هل مشاهير السوشال ميديا يستغفلوننا؟


حبيت هالمرة اثرثر عن مجموعة افكار ببالي من فترة، وتخليني استغرب من سلوكيات معينة بالمجتمع تصدر من ناس متعلمه وفاهمه.
زيي زي اي شخص اضيف بالسناب بعض الاشخاص المشهورين. اخليهم فترة اذا استفدت منهم او حذفتهم. من فترة طرحت اروى العمراني نقاش عن الاعلانات اللي تنزلها في سناباتها وحطت صورة بالانستقرام عشان يطرحون متابعينها رايهم. لكن اظن ان النقاش اتجه لشكل سلبي بسبب اغلاقها للتعليقات باليوم الثاني! كمان فيه كيتشن نور تكلمت من فترة عن الاعلانات والاشخاص اللي منزعجين منها بس ما توسعت كثير بالموضوع. واظن سندس القطان من زمان تكلمت عن الاعلانات ومدحها لبعض المنتجات.
لما اقلب الموضوع براسي استغرب ليه احنا كبرنا الموضوع؟
  • بالتلفزيون يوقفون عرض الفيلم او المسلسل المفضل عشان يعرضون اعلانات، ووصل بقنوات MBC ان مدة الاعلانات اطول من مدة البرنامج.
  • Youtube تعرض غالبا اعلانات في بداية المقاطع وكان سابقا لنا حرية الغاءها بعد خمس ثواني لكن حاليا صار فيه نوع من الاعلانات اجباري تشوفه.
  • السناب شات حاليا فيه اعلانات تظهر بنهاية اي ستوري لكن لك الحرية تغلقها.
  • في المواقع والمدونات والمنتديات سابقا فيه اعلانات تظهر بين الردود او وسط المواضع واحيان تكون بنرات جانبية.
  • في مواقع المشاهدة اون لاين برضو يطلع لنا احيانا اعلانات بوسط الفيلم او المسلسل.
  • الباث حاليا اضافوا الاعلانات بين الثوتات.
وغيرها كثير من الاعلانات الكثيرة بكل مكان ومحد سوى هذا الهجوم عليها. تقبلناها كشي اساسي لازم نتحمله وفاهمين انه مصدر دخل للطرف الاخر. لكن لما بدوا الاشخاص في السوشال ميديا او حتى البلوغرز يسوونه صار عندنا ردة فعل عكسية تجاهه. ايش اللي صار بالضبط؟
 
لما نقعد ونحلل الموضوع راح نوصل لنقطه مهمه فيه. القنوات التلفزيونية لما عرضت الاعلانات وضحت لنا انها اعلان ومثلها الجهات الاخرى. لكن اللي قاعد يصير بالسوشال ميديا ان يجيك الشخص ويتكلم عن منتج انه استخدمه استخدام شخصي وبعدها يعرض لك متجر يوفره او يبيعه!!
هنا انت تقول: لحظظظظظة!
ايش المفروض اصدق؟
هل ان المنتج كويس ومفيد؟ او ان الكلام اللي سمعته مدفوع؟
وهل كلامك اللي من شوي من حبك لمشاركة المنفعة مع متابعينك؟ او بس تحاول تكسب رزقك؟
اعرف ان غالبا الاشخاص يرددون انهم ما يعلنون لاي منتج الا لما يجربونه ويتأكدون انه مفيد ويستاهل الاعلان. ماعندي مشكله مع هالشي ولا اكذبهم لان كثير صادقين بهالشي ويبذلون جهد. لكن يظل برضو عندي نسبه شك بالموضوع واحتاج اني ابحث واقرا كثير قبل اقرر اشتري هالمنتج او آخر. لكن طيب الحين انا ركزت بالكلام او التدوينة او السنابه واحيان اكون سويت برنت سكرين للشي وانصدم بالاخير لما اكتشف انه اعلان!! غير وقتي اللي ضاع احس انه ملعوب عليّ.
ولهالسبب مااحب بمدونتي اتكلم كثير عن منتجات الا لو حسيته حلو. والصراحه احيانا مااتكلم عن منتج لاني اخاف الناس تكتشفه وتخلصه .
الى الان اذكر من زمان كان عندي يوزر بالاقلاع مشهور جدا وكنت اتكلم بمملكة المرأة احيانا.. جتني صاحبتي تسألني عن النظام اللي استخدمته لبشرتي لانها تغيرت عليه كثير. اذكر حلفتها الف مرة انو ما تكتب عنه شي بالاقلاع عشان ما يخلص من السوق.
ادري استطردت بشي ماله علاقه. نرجع ثاني للاعلان.
ردات فعلنا كبشر لمثل هالمواقف تختلف. لان الموضوع حاليا اللي نتكلم عنه مو تقبلنا للاعلان او لا. احنا وصلنا مرحلة هل نقبل انه يتم استغفالنا او لا؟
معروف اننا كشعب طيبين ونحسن النية عموما. لكن لما يوصل لمرحلة التسويق نكره ان شخص يستخدم هالشي ضدنا. انا نفسي مع اني مااصدق كل الاعلانات اكره اني اضيع وقت على اعلان. وردة فعلي تكون اني احذف الحساب. لكن فيه اشخاص تكون ردة فعلهم اعنف، وتوصل للسب العلني والخاص للشخص.
فممكن الشخص المُوجه له السب او العنف ينصدم ويحس انه حسابه الخاص ويسوي فيه اللي يبي. وان الاشخاص اللي مو عاجبهم يقدرون ببساطة يلغون المتابعه. لكنه تناسى ان ردة الفعل هذي سببها الاستغفال اللي مارسه هو على الاشخاص اللي يتتبعونه.
جلست بيوم مع خواتي وقلت خل افتح هالموضوع معاهم ونشوف رايهم خصوصا اننا مختلفين بالاعمار والمستوى التعليمي والمجتمعات اللي نحتك فيها.
لقيت اننا اتفقنا على مسألة ان ماعندنا مشكلة يعلن الشخص بس يراعي كذا نقطة:
  • يكون واضح انه اعلان. مو سالفة طويلة واخرتها اسم المتجر، عشان اقرر اسوي سكيب للشي ولا اضيع وقت فيه.
  • يكون الاعلان واقعي. مو مثل وحدة ببلد ثاني تعلن لي عن مدرسة بالرياض وتقولي انها كويسة!!!
  • لا يسوي تمثيلية. مثل اللي رجعت البيت ولقت ((صدفة)) سلة من مجهول فيها كل الاشياء اللي تحبها!! و((صدفة)) لقت متجر يسوي نفس هالسلة!! 
  • يكون الاعلان يناسب محتوى الحساب. مو اتابع حساب اعمال يدوية ويطلع لي اعلان خلطات تبيض!! 
  • يكون اعلان حقيقي مو غرضه مادي. 

