قبل زيارة معرض الكتاب


بدأ منذ ايام معرض الرياض الدولي للكتاب. هذا المعرض للمهتمين بالكتب يعتبر من اهم الاحداث السنوية لدرجةننتظره طول السنة ونكون مجهزين قوائم الكتب اللي نتمنى نحصلها، واحيانا نكون ننتظر الاصدارات الجديدة اللي فقط تنزل للسوق من خلال هالمعرض.

المعرض كبير جدا واحيان ما تقدر تغطيه بيوم واحد، وعشان كذا لازم تستعد له بشكل منظم. كل سنة اجرب نوع معين من القوائم عشان تسهل عليّ البحث لكن افضل طريقة نفعت معي قائمة هالسنة. وعشان كذا حبيت اشاركها معاكم للاشخاص اللي باقي ما حصل لهم الفرصة يزورون المعرض.
أنواع القوائم اللي ممكن نسويها لمعرض الكتاب:
  • قوائم لدور النشر المتواجدة: هالطريقة مناسبة اذا نبي نستعرض الكتب الجديدة او نتتبع مؤلفات كاتب معين. ونحتاج فيها نستخدم الخريطة.
  • قوائم لدور النشر من بلد معين: كل بلد يتميز بشي معين؛ الاردن مثلا معروفة بالمؤلفات التعليمية. هالطريقة مناسبة للاستطلاع على مؤلفات تحت اطار معين او اذا ماعندنا قائمة محددة. بهالطريقة نحتاج برضو لاستخدام الخريطة.
  • قوائم لكتب: هذه الطريقة للقراء او اذا ماخذه توصيات. هذي الطريقة اشوفها افضل لانها توضح لك بالضبط وين تتجه وبرضو الميزانية اللي راح تصرفها داخل المعرض. وهذي الطريقة اللي راح افصّل عنها.
مراحل إعداد قوائم الكتب لمعرض الكتاب:
  • تطلع عندي المعلومات التالية: اسم الكتاب، والمؤلف، ودار النشر، والدولة التابعة لها، والجناح، والبوابة، وسعر الكتاب. نحتاج ندون هذه المعلومات كلها لانها بتفيدنا بالقائمة.
المعلومات السابقة نحتاجها لعدة اسباب:
  • احيان الاسعار تكون بالمعرض اعلى من المُسجل في قوائم الموقع. وصار لي هالموقف يوم السبت ولما حاجيت البائع ان السعر بالموقع اقل قال انه غلط وبيروح يعدله. بس طبعا رفضت احاسب الا بالسعر المُسجل.
  • دار النشر لما نكتب الدولة التي تتبعها راح نقلل اللبس اللي ممكن يصير لنا في البحث. مثلا فيه دار كلمات في الاردن والكويت.
الحين راح نرجع للقائمة اللي سويتها واقرر على اي اساس راح اسوي القائمة النهائية؟ هذي القائمة هي اللي راح تحدد حركتي داخل المعرض. ممكن اعتمد على البوابات او على الممرات والاجنحة، او حسب الدول. هذا التحديد راح يبين لي كيف راح اقسم قائمتي.
بزيارتي الاولى للمعرض قسمت القائمة حسب البوابات للمعرض وتحتها الاجنحه الاقرب منها. لكن لما وصلت المعرض لقيت من الاسهل اني اتبع طريقة الممرات والاحرف وانها عملية اكثر. لذلك قائمتي لزيارتي الثانية واللي ابي اشاركها معاكم سويتها بناء على الممرات والاحرف.
  • راح اجمع كل دور النشر اللي تتشارك بنفس حرف الجناح مع بعض وارتبها من العدد الاقل للاعلى.
  • راح احط اسم الجناح، اسم الدار، الدولة التي تتبع لها.
  • تحت اسم الدار راح ادرج اسماء الكتب اللي متوفرة عندهم، بالاضافة لاسماء المؤلفين وسعر الكتاب.
ممكن راح يبقى عندنا كتب ما نعرف من اي دار ولا طلعت معانا بالباحث. ممكن هنا نبحث بالانستقرام او الويب عن اشخاص اقتنوها من المعرض وعندهم معلوماتها الكاملة. وممكن كمان احطها بجزء خاص من الورقة بحيث اشيك عليها خلال تنقلي في المعرض.
هذا الشكل النهائي لقائمتي. خذت ورق A4 وطويتها اربع طيات بحيث تكون بحجم A6. لقيت هالحجم اسهل وانا امشي بالمعرض من اني اشيل معاي اربع اوراق.
بعد ما خلصت القائمة راح احتاج للخريطة الخاصة بالمعرض وتلقونها متوفرة في الموقع.
بالخريطة راح نبحث عن الاجنحه اللي نحتاج نزورها ونأشر عليها عشان ارتب حركتي داخل المعرض بسلاسة.
كذا اكون مستعدة بقائمة بكتب واضحه، واعرف وين احصل الكتب، وبإذن الله اقلل من الوقت اللي اقضيه داخل المعرض. بزيارتي يوم السبت للمعرض قدرت احصل ١٧ كتاب خلال ثلاث ساعات وصراحة اعتبر نفسي انجزت بقوة لان بعض هالكتب بقائمتي وبعضها نصحوني فيها بدور العرض او صاحبتي اقترحتها عليّ، غير الكتب اللي اشتريها للي وصوني.
كيف راح تتغير الخطوات لو انا ما عندي قوائمة لكتب؟ مجرد دور نشر ابي اشيك على منشوراتهم؟
في البداية احدد اسماء دور النشر اللي مهتمه فيها والدول اللي تتبعها لو انا اعرف.
راح ادخل باحث دور النشر وابحث عن الدار واخد رقم الجناح والدولة التابعه لها . (بموقع الويب فيه قائمة بالدور والدول بدون البحث لكن بالتطبيق لازم ابحث)
بعدين يجي دور الخريطة، راح احدد الاجنحه اللي ابي ازورها مثل ما سوينا في قوائم الكتب.



