مرحبا بك في منزلك الجديد

من الأشياء اللي خذتها كأساس لما جيت أثث مكتبي إني احتاج مكان ارتاح فيه❤️. ومن ضمن الراحة اللي احبها ان يكون حولي نباتات كثير🍃. في تدوينة اليوم حبيت اشارككم مهمة كنت محتاجة اسويها اليوم؛ وهي نقل النباتات من اصيص المشتل لاصيص دائم. ♦️معلومة مهمة حابة أاكد عليها إني مو مزارعة محترفة لكن لي تجاربي الصحيحة والخاطئة في الزراعة، لكن احاول استفيد قد ما أقدر من الحسابات المتخصصة حولي.

الأغراض اللي راح نحتاجها اليوم:

• أدوات زراعة، وفي حالة عدم توفها يكفي مجرفة او ملعقة كبيرة تقوم محلها.

• احجار صغيرة أو فلين.

• اصيص حسب رغبتك.

• تربة زراعية (اللي عندي خذتها من حدائق السلطان).

• مرش للسقي.

خطوات العمل:

اول الخطوات نحط قطع احجار في قاعدة الاصيص، وممكن نستبدلها بقطع فلين اللي ينحط بعلب الأجهزة اذا حابين نخفف وزن. ميزة هالخطوة انها راح تساعد في تصريف الماء الزائد بعيد عن التربة وعن جذور النبته وعشان نحافظ عليها من التعفن.

بالصورة هنا انا مستخدمه حوض زجاجي بدون تصريف، لانه عبارة عن كوب وقررت احط فيه نبته. اكبر مشكله بتواجهني هي عدم التصريف وبتحتاج حذر كبير وقت السقي عشان مااغرق نبتتي. لكن صراحة حبيت اغامر واجرب .

♦️ملاحظة مهمة أهم شي بالحياة: ما ننقل النباتات في ضوء النهار، لازم يكون قبل المغرب بشوي او المساء. حاولت ابدا قبل المغرب بشوي عشان اقدر اصور بس ظلمت علي وانا اشتغل.

الخطوة الثانية نحط طبقة من التربة الجديدة في الحوض.

الخطوة الثالثة نفصل النبته عن الاصيص الاساسي ونحاول قد ما نقدر اننا نحافظ عليها تكون كتلة متماسكة. للاسف انا وحدة من الشتلات فجأة تفككت😭😱!! طبعا وقفت خمس دقايق ابكي لاني خفت تموت بسبب غبائي😭😢.

تحذير: اظافرك راح تمتلي رمل😢، فالافضل يلبس الشخص قلفز اذا يتقرف من هالشي.

الخطوة الرابعة نضيف زيادة تربة ونضغطها كويس ونتأكد مافي اي هواء بين التربة الجديدة والتربة المتماسكة مع الجذور. وجود الهواء راح يسبب صدمة للجذور ممكن يكون سبب موت النبته.

الخطوة الخامسة نسقي النباتات بالماء ونتأكد نرشها كويس. الميزة بالاصيص اللي فيه منافذ تفريغ إن أي ماء اضافي راح يتصرف من التربة.

الخطوة السادسة بعد ما روشنا النباتات تضغط التربة شوي ونتأكد ان التربة راح منها اي فراغات والماء راح يساعد على هالشي انه يطرد الهواء.

الخطوة السابعة ننظف النباتات من التربة اللي علقت بالنقل والحوسة😍، وبتشوفون ان كل نبته حطيت قاعدتها تحتها. الحوض الرمادي القاعدة تجمع الموية المتصرفه، بس الشفافة مجرد شكل.

آخر خطوة نحط نباتاتنا في مكانها السعيد😍😍 بعد ما انتقلت لبيتها الجديد.

تعقيبات: 

• النبات في الصورة اسمها بوتس (Pothos) وسهله جدا بالعناية.

• احواض النباتات اللي استخدمتها من ايكيا (١) (٢) واقي الفلين

• الأدوات الزراعية من أمازون، اصدار خاص بدعم التوعية بسرطان الثدي. لكن لا انصح فيها الا اذا عندك اهتمام عميق بالزراعة. ممكن هذي الاداة من حدائق السلطان تفي بالغرض.

حسابات مفيدة للزراعة: Smart.Garden – It’s all grows