 

 ذكر حساب أروى ونور وسندس مو لانهم اشخاص يعلنون كثير .. بالعكس حساباتهم مفيده جدا والاعلانات قليلة جدا.

 

موضوع الاعلانات يخليني افكر كمان بشغله النصائح. ليه ناخذ نصائح بامور خاصة فينا من اشخاص ما نعرفهم؟
تحديث الانستقرام الاخير صار يطلع لنا الردود اللي تنزل عند الاشخاص اللي نتابعهم وهالشي يخليك لا شعوريا تقراها اذا فاضي. انصدمت من بعض الردود، خصوصا اللي تسأل وش يناسب بشرتها من كريمات او منظفات!! والصدمة الاكبر شخصه مشهوره كانت تسوق للون مكياج وتقول انه ناسبها مرة وحلو عليها وتنصحهم يشترونه!!
كيف بالله اشتري لون مكياج لان وحدة مااعرفها ولا تعرف نوع بشرتي او لونها ولا انا اعرف بشرتها او لونها قالت لي انه حلو عليها وبيصير حلو عليّ!!؟
تذكرت لون الكشمير.. عاد هذا لي معاه سالفه تضحك.
كم يوم اشوف اختي الصغيرة باهته وشكلها تعبان وقلقت صراحه عليها لا تكون صحتها فيها مشكلة. وبعد كم اسبوع الا اسألها وش سالفه لون الكاشمير اللي كل الخلق ازعجونا فيه لدرجة صار دايم sold out؟ الا تقولي شوفيه نفس اللون اللي كل يوم تحطه!!
يوه بغيت ارميه بالزباله من الصدمة. صار قلقي ماله داعي لان اللون بس ما ناسبها. واكتشفت ان فيه كثير معاي بالدوام احسبهم مريضين وهم كل السالفه بس حاطين هالالوان.
يعني الحين عندنا مشكلتين؛ المشاهير اللي يستغفلونا، والناس اللي تبي نصائح من اي احد. المشاهير ماراح نقدر نسيطر عليهم او نخليهم يوقفون استغفال الا لما نصير حريصين بمين ناخذ نصائح منه.
اعرف ان احيان بلحظات الواحد يكون ضايع ويبي اي شخص ينصحه عشان يعدل نفسه، حتى لو بشي بسيط مثل لبس او مكياج. وللاسف سبق مريت بموقف كذا ونصحتني صديقة بشخص معروف جدا ولما تواصلت معاها للاسف عطتني نصائح “معلبة” ! رغم اني وقتها كنت ابي نصيحه بس جلست افكر مع نفسي بهالنوع من النصائح هل واقعيه او “خربوطية“. ولما واجهتها بتساؤلاتي هجمت عليّ وحظرتني!!
يعني الحين اللي تنصحنا بصالون معين او مكياج مو شرط تكون ١٠٠٪ صادقة. خل نقول عشان ما نظلمهم ٥٠٪ و ٥٠٪ نتركها لعقلنا وقراءاتنا وبحثنا.  سمعنا نصيحه بمكان او منتج ببساطة نبحث عنه ونسأل اشخاص تعاملوا شخصيا معاه وممكن بنفسنا نجرب شي بسيط منه. ونخلي هالشخص مو المسؤول تماما، نعتبره الشخص اللي يفتح لنا الابواب لعالم آخر وتجارب جديدة لكن قرار اننا ندخل الباب ونخوض التجربه يعتمد علينا ١٠٠٪.
وبكذا نقلل الشعور بالاستغفال اللي نحسه، ونقلل من ردودنا الغاضبة عند بعض الاشخاص.
 