لو كنت ابي اشيك على دور تابعة لدول معينة هنا احتاج اشيك موقع المعرض على الويب. واشوف ارقام الاجنحه لكل بلد. غالبا الدول المشهورة بالنشر تغطي ممر كامل او ممر ونص مثل السعودية ومصر. الدول اللي تكون دور النشر منها قليلة راح تكون فقط كم جناح ونحتاح نتأكد من مكانها مثل المانيا والمغرب.
بعد كذا اخذ الخريطة واوضح الممر لكل دولة وممكن استخدم اقلام ملونه لكل بلد.


اضافات:
  • احاول اول ما ادخل استلم خريطة للمعرض اذا ماكنت طابعتها معي.
  • في حال أرغب احضر فعاليات في المعرض او توقيع كتاب الافضل اتأكد من وقت كل عرض. وبعد كذا احط تنبيه بالجوال قبل بساعة او اكثر عشان اقدر اوصل للمكان المطلوب قبل الزحمة.
  • اذا قائمتي كبيرة للكتب وابي استكشف ممكن اخصص يوم كامل للمعرض من الصبح للمساء بحيث الفترة الصباحية للقائمة والمساء للعروض والاستكشاف. اذا ما متيسر لي اروح اكثر من مرة اقدر اخصص كل زيارة لهدف معين.
  • يوجد صرافات في المعرض لكن الزحمه عالية عليها والافضل تصرفون قبل توصلون لمعرض. نحط ببالنا ان دور النشر احيان ما يتوفر عندها صرف الفئات الكبيرة بداية اليوم.
  • لازم يكون معاك وسيلة لنقل الكتب. بالنسبة لي استخدمت شنطة ترولي صغيرة، لكن المعرض فيه كورنر للعربات وفيه موظفين يعرضون عليك يشيل اغراضك بمبلغ معين.
  • الفواتير احتفظوا فيها بمكان قريب لان عند البوابات لازم تسلمون النسخه الوردية منها.
  • واهم شي حددوا موقع المصلى عشان ما يروح وقت الصلاة وانت ما حصلتي المكان او تضطرين تصلين باقرب مكان. لان جد العشوائية مو حلوة خصوصا ان كل اللي موجودين بالمعرض ناس متعلمه وفاهمه وعيب هالتصرف.


    اتمنى لكن زيارة موفقة.
Advertisements

7 thoughts on “قبل زيارة معرض الكتاب

  1. أحب أتابع تدويناتك و الله كلها فائدة
    أنا بعد أستعمل هالطريقة غير انو في دولتي ما يحطو لائحة اكتب بيحطو بس دور النشر
    لهيك كنت دائما أصنف الكتب عأساس دار النشر
    و حتى خريطة المعرض ما في في موقعهم الرسمي سو كنت أعتمد عى تصوير بالفون
    الله يهديهم و يساعدونا بس 😂
    متابعتك حبيبتي و منتظرة جديدك 😘

    إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s