • لما يكون استهلاكك للمنتج عالي وبتخلصينه خلال فترة قصيرة.
  • لما يكون المنتج تاريخه صالح للاستخدام فترة طويلة. (لذلك نشيك على تاريخ الاستهلاك لما نشوف عروض على الاكل)
  • اذا انتوا اكثر من شخص وبتتقاسمون الاغراض وتتقاسمون التوتل. فبيطلع عليكم سعر الحبه ارخص من سعرها بدون العرض. (شوفي احد من صاحباتك او خواتك ممكن يشاركك الشراء)
  • اذا المنتج مو بسهولة تحصلينه بالاسواق. (لكن برضو نشيك على تاريخ استهلاكه)
  • اذا التخفيض على قطع ملابس كلاسيك ما تروح موضتها او تهتري خامتها.
طيب متى المفروض نكتشف ان هالعرض ما راح يفيدني وبس يستنزف ميزانيتي:
  • اذا استهلاكي للمنتج قليل.
  • اذا احتاج اشتري كمية كبيرة من المنتج عشان احصل العرض. (مثل اشتري حبتين والثالثه مجانا، او اشتري حبه والثانية عليها خصم)
  • اذا تاريخ الصلاحيه باقي عليه كم شهر. (لان احيانا يكون المنتج فيه مشاكل من التخزين فترة طويلة)
  • اذا ميزانيتي ما تسمح اشتري اكثر من حبه حاليا، لكن تسمح اشتري كل شهر عبوه بالسعر الاساسي. فما يسوى تضايقي نفسك بشهر وانت تقدرين شهريا توفريه.
  • اذا احتاج اقطع مسافة طويله عشان اوصل الموزع. مثل اكون ساكنه بمخرج ٢٤ والمنتج بمخرج ٩، مرة مستحيل اروح هناك عشان فرق عشرة ريال ،، يالله ميه او ميتين تحركني هالمسافة كلها.
  • اذا فيه بدائل بسعر معقول اساسا. لان المشكلة لو تعودت على المنتج وخلص العرض واضطر اشتريه بعدين بالسعر الاصلي.
  • اذا التخفيض على قطع ما احتاجها الحين (ملابس مثلا) وممكن تظل عندي فترة طويلة قبل استهلكها. (للاسف قد صارت عندي اشتريت بلوزة بالتخفيض وانا مو مقتنعه وظلت عندي سنه قبل احصل مناسبه لها)
  • اذا القطع مو هذا سعرها وسعر التخفيض اعلى من سعرها.
طبعا فيه اسباب كثير بس هذا اللي حاضر ببالي.. لكن لاني مابي التدوينة تقعد اسبوعين مانزلت راح اكتفي باللي ذكرته .. ومافي مانع تشاركوني باسبابكم ..

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s