 

 

 

اتمنى لكم ايام خالية من الاستغفال.

 

Advertisements

8 thoughts on “هل مشاهير السوشال ميديا يستغفلوننا؟

  1. انا من النوع يلي قبل اشتري او اجرب شي جديد احب ابحث عنه وعن تجارب الناس له 🤓 لكن صايره احتار كثير خصوصا من تجارب مستخدمي مواقع التواصل الاجتماعي خاصة ” الانسقرام ” لأنه ابدأ اوسوس هل هي نصيحه او اعلان ؟ وهل هي جربته او ع العمياني ؟ 🤔

    إعجاب

  2. تدوينتك جميلة ومهمة وتستحق النقاش
    بالنسبة لقنوات التواصل والإعلان فيها أصبحت حديثاً الأن هيا مواقع التواصل الإجتماعي وهذا أمر مفروغ منه
    أيضاً اتفق معاك ببنود الاعلان وأركز على مناسبة الإعلان للمحتوى مايعجبني الإعلان لشي والحساب لمحتوى مختلف
    وبالنسبة ليش نأخذ مشورة أحد مانعرفه أظن انه بسبب الإنفتاح والمشاركة بدل ماكنت أجازف واشتري وأجرب الأن ممكن أشوف وأسمع وأقرأ وبالنهاية أقرر وماننسى إني أتحمل مسؤولية قراري إعلان وتجارب الاخرين ماهي قطعيه إيجابية وصحيحة .

    إعجاب

  3. يالله!! صاادقة بكل حرف كتبتيه.. طب إيش رايك باللي تصور أكل بمطعم وتتغزل فيه وهو توه واصل ما انأخذ منه ولا لقمة هههههه

    بس الصدق بما إني جدًا منجذبة لموضوع التسويق بحد ذاته صرت قليل أسوي سكيب، أحاول أركز في طريقة تقديم الإعلان وأقارن بين المشاهير في أساليب الترويج..
    يعني مثلُا أحد شركات الحلويات لاحظت إن كذا وحدة من إللي أتابعهم في السوشيال ميديا تعاملت معاهم..
    الأولى كانت تحط الحلى مع قهوتها في الخلفية وتقعد تسولف بحيث ما يكون المنتج هو المادة الأساسية بس هذا الحلى ما ينقطع أبدا عنها.
    الثانية جوها صحباتها وكل وحده بطبق ووحده منهم كان معاها الحلى وكللهههم إنهاروا عليه وقعدوا يتطاقون ويسألون عنه وتحط أرقامه بزعم إن المتابعات يسألون عنه.
    الثالثة جت تقول يا نااس مشتهية حلى لذذيذ وكذا كذا كذا أعطوني أسامي محلات توصل.. وبعد نص ساعة وصلها الحلى وتقعد تتشكى كيف انه لذيذ وبيزود وزنها لأنها مو قادرة تقاوم هههههههه

    يعني صدق على الرغم من كمية البثارة والاستغفال في الموضوع إلّا إني تعلمت دروس في التسويق << وهذا لا يعني إني راح أسوي زيها بس أحب أتفرج عليها من زاوية "القافطة" أكثر من "الضحية المغفلة"..
    جربي تتفرجين عليها زي كذا مرره بتلاقينها ممتعه ههههههههه

    إعجاب

  4. حقيقه انا ما أعترف بالإعلانات ولا تشدني ولا قد شريت من شخص مسوي له اعلان قناعه شخصية أنها اعلان فقط تسويق لمنتج لا اكثر 😂 اللي يعرض تجربته بعيدا عن الاعلان ممكن يكون محل للمصداقية أكثر

    إعجاب

  5. انا ماصرت اصدق الإعلانات ابداً الا لما اقرا عنها
    ومرات اذا شفت مشهور تمادى بالإعلانات على طول احذفه
    صح لهم حق يسوون إعلانات في حساباتهم
    بس كثرتها تقلل المصادقيه
    وخصوصاً اللي تقول مااعلن عن شيء الا اذا جربته
    معقوله بتجرب الف منتج ومنتج في سنه وحده 😕

    إعجاب

    1. واصلا انا مااصدق انها بتعطي راي واقعي عن شي مدفوع لها عشانه .. او حتى لو ببلاش بتفكر انهم ارسلوه لها مجانا فعيب تقول مو حلو

      إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s