(1) My Favourite Stuff


هالسنة بدت بالنسبة لي بتغييرات كبيرة وقرارات كبيرة من اهمها اني ابي اركز على المدونة مثل قبل، وتكون جزء مني. فحبيت اشارككم مفضلاتي؛ بس عشان اكون صريحة معاكم انا مو من الاشخاص اللي احب اغير مستحضراتي واجرب كثير. لذلك التغييرات عندي ما تكون الا ربع او نصف سنوية، وحابة اشاركم الاشياء اللي تعجبني كل ثلاث شهور بحيث اكون استخدمتها فترة كافية.
واقي الشمس Eucerin :
هالواقي نصحني فيه الصيدلي وقال لي كلام ايش كثره عنه نصه مااذكره، وصراحة خذته بس عشان يفكني من هذرته. بس لما استخدمته انصدمت!
صدق قال لي انه مناسب للبشره الدهنية، وما سكت حتى لما قلت ان بشرتي سوبر دهنية وللان مافي اي واقي ماشي معاي بشكل كويس. قال لي استخدمي هذا وبترتاحين!! وصدق بكلامه
قوام الواقي سائل مثل الميلك، بس لما انشره على البشرة تمتصه بلطف ويعطيها مظهر مات لدرجة بالشتاء لازم احط مرطب قبله. والجميل ما يترك وجهي بشكل ابيض شوي كأني لابسه قناع، وحتى بعد اربع ساعات مازال شكلي طبيعي جدا.
حاليا هذي علبتي الثالثة وانصح فيه بقوة للي بشرتها دهنية. عيبه الوحيد انه موجود فقط في صيدلية الحبيب.
ماسكارا It’s So BIG by Elizabeth Mott :
اذا تحبين المظهر الطبيعي، وماسكارا ما تعطيك عيون الباندا مع الحر او اذا غسلتي وجهك فهالنوع يناسبك.
ما تعطي ذاك الفوليوم القوي، مظهر بسيط مع كحل خفيف. تنفع بالبيت او الدوام او زيارات بسيطة. واجمل فيها وقت ازالتها تنزل زي القطع وما تترك اي بقع على البشرة. اول مرة استخدمتها جتني هدية من ضمن بوكس مكياج من bellabox لكن للأسف مو متوفرة هنا، فصرت اشتريها من امازون. وهذي ماسكرتي الثانية من عندهم.
ماسكارا Bobi Brown
هالعبوة الصغيرة جتني ضمن عينات من موقع نوردستورم. انجنيت عليها انا واختي لانها تعطي فوليوم قوي جدا وتكثف الرموش لدرجة احسني حاطة رموش تركيب. هالشي حمسني اروح اشتري الحجم العادي من عندنا؛ وللاسف انصدمت.
عادية جدا او آقل من عادية. مااعرف صراحة ايش اللي صار بين العينة واللي بالحجم الطبيعي. فكرت ارجع اشتريها من نوردستورم اجرب بس ما اظن الحين .
مجموعة الجواجب Brow Zings من Benefit:
بالبداية لازم اوضح ان العبوة حاليا تغير شكلها وحطيت لكم رابط الشكل الجديد .. لكن للاسف انا مازال عندي القديمة مع ان توني شاريتها. هالعبوة تجي فيها المستحضر كريمي وبودرة، البودرة لمقدمة الحاجب والكريمي للبقية. يميزها ان اللون ثابت وطبيعي جدا ولا يروح اذا غسلت وجهي بموية خفيفة او مع الوضوء وممكن يظل ثابت على البشرة فترة طويلة. اهم شي ننتبه للبيس المات او الفوتوشوب لانهم يغطون البشرة بعازل فيأثرون على الحواجب ويصير مو ثابت عليها.

زبدة العسل و الشيا من Skin Food :
هالبراند الكورية جميلة بمستحضرات الجسم باكثر من شي استخدمته منهم. الزبدة الصراحة اشتريتها عشان الباكج بس طلعت ممتازة. لان بشرتي دهنية مو اي كريم او زبدة تريحني وغالبا تظل ما تمتصها البشرة. هالنوع ممتاز جدا وافضله على النوع اللي من Iherb. ترطيبها متوسط فاحسها تناسب البشرة من الدهنية للعادية، اما الجافة فممكن تناسبها كشي يومي مو ترطيب عميق.
الزبدة من جوا بيضاء ومثل الرغوة متوسطة الثقل. ما تترك اي لون على الجلد او الملابس لكن مثل اي زبدة تحتاج تدليك جيد على الجلد.
فرشة تنظيف الوجه من The Face Shop:
اشتريت هالفرشة بدافع الفضول والفضاوة ،حطيتها جنب الغسول اليومي. بعد تقريبا اسبوعين بدا اللي حولي يلاحظون ان بشرتي بدت تكون انظف واصفى. بسبب كون بشرتي دهنية اتعب كثير في التنظيف والرؤوس السودا خصوصا ان المسام واسعة. استخدمها حاليا من تقريبا اربع شهور ومرتاحه معاها. هالفرشة بديل حلو اذا الواحد ماعجبته فرشة كلارسونيك او كان -مثل حالاتي– كل يوم يقول بكرة بشتريها ولا جى بكرة للان.
هذا كل شي عندي لهالتدوينة. ماحبيت اكثر مستحضرات ولا اركز كثير على المكياج لاني ما استخدمه كثير. اضفت الروابط للمستحضرات اللي طلبتها من النت لو احد حاب يستخدمها، ولو احد سبق جرب شي من اللي ذكرتها ياليت نتشارك التجربة.
Advertisements

One thought on “(1) My Favourite Stuff

  1. جممميلة تدوينتك استمتعت بقراءتها 😍
    انتي زيي على فكرة من ناحية التغيير في المنتجات 😅 هي أشياء معينة إللي إذا حبيتها علّقت عليها..
    بالنسبة للماسكرا..
    تذكرت مره جتني ماسكر من too faced اسمها better than sex كان عليها مدح مرره قوي
    ولمن استخدمتها مرره انصدمت شدعواااه الماسكرا الخارقه 😶 مرره أقل من عاديه!
    بس مره على عجاله كنت أرتب شنطة السفر وأخذتها بالغلط بدال ماسكرا كيكو كلها علبها فضيه.. ولا انتبهت الا بعد ما وصلت للمدينة الثانيه..
    اضطريت استخدمها.. بس شوفي شكلي وأنا مصدومه أطالع برموشي! يمممه تجججن!! مو نفس اللي استخدمتها اول.. طبعا صارت هالماسكرا هي المفضله للأبد خلاص..
    قبل فترة قريت موضوع وحده تتكلم انه كثير ماسكرات ما تحبونها بالبدايه بس بعد كم استخدام تكتشفون انها حلوة.. والسر إنه الفرشه لازم تحركينها وتدخلينها وتخرجينها كم مره عشان تتحرك الماده..
    جربي سوي هالحركة.. فيه أمل لسى في الماسكرا 😂

    إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s